ខេត្តព្រៃវែង ៖ សេចក្តីរាយការណ៍បឋមឱ្យដឹងថា ទីបំផុត ជនដែលចាប់ក្មេងស្រីរំលោភរួចសម្លាប់យ៉ាងព្រៃផ្សៃនោះ ត្រង់ចំណុចស្រះទឹកវាលក្នុងភូមិកោងស្រែ ឃុំល្វេ នៅក្នុងស្រុកស៊ីធរកណ្តាលនោះ ត្រូវសមត្ថកិច្ចស្រាវជ្រាវ និងឃាត់ខ្លួនបានហើយ កាលពីថ្ងៃទី២៣ ឧសភា ។
សេចក្តីរាយការណ៍បន្តថា ជនសង្ស័យមានឈ្មោះផ្លុង ហុកលី ហៅហុក អាយុ៣៥ឆ្នាំ មានទីលំនៅក្នុងភូមិ-ឃុំខាងលើ ។ ដោយឡែក ក្មេងស្រីរងគ្រោះដែលស្លាប់មានអាយុ០៩ឆ្នាំ ។ បច្ចុប្បន ជនសង្ស័យខាងលើ កំពុងសាកសួរពីដំណើររឿងបន្ត នៅអធិការដ្ឋាននគរបាលស្រុក ដើម្បីកសាងសំណុំរឿងតាមនីតិវិធី ។
ប្រភពបន្តទៀត ជនសង្ស័យបានឆ្លើយសារភាពប្រាប់សមត្ថកិច្ចថា ខ្លួនពិតជាបានរំលោភនិងសម្លាប់ក្មេងស្រីពិតប្រាកមែន ដោយពេលនោះ ខ្លួនបានបោះសពនាងទម្លាក់ក្នុងទឹកស្រះ រួចយកឈើ២កំណាត់ដោតខ្វែងខ្ទាស់គ្នាសង្កត់ព្រោះខ្លាចសពអណ្តែតឡើងលើ ។ គួររំលឹកថា ករណីរំលោភសម្លាប់លើក្មេងស្រីនេះ កើតឡើងប្រហែលម៉ោង០៩ និង៣០នាទីថ្ងៃទី២២ ឧសភា កន្លងមក ។
នេះជាការចែករំលែកទៅអាណាព្យាបាលទាំងអស់ផងដែរ សូមមានការប្រុងប្រយ័ត្នចំពោះកូនស្រីកុំបណ្តោយឱ្យទៅលេងទីណា ឬនៅកន្លែងណាតែម្នាក់ឯង ព្រោះអាចកើតមានគ្រោះថ្នាក់បានគ្រប់ពេល ។ (សម្រួលដោយ៖ ស្រីណា)
ព័ត៌មានបន្ថែមនឹងមានផ្សាយជូនបន្តទៀត ។
ចែករំលែកព័តមាននេះ