ខេត្តកំពង់ចាម ៖ មុខសញ្ញាក្រុមចោរឆក់កាបូបដ៏សកម្មចំនួន២នាក់ ត្រូវបានកម្លាំងសមត្ថកិច្ចគ្រប់លំដាប់ថ្នាក់តាមប្រមាញ់ស្រាវជ្រាវចាប់ខ្លួនបានហើយ ដោយបានធ្វើឡើងនៅថ្ងៃទី២៣ ឧសភា ២០១៩ តែចំពោះសម្ភារបាត់បង់របស់អ្នករងគ្រោះមាន លុយជិត៥០០ដុល្លារ រួមនឹងឯកសារមួយចំនួនទៀតមិនត្រូវបានដកហូតមកវិញឡើយ…
ខេត្តកំពង់ចាម ៖ មុខសញ្ញាក្រុមចោរឆក់កាបូបដ៏សកម្មចំនួន២នាក់ ត្រូវបានកម្លាំងសមត្ថកិច្ចគ្រប់លំដាប់ថ្នាក់តាមប្រមាញ់ស្រាវជ្រាវចាប់ខ្លួនបានហើយ ដោយបានធ្វើឡើងនៅថ្ងៃទី២៣ ឧសភា ២០១៩ តែចំពោះសម្ភារបាត់បង់របស់អ្នករងគ្រោះមាន លុយជិត៥០០ដុល្លារ រួមនឹងឯកសារមួយចំនួនទៀតមិនត្រូវបានដកហូតមកវិញឡើយ ។
តាមឧត្តមសេនីយត្រី ហេង វុទ្ធី ស្នងការរងនគរបាលខេត្តបានប្រាប់ឲ្យដឹងថា អ្នកគ្រូបង្រៀនម្នាក់ឈ្មោះអ៊ាប សេងលៀប អាយុ៤៦ឆ្នាំ នៅសង្កាត់វាលវង់ ក្រុងកំពង់ចាម បានជិះម៉ូតូនៅតាមដងផ្លូវ ដោយមានស្ពាយកាបូបពណ៌ក្រហម កាលពីវេលាម៉ោង៥ល្ងាច ថ្ងៃទី៨ ឧសភា ២០១៩ ដោយបានជិះមកដល់ត្រង់ចំនុចម្តុំផ្ទះសំណាយយាយពេញចិត្ត ក្នុងភូមិទី៤ សង្កាត់វាលវង់ ត្រូវបានក្រុមចោរឆក់កាបូបចំនួន២នាក់ ជិះមកឆក់យកទៅបាត់ ។
លោកឧត្តមសេនីយត្រី ហេង វុទ្ធី ស្នងការរងនគរបាលខេត្តបន្តថា ចំពោះសម្ភារដែលបាត់បង់ក្នុងកាបូបមានលុយចំនួន៤៧០ដុល្លារ ទូរស័ព្ទម៉ាក LG មួយគ្រឿង និងលុយខ្មែរចំនួនជាង១០ម៉ឺនរៀល អ្នករងគ្រោះបានដាក់ពាក្យបណ្តឹងនៅប៉ុស្តិ៍រដ្ឋបាលសង្កាត់វាលវង់ ឲ្យជួយអន្តរាគមន៍តាមចាប់ចោរឆក់២នាក់ដែលមិនស្គាល់អត្តសញ្ញាណ ។ ចំណែកសមត្ថកិច្ចមិនបាននៅស្ងៀមនោះទេ បានចុះទៅស្រាវជ្រាវភ្លាមៗ និងបានកំណត់មុខសញ្ញាទាំងនោះ តែពួកគេបានរត់គេចខ្លូនបាត់ រូបលោកបានបញ្ជាឲ្យនគរបាលបន្តតាមដាន និងរុករកមុខសញ្ញាឈ្មោះ ឈីត ភេទប្រុស អាយុប្រហែល២០ឆ្នាំ ជាអ្នកឌុប និងឈ្មោះ រ៉ា ភេទប្រុស អាយុប្រហែល១៧ឆ្នាំ អង្គុយពីក្រោយ រហូតមកដល់ថ្ងៃទី២៣ ឧសភា បានតាមស្វែងរកចាប់ខ្លួនបាន និងបញ្ជូនមកសួរនាំនៅអធិការដ្ឋាននគរបាលក្រុងកំពង់ចាម ដើម្បីចាត់ការតាមច្បាប់ ។
អ្នករងគ្រោះជាគ្រូបង្រៀនវិញបានប្រាប់ឲ្យដឹងដែរថា នៅល្ងាចថ្ងៃកើតហេតុនោះ គាត់បានជិះម៉ូតូតាមផ្លូវ ដើម្បីមកមើលកូនប្រុសកើតជំងឺគ្រុនឈាមសន្លប់នៅផ្ទះ មិនទាន់នឹងដល់ផង ត្រូវបានចោរ២នាក់ជិះម៉ូតូមកឆក់កាបូបយកទៅបាត់ដែលមានសម្ភារដូចខាងលើ ។ ហើយពេលដែលសមត្ថកិច្ចចាប់បានចោរ២នាក់នោះ គាត់ពិតជាសប្បាយរីករាយ និងស្នើសុំយករបស់បាត់បង់វិញផងដែរ ៕កែសម្រួលដោយ ៖ សុឃាក់
ចែករំលែកព័តមាននេះ