ខេត្តពោធិ៍សាត់ ៖ ដើម្បីការពារសុខុមាលភាពរបស់ប្រជាពលរដ្ឋទូទៅក្នុងការទទួលទានចំណីអាហារ និងភេសជ្ជៈគ្រប់ប្រភេទនោះ នាព្រឹកថ្ងៃទី២៤ ខែឧសភា ឆ្នាំ២០១៩ មន្ត្រីសាខាកាំកុងត្រូលខេត្តពោធិ៍សាត់ដឹកនាំដោយលោក តូច ចៅកុយ សហការណ៍ជាមួយមន្ត្រីជំនាញនៃមន្ទីរពាណិជ្ជកម្មខេត្តនគរបាលប៉ុស្ដិ៍រដ្ឋបាល និងអាជ្ញាធរមូលដ្ឋានបានចុះស្រាវជ្រាវរកទំនិញខូចគុណភាព និងចំណីអាហារដែលមានផ្ទុកសារធាតុគីមីនៅផ្សារបឹងខ្នារ និងផ្សារអ៊ីផា ក្នុងស្រុកបាកាន ។
ការចុះត្រួតពិនិត្យនេះ គឺផ្តោតសំខាន់ទៅលើទំនិញវេចខ្ចប់ស្រាប់ ភេសជ្ជៈ និងចំណីអាហារដែលដាក់តាំងលក់ក្នុងផ្សារតាមដេប៉ូ និងតាមស្ដង់នានា ព្រមទាំងបានចែកចាយផ្ទាំងរូបភាពដែលនិយាយអំពីផលិតផល ឫម្ហូបអាហារណាដែលគួរជ្រើសរើសយកមកបរិភោគ ឫមិនគួរបរិភោគជូនដល់អ្នកលក់ និងអ្នកទិញឲ្យបានយល់ដឹងទាំងអស់គ្នាផងដែរ ។
សមត្ថកិច្ចបានខិតខំពន្យល់ណែនាំ និងបង្ហាញជូនដល់អាជីវករអំពីវិធីសាស្ត្រថែទាំ ការដាក់តាំងលក់ការរក្សាទុកមុខទំនិញឲ្យស្របតាមលក្ខខណ្ឌតម្រូវផ្នែកអនាម័យរបៀបមើលកាលបរិច្ឆេទប្រើប្រាស់សម្រាប់ជាគុណប្រយោជន៍ដល់សុខភាព ។ ជាមួយគ្នានេះបានណែនាំដល់អ្នកលក់ និងអ្នកទិញមុននឹងយកទំនិញមកលក់ ឫទិញ ត្រូវមើលឱ្យបានច្បាស់លាស់ជាមុនសិន និងជួយផ្សព្វផ្សាយបន្ត ដើម្បីបង្ការទប់ស្កាត់ទាំងអស់គ្នា ។
ក្នុងការចុះអង្គេតពិនិត្យជាក់ស្ដែងយ៉ាងយកចិត្តទុកដាក់ដោយឈរលើស្មារតីទទួលខុសត្រូវខ្ពស់ចំពោះតួនាទីភារកិច្ចនេះ សមត្ថកិច្ចបានរកឃើញផលិតផល និងគ្រឿងបរិភោគមួយចំនួនដែលខូចគុណភាពក្នុងនោះមានទឹកក្រូច នំកញ្ចប់ ទឹកដោះគោ ទឹកម្ទេសដប ទឹកប្រេងម្ទេស និងភេសជ្ជៈមួយចំនួនទៀតសរុប៦៩៦.៥គីឡូក្រាម ។ ចំណីអាហារ និងភេសជ្ជៈដែលដាក់តាំងលក់គ្មានអនាម័យ គ្មានសុវត្ថិភាព ហួសរយៈពេលផុតកំណត់ប្រើប្រាស់គ្មានស្លាកសញ្ញាត្រឹមត្រូវ ឫមានស្លាកសញ្ញាផ្ទុយពីច្បាប់ និងបទបញ្ញត្តិរបស់ក្រសួងពាក់ព័ន្ធខាងលើនេះសមត្ថកិច្ចបានដកហូត ដើម្បីយកទៅកម្ទេចចោល ។
ចំពោះម្ចាស់ផលិតផលម្ហូបអាហារដែលត្រូវបានរឹបអូស និងម្ចាស់ផលិតផលផ្សេងៗទៀតដែលដាក់តាំងលក់ សមត្ថកិច្ចកាំកុងត្រូលបានធ្វើការព្រមានឲ្យបញ្ឈប់ជាបន្ទាន់ដោយភ្ជាប់ជាមួយកិច្ចសន្យាផ្ដិតមេដៃ បើថ្ងៃក្រោយមានករណីបែបនេះទៀតនឹងកសាងសំណុំរឿងបញ្ជូនទៅសាលាដំបូង ដើម្បីចាត់ការតាមផ្លូវច្បាប់ ។
លោកតូច ចៅកុយ ប្រធានសាខាកាំកុងត្រូលខេត្តពោធិ៍សាត់បានជម្រាបជូនថា លោកនឹងបន្តដឹកនាំកម្លាំងចុះត្រួតពិនិត្យទំនិញ និងចំណីអាហារនៅតាមទីផ្សារ និងដេប៉ូនានាក្នុងខេត្តពោធិ៍សាត់ដូចភ្លៀងរលឹម ដើម្បីធានាសុខមាលភាពជូនប្រជាពលរដ្ឋដែលជាអ្នកទទួលទាន ៕ កែសម្រួលដោយ ៖ សុឃាក់
ចែករំលែកព័តមាននេះ