ខេត្តកំពង់ឆ្នាំង ៖ ប្រព័ន្ធធារាសាស្ត្រលំហាច គឺជាសំណង់ដែលកំពុងរៀបចំកសាងថ្មី ដើម្បីយកទឹកស្រោចស្រពលើផ្ទៃដីស្រែចំនួនប្រមាណជាង៣ពាន់ហិកតា ដែលធារាសាស្ត្រថ្មីមួយនេះស្ថិតក្នុងក្នុងភូមិអញ្ចាញ ឃុំអញ្ចាញរូង ស្រុកបរិបូណ៌ មានចម្ងាយជាង៦០គីឡូម៉ែត្រពីទីរួមខេត្តកំពង់ឆ្នាំង ។
មន្ទីរជំនាញបានអោយដឹងថា ក្រោយពីសំណង់ធារាសាស្ត្រដ៏ធំនេះរួចរាល់នឹងជួយដល់វិស័យកសិកម្មដំណាំស្រូវវស្សារបស់ប្រជាពលរដ្ឋក្នុងស្រុកចំនួន៣ គឺស្រុកបរិបូរណ៍ ស្រុករលាប្អៀរ និងស្រុកទឹកផុស ហើយតំបន់នោះនឹងប្រក្លាយជាតំបន់ទេសចរណ៍យ៉ាងទាក់ទាញទៀតផង។
លោកដោក ប៊ុនថុន ប្រធានមន្ទីរធនធានទឹក និងឧតុនិយមខេត្តកំពង់ឆ្នាំង នៅប្រព័ន្ធធារាសាស្ត្រលំហាចគិតមកដល់ពេលនេះកំពុងដំណើរការសាងសង់បាន៩០% ហើយដោយអាចស្រោចស្រពលើផ្ទៃដីស្រែវស្សាចំនួន៣២៨៩ហិកតា ។ ប្រព័ន្ធធារាសាស្ត្រនេះមានប្រឡាយតូចធំ វែង និងខ្លី សរុបចំនួន១៣៣ខ្សែ ដែលមានប្រវែងសរុប១៧៣,៨០គីឡូម៉ែត្រក្នុងនោះមាន សំណង់ក្បាលហុងទឹក០១កន្លែង សំណង់ទ្វារទឹក០១កន្លែង ធ្វើប្រឡាយមេចំនួន០១ខ្សែ មានប្រវែង១៦,៤០គីឡូម៉ែត្រ សាងសង់ប្រឡាយថ្នាក់ទី២ ចំនួន១៣ខ្សែស្មើនឹងប្រវែង៤២,៥០គីឡូម៉ែត្រ សាងសង់ប្រឡាយរំដោះទឹកចំនួន១៥ខ្សែស្មើនឹងប្រវែង៥២,៩០គីឡូម៉ែត្រ សាងសង់ប្រឡាយទឹកថ្នាក់ទី៣ចំនួន៩៣ខ្សែ មានប្រវែង៦២គីឡូម៉ែត្រ សាងសង់សំណង់សិល្បការសរុបចំនួន៥៥៧កន្លែង និងសាងសង់សំណង់អគារសហគមន៍កសិករ ប្រើប្រាស់ទឹកចំនួន០១កន្លែង។
លោកប្រធានមន្ទីរធនធានទឹកបានបញ្ជាក់ថា ប្រព័ន្ធធារាសាស្ត្រនេះ គឺជាជំនួយរបស់រាជរដ្ឋាភិបាលជប៉ុនកសាងដោយអង្គការចៃការជប៉ុនបានចាប់ផ្ដើមកសាងនៅក្នុងអំឡុងខែមិនា ឆ្នាំ២០១៧ គិតមកដល់ពេលនេះមានរយៈពេលជាង២ឆ្នាំហើយ ដែលនឹងអាចបញ្ចប់គម្រោងនៅក្នុង ខែធ្នូ ឆ្នាំ២០២០ខាងមុខនេះ ។ ដោយឡែកប្រព័ន្ធធារាសាស្ត្រនេះ មានប្រភពទឹកមកពីស្ទឹងអូររំចេក ធ្លាក់មកពីលើភ្នំគុក ដែលមានព្រុំប្រទល់ជាប់ខេត្តកំពង់ឆ្នាំងជាមួយខេត្តពោធិ៍សាត់ ។ ប្រព័ន្ធធារាសាស្ត្រនេះប្រសិនបើប្រជាពលរដ្ឋកែប្រែទម្លាប់ពីធ្វើស្រូវធ្ងន់មកធ្វើស្រូវកណ្តាលវិញ គឺអាចធ្វើស្រែបាន២ដងនៅក្នុងខែវស្សា ហើយអាចទទួលបានទិន្នផលបានទ្វេដងទៀតផង ។
លោកដោក ប៊ុនថុន សំណូមពរដល់ប្រជាកសិករជាអ្នកប្រើប្រាស់ទឹក និងអាជ្ញាធរមូលដ្ឋាន នៅក្នុងស្រុកទាំង៣ សូមមេត្តាជួយថែរក្សាការពារប្រព័ន្ធធារាសាស្ត្រ និងប្រឡាយមេ ប្រឡាយរងទាំងអស់ខាងលើនេះឲ្យមានគុណភាពល្អ ដើម្បីប្រើប្រាស់បានយូរអង្វែងរួមគ្នាអភិវឌ្ឍន៍កសិកម្មនៅក្នុងមូលដ្ឋានឲ្យទទួលបានទិន្នផលខ្ពស់ សម្រាប់ជួយដោះស្រាយជីវភាពរស់នៅអោយបានល្អប្រសើរ ៕ កែសម្រួលដោយ ៖ សុឃាក់
ចែករំលែកព័តមាននេះ