យោងតាមកាសែតបាងកកប៉ុស្តិ៍របស់ថៃ ដែលផ្សាយជាភាសាអង់គ្លេសនៅថ្ងៃទី២ កញ្ញា ឱ្យដឹងថា តុលាការឧក្រិដ្ឋកម្មថៃកាលពីថ្ងៃទី២ កញ្ញា បានសំរេចកាត់ទោសលោកស៊ុនធិ លឹមថងគុន ជាមេដឹកនាំក្រុមសម្ព័ន្ធភាពប្រជាជនដើម្បីលទ្ធិប្រជាធិបតេយ្យ ដែលគេស្គាល់ថា ជាក្រុមអាវលឿងមានភក្តីភាពចំពោះរបបរាជានិយមសៀម និងជនម្នាក់ទៀតឈ្មោះសារ៉ូចាផន ឧត្តមសគ្គ ឱ្យជាប់ពន្ធនាគាររយៈពេល៦ខែ ក្នុងម្នាក់ និងព្យួរទោសរយៈពេល២ឆ្នាំ ក្រោយពីតុលាការរកឃើញថា អ្នកទាំងពីរមានទោសកំហុសពីបទបង្ខូចកេរ្តិ៍ឈ្មោះលោកថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីដែលមានប្រជាប្រិយភាព ។
កាសែតបាងកកប៉ុស្តិ៍ឱ្យដឹងថា តាមពាក្យបណ្តឹងដែលបានដាក់នៅថ្ងៃទី២៤ សីហា ឆ្នាំ២០០៧ លោកស៊ុនធិ និងលោកសូរ៉ាចា បានរៀបចំកម្មវិធីមួយឈ្មោះ “Yam Fao Paen Din” ចាក់ផ្សាយតាមទូរទស្សន៍ STV ដែលក្នុងកម្មវិធីនោះមានការធ្វើសុន្ទករថាទៅកាន់អ្នកគាំទ្រក្រុមអាវលឿង នៅក្នុងសហរដ្ឋអាមេរិក ។ ក្នុងសុន្ទរកថានេះ លោកស៊ុនធិ តាមការចោទប្រកាន់បានដកស្រង់សំដីលោកស៊ូរ៉ា គៀត សាធីរ៉ាថៃ អតីតឧបនាយករដ្ឋមន្ត្រីថៃ ដែលបានថ្លែងរយៈពេលប្រហែល៨ម៉ោង ក្រោយពីរដ្ឋប្រហារដែលទំលាក់លោកថាក់ស៊ីន ចេញពីតំណែងថ្ងៃទី១៩ កញ្ញា ២០០៦ ។ សុន្ទរកថានោះដែលធ្វើឡើងដោយលោកស៊ុនធិ និងការចោទប្រកាន់លោកថាក់ស៊ីន ពីបទប្រមាថព្រះមហាក្សត្រ ត្រូវបានចាត់ទុកថា ជាការបង្ខូចកេរ្តិ៍ឈ្មោះលោកថាក់ស៊ីន ។
ទាក់ទិនទៅនឹងករណីនោះរបស់ឈ្មោះស៊ុនធិ ក៏មានការដាក់ពាក្យបណ្តឹងប្រឆាំងលោកស៊ុនធិ និងលោកសូរ៉ាចាផន ពីបទបង្ខូចកេរ្តិ៍ឈ្មោះលោកថាក់ស៊ីន លុះនៅថ្ងៃទី២ កញ្ញា តុលាការឧក្រិដ្ឋកម្មថៃបានរកឃើញថា អ្នកទាំង២មានទោសកំហុសពីបទបង្ខូចកេរ្តិ៍ ឈ្មោះលោកថាក់ស៊ីន ហើយសំរេចកាត់ទោសអ្នកទាំង២ដាក់ពន្ធនាគារ៦ខែម្នាក់ និងព្យួរទោសរយៈពេល២ឆ្នាំទៀត ។ កាសែតបាងកកប៉ុស្តិ៍ឱ្យដឹងទៀតថា ក្រៅពីត្រូវកាត់ទោសដាក់ពន្ធនាគារម្នាក់៦ខែ និងព្យួរទោស២ឆ្នាំ លោកសុនធិ និងលោកសូរ៉ាចាផន ក៏ត្រូវបានតុលាការពិន័យជាប្រាក់២០.០០០បាតក្នុងម្នាក់ទៀតផងដែរ ហើយលើសពីនេះទៅទៀត អ្នកទាំងពីរត្រូវបានតុលាការបញ្ជាឱ្យចេញផ្សាយជាសាធារណៈនូវសាលក្រមរបស់តុលាការក្នុងកាសែត៥រយៈពេល៧ថ្ងៃជាប់ៗគ្នា ។
ទាក់ទិននឹងសុន្ទរកថារបស់លោកសុនធិខាងលើ តាមការចោទប្រកាន់ លោកស៊ុនធិ បានចោទលោកថាក់ស៊ីន ថា មើលងាយនិងប្រមាថព្រះមហាក្សត្រ ។ ដើម្បីជាការឆ្លើយតបចំពោះអត្ថាធិប្បាយរបស់លោកស៊ុនធិ នោះលោកថាក់ស៊ីន ក៏បានដាក់ពាក្យបណ្តឹងពីបទបង្ខូចកេរ្តិ៍ឈ្មោះប្រឆាំងលោកស៊ុនធិ និងលោកសូរ៉ាចាផន ដែលចូលរួមក្នុងកម្មវិធីជាមួយលោកស៊ុនធិ ដែរ តាមរយៈមេធាវីរបស់លោកនៅក្នុងប្រទេសថៃ ។ លោកស៊ុនធិ ខឹមថងគុន ដែលជាមនុស្សម្នាក់ក្នុងចំណោមក្រុមបាតុករអាវលឿង ក៏ត្រូវបានចោទប្រកាន់ពីបទភេរវកម្មផងដែរ កាលពីខែមុនចំពោះការដឹកនាំក្រុមបាតុករអាវលឿងកាន់កាប់ព្រលានយន្តហោះសំខាន់២ ក្នុងទីក្រុងបាងកក កាលពីឆ្នាំ២០០៨ ក្នុងអំឡុងពេលនៃការធ្វើបាតុកម្មផ្តួលរំលំរដ្ឋាភិបាលដែលមានសម្ព័ន្ធភាពជាមួយលោកថាក់ស៊ីន ៕
ចែករំលែកព័តមាននេះ