ខេត្តកំពត ៖ នៅរសៀលថ្ងៃទី២៣ ខែឧសភា ឆ្នាំ២០១៩ លោកជាវ តាយ អភិបាលនៃគណៈអភិបាលខេត្តអមដំណើរដោយអាជ្ញាធរមូលដ្ឋានក្រុង សង្កាត់ បានអញ្ជើញចុះពិនិត្យគម្រោង ការសាងសង់ផ្លូវបេតុងចំនួនពីរខ្សែ ដែលស្ថិតនៅសង្កាត់ក្រាំងអំពិល និងសង្កាត់កំពង់បាយក្រុងកំពត ខេត្តកំពត ។
ផ្លូវទាំងពីរខ្សែនេះ គឺទី១-ឈ្មោះផ្លូវលានស្រូវមានប្រវែង២០០០ម៉ែត្រ មានទទឹង៩ម៉ែត្រ អមលូសង្ខាងផ្លូវ មានមុខកាត់០,៨ម៉ែត្រ ដែលតបំបែកចេញពីផ្លូវជាតិលេខ៣ ទៅខាងកើតក្រុងកំពតក្នុងនោះមានប្រវែង១០០០ម៉ែត្រ ឆ្លងកាត់នៅក្នុងសង្កាត់ក្រាំងអំពិល ក្រុងកំពត និង១០០០ម៉ែត្រទៀត ឆ្លងកាត់ក្នុងឃុំត្រពាំងធំ ស្រុកទឹកឈូ ដែលត្រូវតភ្ជាប់ទៅនឹងផ្លូវវាងក្រុងកំពត ចំណែកឯផ្លូវទី២ គឺជាផ្លូវមានការសម្របសម្រួលផលប៉ះពាល់ដ៏រ៉ាំរ៉ៃជាមួយប្រជាពលរដ្ឋក្នុងភូមិកំពង់បាយខាងជើង សង្កាត់កំពង់បាយ តបំបែកចេញពីផ្លូវជាតិលេខ៣ ទៅផ្លូវត្រពាំងព្រលឹត មានប្រវែង៥៤០ម៉ែត្រ ទទឹងផ្លូវមួយចំណែកទំហំ១០ម៉ែត្រ និងមួយចំណែកធំទៀតមានទំហំ២០ម៉ែត្រ ដែលផ្លូវទាំងពីរខ្សែនេះ ប្រើប្រាស់ថវិការបស់រដ្ឋបាលខេត្ត ។
លោកជាវ តាយ អភិបាលខេត្តបានបញ្ជាក់ថា បញ្ហាប្រព័ន្ធផ្លូវលូទឹកក៏ដូចជា ហេដ្ឋារេចនាសម្ព័ន្ធផ្សេងៗទៀតមិនថា ក្នុងក្រុង ឬស្រុកដទៃទៀតឡើយ គឺជាបញ្ហាការគិតគូរជាចាំបាច់ និងជាប្រចាំរបស់រាជរដ្ឋាភិបាលក៏ដូចរដ្ឋបាលខេត្ត និងក្រុង ស្រុក ឃុំសង្កាត់កន្លងមក ។ ព្រោះបើមានហេដ្ឋារេចនាសម្ព័ន្ធល្អសម្បូរបែប វាអាចផ្ដល់នូវភាពងាយស្រួលសព្វបែបយ៉ាង ក្នុងការបម្រើដល់ជីវភាពរស់នៅ និងការចរាចរណ៍ប្រជាពលរដ្ឋ ដោយមើលឃើញពីភាពចាំបាច់នេះ ឬការប៉ះពាល់ដល់ការរស់នៅរបស់ប្រជាពលរដ្ឋ ។
លោក អភិបាលខេត្ត បានសំណូមពរអោយអាជ្ញធរ ក្រុង សង្កាត់ និងប្រជាពលរដ្ឋរួម និងអ្នកម៉ៅការសាងសង់ត្រូវរួមសហការគ្នា សម្របសម្រួលអោយបានល្អ ដើម្បីធ្វើយ៉ាងណាអោយដំណើរការសាងសង់នេះ ប្រព្រឹត្តទៅដោយរលូនឆាប់រហ័សនិ ងតាមលក្ខណៈបទដ្ឋានបច្ចេកទេសត្រឹមត្រូវ ដើម្បីបម្រើអោយការប្រើប្រាស់បានយូរអង្វែង ។ ជាមួយឱកាសនោះលោកអភិបាលខេត្តក៏បានណែនាំជម្រុញអោយអាជ្ញាធរមូលដ្ឋានក្រុងសង្កាត់ត្រូវតែយកចិត្តទុកដាក់ជាចាំបាច់ក្នុងការតាមដានត្រួតពិនិត្យប្រព័ន្ធលូទឹកផ្លូវ និងបញ្ហាអនាម័យបរិស្ថានក្រុងដោយទុកដាក់ប្រមូលសម្រាម និងពង្រីកសេវាកម្មក្រុមហ៊ុនប្រមូលសំរាម ជាពិសេសផ្សព្វផ្សាយអោយប្រជាពលរដ្ឋយល់ដឹង និងចូលរួមទើបការអភិវឌ្ឍទទួលបានលទ្ធផលជោគជ័យ ៕កែសម្រួល ៖ សុឃាក់
ចែករំលែកព័តមាននេះ