រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប បានអះអាងថាសម្រាប់ការបោះឆ្នោតជ្រើសរើសក្រុមប្រឹក្សាខេត្តក្រុង ស្រុក អាណត្តិទី៣នេះប្រព្រឹត្តទៅដោយរលូនគ្មានការរាំងស្ទះ គ្មានអំពើហិង្សា គ្មានការគំរាមកំហែង មានសន្តិសុខសណ្ដាប់ធ្នាប់ល្អ…
រាជធានីភ្នំពេញ ៖ គណៈកម្មាធិការជាតិរៀបចំការបោះឆ្នោតហៅកាត់ថា គ.ជ.ប បានអះអាងថាសម្រាប់ការបោះឆ្នោតជ្រើសរើសក្រុមប្រឹក្សាខេត្តក្រុង ស្រុក អាណត្តិទី៣នេះប្រព្រឹត្តទៅដោយរលូនគ្មានការរាំងស្ទះ គ្មានអំពើហិង្សា គ្មានការគំរាមកំហែង មានសន្តិសុខសណ្ដាប់ធ្នាប់ល្អ ។
យោងតាមសេចក្ដីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោតស្ដីពីព្រឹត្តិការណ៍ទូទៅនៃការបើការិយាល័យបោះឆ្នោត និងការរាប់សន្លឹកឆ្នោតនៅថ្ងៃទី២៦ ខែឧសភា ឆ្នាំ២០១៩បានបញ្ជាក់ថា គិតត្រឹមម៉ោង១០កន្លះព្រឹកក្នុងចំណោមការិយាល័យបោះឆ្នោតទាំង២០៣ការិយាល័យ មានការិយាល័យបោះឆ្នោតចំនួន១៩៦ ការិយាល័យត្រូវបានបិទបញ្ចប់ការបោះឆ្នោត និងការិយាល័យបោះឆ្នោត ខណៈការិយាល័យចំនួន៧ មិនទាន់បិទការបោះឆ្នោតដោយសារមានអ្នកមិនទាន់បានបោះឆ្នោតចំនួន១០នាក់ ដោយក្នុងនោះមានអ្នកបោះឆ្នោតចំនួន១នាក់ បានទទួលមរណភាព ដោយគ្រោះថ្នាក់ចរាចរណ៍ (ឃុំក្រែក ស្រុកពញាក្រែក ខេត្តត្បូងឃ្មុំ) និងមានការិយាល័យរាប់សន្លឹកឆ្នោត មានចំនួនជាង៥០ភាគរយ បានបញ្ចប់ការរាប់សន្លឹកឆ្នោត ។
សូមបញ្ជាក់ថា សម្រាប់ការបោះឆ្នោតលើកទី៣នេះមានគណបក្សនយោបាយចូលរួម៧ រួមមាន គណបក្សប្រជាជនកម្ពុជា គណបក្សខ្មែររួបរួមជាតិ គណបក្សហ្វ៊ុនស៊ិនប៉ិច គណបក្សខ្មែរសាធារណរដ្ឋ គណបក្សឆន្ទៈខ្មែរ គណបក្សសញ្ជាតិកម្ពុជា និងគណបក្សយុវជនកម្ពុជា ៕ កែសម្រួលដោយ ៖សុឃាក់
ចែករំលែកព័តមាននេះ