នំបញ្ចុកនយោបាយ
- ភ្នំពេញ
រាជធានីភ្នំពេញ ៖ នំបញ្ចុក គឺជាអាហារប្រពៃណីម្យ៉ាងសម្គាល់អត្តសញ្ញាណខ្មែរ ។ នៅក្នុងពិធីបុណ្យទានផ្សេងៗ ដូចជា ពិធីជួបជុំសាច់ញាតិ មិត្តភក្តិ បុណ្យខួបកំណើត…
រាជធានីភ្នំពេញ ៖ នំបញ្ចុក គឺជាអាហារប្រពៃណីម្យ៉ាងសម្គាល់អត្តសញ្ញាណខ្មែរ ។ នៅក្នុងពិធីបុណ្យទានផ្សេងៗ ដូចជា ពិធីជួបជុំសាច់ញាតិ មិត្តភក្តិ បុណ្យខួបកំណើត ពិធីឡើងផ្ទះថ្មីនិងពិធីជួបជុំបុណ្យសាសនាផ្សេងៗ ប្រជាជនខ្មែរយើងចូលចិត្ត ធ្វើនំបញ្ចុកទទួលភ្ញៀវ ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានហៅការជួបជុំហូបនំបញ្ចុករបស់សមាជិកអតីតបក្សប្រឆាំងថា សកម្មភាពនយោបាយ ដើម្បីគាំទ្រដំណើរការវិលចូលស្រុ ករបស់លោកសម រង្ស៊ី ។ លោកបានសរសេរតាមបណ្តាញតេឡេក្រាមយ៉ាងដូច្នេះថា នៅក្នុងស្ថានភាពនយោបាយបច្ចុប្បន្ន នៅពេលដែលមេឧទ្ទាមខ្មែរក្រៅច្បាប់ប្រកាសចូលស្រុកមានសកម្មជនអតីតបក្សប្រឆាំងមួយចំនួនជ្រួលជ្រើមតាមការញុះញង់ខាងក្រៅប្រទេសបាននាំគ្នាជួបប្រជុំពិភាក្សាគ្នា ដើម្បីប្រកាសគាំទ្រ និងរង់ចាំទទួលក្រុមមេឧទ្ទាមក្រៅច្បាប់ ។
លោកបញ្ជាក់ថា«ដើម្បីបិទបាំងសកម្មភាពនយោបាយគាំទ្រអតីតបក្សប្រឆាំង សកម្មជនទាំងនោះបានយកឡេះការជួបជុំគ្នាហូបនំបញ្ចុក ក្នុងគោលបំណងបំភាន់ភ្នែកសមត្ថកិច្ច ។ ក៏ប៉ុន្តែរាល់កម្មភាពរបស់សកម្មជនអតីតបក្សប្រឆាំងមិនអាចធ្វើឲ្យសមត្ថកិច្ចយល់ច្រឡំឡើយ» ។ លោកបន្ថែមថា ដូច្នេះហើយបានជាមានករណីតុលាការកោះអញ្ជើញអ្នកពាក់ព័ន្ធល្មើសច្បាប់ទៅសាកសួរ និងអប់រំកុំឲ្យប្រព្រឹត្តបទល្មើសច្បាប់តទៅទៀតជៀសវាងចាញ់បោកមេឧទ្ទាម និងបរិវារក្រៅច្បាប់ដែលចង់បង្កអសន្តិសុខ សណ្តាប់ធ្នាប់សាធាណសង្គម ចង់បំផ្លាញ សន្តិភាព ជាពិសេសចង់ឈានទៅផ្តួលរំលំរាជរដ្ឋាភិបាលកម្ពុជាស្របច្បាប់ដឹកនាំដោយសម្តេចតេជោហ៊ុន សែន ។
លោកបន្ថែមថា ដោយហេតុនេះហើយបានជា ពួកជនអគតិមួយចំនួនបាននិយាយវាយ ប្រហារថា រាជរដ្ឋាភិបាលធ្វើការយារយីលើប្រជាជនដែលគ្រាន់តែនាំគ្នាជួបជុំហូបនំបញ្ចុកក៏ មិនបានផង ដែលជាការំលោភសិទ្ធិមនុស្សយ៉ាងធ្ងន់ធ្ងរ ។ បើគ្រាន់តែជួបជុំគ្នាហូបនំបញ្ចុកធម្មតាគ្មានបញ្ហាអ្វីឡើយ ។ ប៉ុន្តែមានការជួបជុំជាបន្តបន្ទាប់របស់អតីតសកម្មជន អតីតបក្សប្រឆាំង គឺជាសកម្មភាពនយោបាយដែលមានចរិតអនុវត្តតាមឧបាយកលរបស់មេដឹកនាំឧទ្ទាមក្រៅច្បាប់ដែលញុះញង់ពីក្រៅប្រទេសក្នុងគោលដៅចង់ប្រោះអតីតបក្សប្រឆាំងឲ្យរស់ឡើងវិញ និងបំផ្លាញសន្តិសុខជាតិតែប៉ណ្ណោះ ដោយយកឡេះជារូបភាពជួបជុំហូបនំបញ្ចុកមកបិទបាំង ។ លោកបញ្ជាក់ថា«នេះហើយដែលហៅថា នំបញ្ចុកនយោបាយនោះ» ។
សូមជម្រាបថាអតីតអ្នកគាំទ្រអតីតបក្សប្រឆាំងជាច្រើននាក់ត្រូវបានតុលាការនៅបណ្តាខេត្តមួយចំនួនបានកោះហៅសួរនាំពាក់ព័ន្ធនឹងប្រឆាំងដីកាតុលាការកំពូលដែរសម្រេចរំលាយគណបក្សសង្គ្រោះជាតិ កាលពីចុងឆ្នាំ២០ ១៧ ពាក់ព័ន្ធនឹងហូបនំបញ្ចុកនេះផងដែរ ៕ កែសម្រួលដោយ ៖សុឃាក់
ចែករំលែកព័តមាននេះ