ប្រទេសថៃ ៖ ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃទី ២២ខែឧសភាកន្លងមកថា ធនាគារជាតិថៃបានឲ្យដឹងថា កំណើនភាពមិនប្រាកដប្រជាផ្នែកនយោបាយក្នុងប្រទេសថៃដែលកើតមានឡើងបន្ទាប់ពីការបោះឆ្នោតអាចនឹងប៉ះពាល់ដល់ទស្សនៈវិស័យគោលនយោបាយសេដ្ឋកិច្ច។
ការបោះឆ្នោតកាលពីថ្ងៃទី ២៤ខែមិនាកន្លងមកនេះមិនទាន់មានអ្នកឈ្នះពិតប្រាកដទេ ហើយវាជាការបោះឆ្នោតដំបូងតាំងពីការធ្វើរដ្ឋប្រហារដោយកងយោធាថៃក្នុងឆ្នាំ ២០១៤ មក។ យ៉ាងណាក្តី ប្រទេសថៃនៅតែចង់ឲ្យមានការរៀបចំរដ្ឋាភិបាលថ្មីដដែល។ មិនថាគណបក្សមួយណាទទួលបានកៅអីច្រើនជាងគេទេ រដ្ឋាភិបាលនេះនឹងមានភាពទន់ខ្សោយ។
យោងទៅតាមកំណត់ត្រាកិច្ចប្រជុំគណៈកម្មាធិការគោលនយោបាយរូបិយវត្ថុរបស់ធនាគារជាតិបានឲ្យដឹងថា “សេដ្ឋកិច្ចថៃកំពុងតែជួបប្រទះនឹងកំណើនភាពមិនប្រាកដប្រជាផ្នែកនយោបាយដែលអាចប៉ះពាល់ដល់ការលូតលាស់សេដ្ឋកិច្ចដូចជាប៉ះពាល់ផ្ទាល់ដល់ការចំណាយរបស់រដ្ឋាភិបាលក្នុងកំឡុងពេលខាងមុខ និងប៉ះពាល់ដល់ការចំណាយឯកជន និងជំនឿចិត្តវិនិយោគិនជាដើម។”
កំណត់ត្រាខាងលើបានឲ្យដឹងទៀតថា “វិនិយោគិនបន្តមានភាពប្រុងប្រយ័ត្នក្នុងការវិនិយោគលើទ្រព្យសម្បត្តិថៃដែលមួយផ្នែកគឺមកពីភាពមិនប្រាកដប្រជាផ្នែកនយោបាយក្នុងស្រុក។
យោងតាមទិន្នន័យដែលបានចេញកាលពីថ្ងៃអង្គារ៍បានឲ្យដឹងថាសេដ្ឋកិច្ចថៃលូតលាស់បាន ២.៨% កាលពីត្រីមាសទី១នាឆ្នាំនេះបើធៀបនឹងឆ្នាំមុន ដែលជាអត្រាទាបជាងគេក្នុងរយៈពេល៤ឆ្នាំមកហើយ។ ធនាគារជាតិធ្លាប់បានឲ្យដឹងពីមុនមកដែរថា ការលូតលាស់ក្នុងឆ្នាំនេះនឹងមានអត្រាទាបជាងការព្យាករណ៍ដែលស្មើ ៣.៨% ទៀតផង។
ដោយហេតុដូចនេះ គណៈកម្មាធិការខាងលើត្រូវតែរងចាំរហូតដល់មានភាពប្រាកដប្រជាជាងនេះព្រោះតែបច្ចុប្បន្នមានភាពមិនប្រាកដប្រជាច្រើនក្នុងផ្នែកសេដ្ឋកិច្ចពិភពលោក ព្រមទាំងនយោបាយក្នុងប្រទេសផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ