ចាញ់មែន តែបង្គោលក្រហមត្រូវគេលាន់មាត់ជាងអ្នកឈ្នះទៀត
- ភ្នំពេញ
រាជធានីភ្នំពេញ ៖ សម្រាប់ការប្រដាល់ជ្រើសរើសជើងឯក TV5 Boxing Knock out Series by K-Cement…
រាជធានីភ្នំពេញ ៖ សម្រាប់ការប្រដាល់ជ្រើសរើសជើងឯក TV5 Boxing Knock out Series by K-Cement របស់ប៉ុស្តិ៍លេខ៥ កាលពីថ្ងៃទី២៥ ឧសភា កីឡាករបង្គោលក្រហម សេក សារ៉ាន់ មិនមែនជាអ្នកជោគជ័យនោះទេ ប៉ុន្តែអ្នកគាំទ្រ និងគណៈកម្មការ បែរជាលាន់សរសើរ ដោយសារតែកីឡាករបង្គោលខៀវ លី តក់ វាយត្រូវ និងធ្វើឱ្យចាញ់ពិន្ទុតាំងពីដើមទី ប៉ុន្តែបង្គោលក្រហម សេក សារ៉ាន់ នៅតែស៊ូ ហើយមិនបោះបង់ការប្រកួត ដោយប្រឹងត្រដាបត្រដួសទាល់តែចប់ទឹកទី៣។
អ្នកគាំទ្របានទាំងហៅជំហររបស់អ្នកចាញ់ថា ជាទឹកចិត្តពិតរបស់អ្នកប្រដាល់ពិតប្រាកដនោះផងដែរ។ ការប្រកួតដែលបានធ្វើឡើងនោះ លោកពិធីករ អូឡាឡា លាន់មាត់ជាងគេ សរសើរថា កីឡាករបង្គោលក្រហមថាមានទឹកចិត្តជាកីឡាករ ក្នុងពេលកីឡាករវ័យក្មេងរូបនេះ នៅតែសម្រុកចូល បើទោះជារាល់ពេលចូលប្រកួតលើកណា ក៏ត្រូវបង្គោលខៀវម៉ាត់ចំកណ្ដាលមុខ និងទាត់ជើងក្រោម ធ្វើឱ្យគេដួលប្រផះប្រភីង។
លោកបានប្រកាសដាក់ក្បាលមេក្រូដដែលជាដដែលថា កីឡាករបង្គោលក្រហមបានសាងបប្រវត្តិសាស្ត្រធំមួយឱ្យអ្នកគាំទ្រចងចាំ ដោយសារតែគេនៅតែរឹងប៉ឹង មិនចុះចាញ់ បើទោះជាត្រូវប៉ះគូប្រកួត គឺជាកីឡាករជំហររឹង និងខ្លាំងមិនធម្មតា។ ការប្រកួតតាំងពីទឹកដំបូងបង្ហាញយ៉ាងច្បាស់ថា កីឡាករបង្គោលខៀវឈ្នះដាច់ ខណៈដែលក្នុងទឹកទី២ ក៏រឹតតែចាញ់ដាច់ ប៉ុន្តែបង្គោលក្រហម សេក សារ៉ាន់ ដែលមានមាធតូចជាង កម្លាំងខ្សោយជាង នៅតែរុលទៅរកបង្គោលខៀវ។
ក្នុងទឹកទី៣ គេមានឱកាសវាយបង្គោលខៀវបានប៉ុន្មានស្នៀត ប៉ុន្តែក៏រងកណ្ដាប់ដៃ និងរន្ទះជើង ប្រឈមនឹងការឈឺខ្លួនមិនតិចដែរ។ អ្នកគាំទ្រ ក៏ស្ងើចសរសើរមិនតិចទេចំពោះទឹកចិត្តរបស់បង្គោលក្រហមដោយទឹកចិត្តបែបនេះ សម្រាប់កីឡាករដែលដឹងថា ខ្លួនឯងត្រូវតែចាញ់ភាគច្រើន គឺកម្រមានអ្នកស៊ីដល់ម្លឹងណាស់។
យ៉ាងណាមិញ កីឡាករបង្គោលខៀវ ក៏ទទួលបានការសរសើរផងដែរ ជាពិសេសនៅពេលដែលគេនៅតែមានជំហររឹងមាំ បើទោះជាបង្គោលក្រហម វាយចូលតែដូចមិនឈឺ ហើយគិតតែដើរសម្រុកចូល។ កីឡាករបង្គោលខៀវ បានអះអាងថា ទម្រាំបានឈ្នះ ខ្លួនហាត់មិនដែលប្រហែសនោះទេ ទើបលោកបានដឹងតាំងពីមុនរួចទៅហើយថា ខ្លួននឹងឈ្នះ តាំងពីចប់ទឹកទី១ បន្ទាប់ពីវាយសម្រុកទៅលើបង្គោលក្រហមបានល្អ។ យ៉ាងណាមិញលោកក៏សរសើរថា បង្គោលក្រហមចង់ធ្វើឱ្យលោកចង់បាក់ស្បាតម្ដងៗផងដែរ នៅពេលប្រឹងវាយណាស់ដែរ នៅតែបង្គោលក្រហមសម្រុកចូល៕ (កែសម្រួលដោយ ៖ បុប្ផា)
ចែករំលែកព័តមាននេះ