ខេត្តកំពង់ឆ្នាំង ៖ សត្វក្ងោកដែលជាសត្វកម្រមាន ត្រូវបានជនល្មើសជិះឡានទំនើបមួយគ្រឿង មកលួចបាញ់សម្លាប់ ហើយខាងគណៈកម្មការវត្តភ្នំប្រធាតុ ស្រុកសាមគ្គីមានជ័យ បានសុំអំពាវនាវដល់អាជ្ញាធរមានសមត្ថកិច្ចជួយទប់ស្កាត់ផង ។ ហេតុការណ៍បាញ់សត្វក្ងោក…
ខេត្តកំពង់ឆ្នាំង ៖ សត្វក្ងោកដែលជាសត្វកម្រមាន ត្រូវបានជនល្មើសជិះឡានទំនើបមួយគ្រឿង មកលួចបាញ់សម្លាប់ ហើយខាងគណៈកម្មការវត្តភ្នំប្រធាតុ ស្រុកសាមគ្គីមានជ័យ បានសុំអំពាវនាវដល់អាជ្ញាធរមានសមត្ថកិច្ចជួយទប់ស្កាត់ផង ។ ហេតុការណ៍បាញ់សត្វក្ងោក កើតឡើងនៅក្នុងព្រៃសហគមន៍ ក្បែរវត្តភ្នំព្រះធាតុស្ថិត ក្នុងភូមិច្រកកូវ ឃុំពាម ស្រុកសាមគ្គីមានជ័យ ។ នេះបើតាមការអះអាងរបស់គណៈកម្មការវត្តភ្នំព្រះធាតុ ។
ជួបជាមួយលោកតា ចន្ទ័ ពន្លឺ ជាប្រធានគណៈកម្មការវត្តភ្នំប្រធាតុបានឱ្យដឹង នារសៀលថ្ងៃទី២៥ ឧសភា នេះថា មានក្រុមជនល្មើសមួយក្រុមជិះរថយន្តយ៉ាងទំនើប ដោយមានគ្នា៣នាក់ប្រដាប់ដោយកាំភ្លើងបាញ់សត្វមួយដើម បានមកលួចបាញ់សត្វក្ងោកនៅក្នុងព្រៃសហគមន៍ ដែលនៅជាប់នឹងវត្តភ្នំប្រធាតុនេះ កាលពីថ្ងៃទី២៤ ឧសភា ម្សិលមិញ ។
លោកតាបន្តថា ខណៈនោះក៏មានកូនសិស្សរបស់វត្តបានលួចថតពីសកម្មភាពនៃការបាញ់សត្វក្ងោកខាងលើនេះ ។ បន្ទាប់មក ពួកក្រុមល្មើសទាំងនោះបានរត់ឡើងរថយន្តជិះចេញបាត់អស់ទៅ ។ លោកតាបញ្ជាក់ថាកាលពីបួនប្រាំថ្ងៃមុន ក៏មានការលួចបរបាញ់សត្វក្ងោកនេះដែរ ប៉ុន្តែសត្វក្ងោកត្រូវគ្រាប់បានធ្លាក់ចូលមកងាប់នៅក្នុងវត្ត ហើយត្រូវបានគណៈកម្មការរើសយកទៅឆ្កាង ដើម្បីរក្សាទុក ។ គណៈកម្មការវត្តបានបញ្ជាក់ថា នៅក្នុងព្រៃសហគមន៍ដែលជាប់នឹងភ្នំប្រធាតុ មានសត្វក្ងោកជាច្រើនក្បាលជាមួយគ្នានោះ ក៏មានសត្វឈ្លូស ទន្សាយជ្រូកព្រៃ និងសត្វព្រៃជាច្រើនទៀត ។
ដូច្នេះ លោកសូមអំពាវនាវដល់អាជ្ញាធរមានសមត្ថកិច្ចគ្រប់ជាន់ថ្នាក់ មេត្តាជួយការពារថែរក្សាសត្វព្រៃទាំងនោះផង ព្រោះជាប្រភេទកម្រមានណាស់ ។ ម្យ៉ាងវិញទៀត នៅតំបន់ខាងលើនេះ ជាតំបន់ទេសចរណ៍ផង ប្រសិនបើមានសត្វព្រៃ ទាំងនោះសម្រាប់ការទស្សនាកម្សាន្ត នោះភ្ញៀវទេសចរនឹងកាន់តែកើនឡើងជាមិនខាន ។ (សម្រួលដោយ៖ ស្រីណា)
ចែករំលែកព័តមាននេះ