ខេត្តបាត់ដំបង ៖ សេចក្តីរាយការណ៍ឱ្យដឹងថា កម្លាំងជំនាញនៃការិយាល័យព្រហ្មទណ្ទកំរិតស្រាល ស្រាវជ្រាវតាមឃាត់ខ្លួនក្រុមចោរ«ឆក់»បានចំនូន២នាក់ទៀតបន្តបន្ទាប់ នៅវេលាម៉ោង១១និង៣០នាទីថ្ងៃត្រង់ ថ្ងៃទី២៥ ឧសភា នេះ ស្ថិតនៅចំណុចភូមិអង់ សង្កាត់អូរចារ ក្រុងបាត់ដំបង ដែលជនទាំង២នាក់នេះជាប់ពាក់ព័ន្ធធ្វើសកម្មភាពឆក់កាបូបរបស់នារីបរទេសម្នាក់ កាលពីជាងកន្លះខែមុននេះ ។
នាយការិយាល័យព្រហ្មទណ្ឌកំរិតស្រាល លោកឈឿង គឹមសុង បានឲ្យដឹងថា លោកចោរដៃស្អិតទាំង២នាក់នេះ ម្នាក់ឈ្មោះជិន សុភារ៉ា ភេទប្រុស អាយុ១៨ឆ្នាំ នៅភូមិកម្មករ សង្កាត់ស្វាយប៉ោ ក្រុងបាត់ដំបង និងម្នាក់ទៀត ឈ្មោះព្រំ សុផាត់តាណា ហៅមិច អាយុ១៦ឆ្នាំ នៅឃុំកន្ទឺ២ ស្រុកបាណន់ ។
លោកនិយាយថា ជនទាំង២នាក់នេះ ត្រូវឃាត់ខ្លួនជាបន្តបន្ទាប់ ក្រោយពីកម្លាំងជំនាញរបស់លោកធ្វើការស្រាវជ្រាវ និងស៊ើបអង្កេតអស់រយ:ពេលជាងកន្លះខែ ក្រោមការបញ្ជាផ្ទាល់ពីលោកស្នងការខេត្ត ដោយកំណត់បានថា មុខសញ្ញាទាំង២នាក់នេះ មានជាប់ពាក់ព័ន្ធនឹងការធ្វើសកម្មភាព «ឆក់កាបូបស្ពាយ»របស់ជនបរទេសម្នាក់ កាលពីជាងកន្លះខែមុននេះ ។
យោងតាមព្រឹត្តហេតុរបស់សមត្ថកិច្ខបានឲ្យដឹងថា កាលពីរសៀលថ្ងៃទី០៧ ឧសភា មានជនមិនស្គាល់មុខចំនួន២នាក់ ជិះម៉ូតូម៉ាកស្គូពី ពណ៌ផ្កាឈូកមួយគ្រឿង បានធ្វើសកម្មភាព «ឆក់កាបូបស្ពាយ» ពីជនបរទេសម្នាក់ឈ្មោះ ANDAY DENIZYALIN ភេទស្រី អាយុ២៦ឆ្នាំ ជនជាតិទួគី ពេលនាងកំពុងជិះកង់ដល់ចំណុចភូមិព្រែកតាតន់ សង្កាត់ព្រែកព្រះស្តេច ក្រុងបាត់ដំបង បណ្ដាលឲ្យនាងដូលរបួសដៃនិងជើង ។
ក្នុងរបាយការណ៍បានឲ្យដឹងទៀតថា នារីបរទេសនៅបានបាត់បង់កាបូបស្ពាយ១ ហើយនៅក្នុងកាបូបនោះ មានទូរស័ព្ទម៉ាកអាយហ្វូន១គ្រឿង និងលុយចំនួន៧០ដុល្លា ។ ជាមួយការឃាត់ខ្លួននេះ លោកចោរដៃស្អិតបានសារភាពថា ពួកគេពិតជាបានធ្វើសកម្មភាពឆក់កាបូបស្ពាយរបស់នារីបរទេសនោះមែន ។ ចំពោះរបស់របរដែលខ្លួនឆក់បាន គឺលុយពួកខ្លួនចាយអស់ហើយ រីឯទូរស័ព្ទពួកខ្លួនបានបោះចោលព្រោះជាប់អាយខ្លោត ខ្លួនមិនហ៊ានយកទៅលក់ទេ ខ្លាចគេដឹង ។
លោកឈឿង គឹមសុង នាយការិយាល័យព្រហ្មទណ្ឌកំរិតស្រាលបានបញ្ជាក់ថា ក្រោយធ្វើសកម្មភាពលោកស្នងការខេត្ត បានចេញបញ្ជាឲ្យកម្លាំងជំនាញរបស់លោក ដែលដឹកនាំផ្ទាល់ដោយលោកជេត វណ្ណនី ស្នងការរងខេត្តធ្វើការស៊ើបអង្កេតអស់រយៈពេលជាងកន្លះខែ ទើបកំណត់បាននូវមុខសញ្ញាជនដៃដល់និងឈានដល់ការឃាត់ខ្លួនជនដៃដល់ទាំង២នាក់នេះតែម្ដង ។ (សម្រួលដោយ៖ ស្រីណា)
ចែករំលែកព័តមាននេះ