នៅក្នុងរូបកាយយើងនេះមានកម្លាំងពីរគឺ កម្លាំងចិត្តនិងកម្លាំងកាយ កម្លាំងទាំងពីរនេះមានមុខងារខុសគ្នា តែកម្លាំងចិត្តមានមុខនាទីសំខាន់ជាងកម្លាំងកាយ។ ខ្លួនប្រាណយើងត្រូវការកម្លាំំងចិត្តណាស់ បើកាលណាអស់កម្លាំងចិត្តហើយ ក្តីសង្ឃឹមក៏អស់ពេលនោះដែរ។
កម្លាំងចិត្តនេះមានសារសំខាន់បំផុតយើងតែងនិយាយខ្លួនឯង ឬឮគេនិយាយថា បើអស់កម្លាំងចិត្តហើយ រកធ្វើកិច្ចការអ្វីក៏មិនកើតដែរព្រោះតែបាក់ទឹកចិត្ត។ យើងធ្លាប់ឮ ធ្លាប់ឃើញហើយ អ្នកដែលធ្វើអត្តឃាតភាគច្រើនជាអ្នកដែលអស់កម្លាំងចិត្តក្នុងការតស៊ូក្នុងជីវិត បើទោះជាបុគ្គលនោះជាមនុស្សមានសុខភាពល្អ មានកម្លាំងពលំមាំមួនក៏ដោយ ។
ព្រះបរមសាស្តា លោកទ្រង់ញាណឃើញនូវសារប្រយោជន៍នៃកម្លាំងចិត្តដែលមានមុខនាទីសំខាន់ក្នុងជីវិត ជាពិសេសចំពោះអ្នកដឹកនាំដែលត្រូវទទួលភារៈធ្ងន់ក្នុងការគ្រប់គ្រងគេនោះ ទើបបានជាលោកដាក់កម្លាំងចិត្តជាគោល ជាទិសដៅមួយយ៉ាងសំខាន់ ក្នុងចំណោមគោលធម៌ទាំង១០នៃទសពិធរាជធម៌ សម្រាប់ឱ្យអ្នកដឹកនាំទាំងឡាយបដិបត្តិ ។
អ្នកប្រាជ្ញពោលថា អ្នកដែលមានកម្លាំងចិត្តក្នុងការប្រកបការងារ គឺអ្នកមានខន្តីនេះឯងជាពិសេស។ អស់ខន្តីពេលណា អស់ការអត់ធ្មត់ពេលណា អស់ការព្យាយាមពេលណា កម្លាំងចិត្តក៏អស់ពេលនោះ ការសមគួរនឹងទទួលផលក៏អស់ក្នុងពេលនោះដែរ ព្រោះហេតុនោះទើបលោកពោលថា កម្លាំងចិត្តមានមុខងារសំខាន់ជាងកម្លាំងកាយ ។
ចែករំលែកព័តមាននេះ