រាជធានីភ្នំពេញ ៖ ក្រោយពេលកើតហេតុ នគរបាលបានហៅអ្នកទាំង៤ទៅកាន់ប៉ុស្តិ៍កាកាប១ ដើម្បីដោះស្រាយគ្នា ហើយក្រោយពីការផ្ទៀងផ្ទាត់ឯកសារឃើញថា ឈ្មោះហៀង វីរៈ អាយុ៣៧ឆ្នាំ មានទីលំនៅភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ មានឯកសារពាក្យបណ្តឹង ដែលបានដាក់នៅក្រសួងមហាផ្ទៃ ពាក់ព័ន្ធនិងការសុំសិទ្ធិធ្វើជាម្ចាស់រថយន្ត ព្រមទាំងមានដីកាសម្រេចពីតុលាការ សុំប្រើប្រាស់រថយន្តមួយគ្រឿងខាងលើ ទើបខណៈនោះ នគរបាលសម្រេចប្រគល់រថយន្ត ឡិចសុីស RX300 មួយគ្រឿងនេះទៅឲ្យឈ្មោះ ហៀង វីរៈ ប្រើប្រាស់ជាបន្តទៀត ដើម្បីបញ្ចប់រឿង ។ ចំណែកបុរសនិងស្ត្រី៣នាក់ទៀត ដែលអះអាងថា ជាម្ចាស់រថយន្តនេះដែរ មិនសុខចិត្តយ៉ាងណានោះ សូមទៅតវ៉ាតាមផ្លូវច្បាប់នៅពេលក្រោយទៀតចុះ ។
គួរបញ្ជាក់ថា រថយន្តឡិចសុីសRX300មួយគ្រឿង ខណៈពេលដែលបុរសម្នាក់ កំពុងតែបើកបរតាមផ្លូវសុខៗ ស្រាប់តែមានមនុស្សប្រុស-ស្រីចំនួន៣នាក់ទៀតបានស្ទាក់ឃាត់ឲ្យឈប់ រួចបានដណ្ដើមគ្នាយករថយន្តនោះ ហើយពួកគាត់ម្នាក់ៗ សុទ្ធតែបានអះអាងថា គឺជាម្ចាស់រថយន្តនោះតែរៀងៗខ្លួនថែមទៀត
ផង ។
ជម្លោះដណ្តើមគ្នាបានបង្កឲ្យមានការប្រកែកគ្នាយ៉ាងតឹងសរសៃក ស្ទើរតែផ្ទុះហិង្សាដាក់គ្នាទៅហើយ ព្រោះតាមស្វែងរកយូរហើយ ស្រាប់តែឃើញព្រមគ្នា និងបានធ្វើឲ្យមានការភ្ញាក់ផ្អើលយ៉ាងខ្លាំងនៅតាមដងផ្លូវ ។ ចំណែកកម្លាំងនគរបាលខណ្ឌពោធិ៍សែនជ័យ ក៏បានចេញអន្តរាគមន៍ទប់ស្កាត់ខ្លាចមានអំពើហិង្សាកើតឡើង ព្រមទាំងនាំអ្នកទាំង៤ នោះទៅធ្វើការសាកសួរភ្លាមៗ ទើបដឹងថា អ្នកទាំងនោះសុទ្ធតែជាអ្នកចាញ់បោកក្រុមហ៊ុន ណំ ហម និង សេង ហួត ដែលជាក្រុមហ៊ុនមានថៅកែតែមួយ រកសុីជួល លក់និងទិញ រថយន្តបង់រំលស់ ។
ហេតុការណ៍នោះ បានកើតឡើងកាលពីវេលាម៉ោង៨ព្រឹកថ្ងៃទី២២ ឧសភា នៅតាមមហាវិថីសហព័ន្ធរុស្សុី ចំណុចមុខអាកាសយានដ្ឋានអន្តរជាតិភ្នំពេញ ស្ថិតនៅក្នុងភូមិក្បាលដំរី១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ។ រថយន្តម៉ាកឡិចសុីស RX300 មួយគ្រឿងនោះពណ៌ខ្មៅ ពាក់ស្លាកលេខ ភ្នំពេញ 2P-6210 បើកបរដោយបុរសម្នាក់ឈ្មោះ ហៀង វីរៈ អាយុ៣៧ឆ្នាំ មានទីលំនៅ ភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ ។
នគរបាលបានឲ្យដឹងថា មនុស្ស១ក្រុមដែលចេញមុខមកដណ្ដើមរថយន្តគ្នានោះគឺសុទ្ធតែជាជនរងគ្រោះចាញ់បោកក្រុមហ៊ុន ណំ ហម និង សេងហួត ដែលជាក្រុមហ៊ុនដែលមានថៅកែតែមួយរកសុី ជួល លក់និងទិញរថយន្តបង់រំលស់មិនប្រក្រតី ។ ក្រុមហ៊ុនមួយនេះរកសុីធ្វើនំអត់ម្សៅដែលល្បីខាងឆបោកបានរាប់សិបម៉ឺនដុល្លារពីអតិថិជន ដែលមានអ្នកចាញ់បោករាប់រយនាក់រួចមកហើយ ចំពោះអ្នកដែលទិញរថយន្តពីក្រុមហ៊ុនមួយនេះ ខាតបង់ប្រាក់ឥតប្រយោជន៍មិនដែលបានរថយន្តប្រើឡើយ។ មិនតែប៉ុណ្ណោះប្រធានក្រុមហ៊ុន មួយនេះជាមន្ត្រីយោធាហើយត្រូវបានចាប់ខ្លួនកាលពីពេលថ្មីៗកន្លងមកនេះ និងកំពុងជាប់ឃុំនៅពន្ធនាគារព្រៃសក្នុងរឿងឆបោក ។
ទាក់ទិននឹងរថយន្ត១គ្រឿងខាងលើនេះ ត្រូវបានក្រុមហ៊ុននោះយកទៅលក់ឲ្យអ្នកទាំង៤នាក់ គឺលក់ពីមួយទៅមួយ ទើបទីបំផុតមានរឿងបែបនេះផ្ទុះឡើងតែម្ដង ។ ស្ត្រីចំណាស់ម្នាក់បាននិយាយថា អ្នកស្រីគឺជាម្ចាស់រថយន្តនេះ ត្រូវបានក្រុមហ៊ុនជួល លក់ និងទិញរថយន្តបង់រំលស់ ណំ ហម នៅសង្កាត់គោកឃ្លាង ខណ្ឌសែនសុខ ជួលពីអ្នកស្រីកាលពីពេលកន្លងមក ។ ប៉ុន្តែក្រោយពេលជួលរួច ស្រាប់តែបាត់រថយន្តរកមិនឃើញឡើយ ដោយក្រុមហ៊ុនមួយនេះ បានយករថយន្តរបស់អ្នកស្រីទៅលក់បង់រំលស់ឲ្យអ្នកផ្សេងពីម្នាក់ទៅម្នាក់បាត់ស្រមោល ។
ពេលនោះអ្នកស្រីបានព្យាយាមទាក់ទងសួរនាំទៅខាងក្រុមហ៊ុនដែរ ប៉ុន្តែទាក់ទងមិនបានសោះ រហូតក្រោយមកឮដំណឹងថា ជនឆបោក ឈ្មោះសេង សុភគ៌ ដែលជាអគ្គនាយកក្រុមហ៊ុននេះ ត្រូវសមត្ថកិច្ចចាប់ខ្លួនរឿងឆបោកប្រាក់ពីអតិថិជនរាប់សិបម៉ឺនដុល្លារ ។ ទោះជាបែបនេះក្ដី គាត់នៅតែតាមស្រាវជ្រាវស្វែងរករថយន្តនេះដដែល ។ លុះដល់វេលាព្រឹកថ្ងៃកើតហេតុស្រាប់តែឃើញរថយន្តគាត់ត្រូវបុរសម្នាក់បើកបរទើបឃាត់សួរនាំ ហើយក៏លេចមុខមនុស្ស២នាក់ទៀតទៅអះអាងថា រថយន្តនេះក៏ជារបស់ខ្លួនដែរ ។
ដោយឡែកបុរស២នាក់ទៀត បានអះអាងដូចៗគ្នាថាពួកគាត់គឺជាម្ចាស់រថយន្តឡិចសុីសមួយគ្រឿងនោះដែរ ដោយពួកគាត់បានទិញបង់រំលស់ពីក្រុមហ៊ុន សេង ហួត ដែលមានអគ្គនាយកឈ្មោះ សេង សុភគ៌ មានទីតាំងនៅ ផ្ទះជួល៦២៧ តាមផ្លូវលំ ភូមិជ្រៃកោង សង្កាត់ចោមចៅ២ ខណ្ឌពោធិសែនជ័យ ។ ក្នុងនោះពួកគាត់ម្នាក់ៗ បង់រំលស់មុន១មុឺនដុល្លាទៅហើយ ប៉ុន្តែបានឃើញរថយន្តតែមួយភ្លែតប៉ុណ្ណោះ ត្រូវបានក្រុមហ៊ុនមួយនេះប្រាប់ថា យករថយន្តទៅត្រួតពិនិត្យប្រព័ន្ធGPS រួចក៏យកទៅបាត់រហូតតែម្ដង ទើបតែពេលនេះប្រទះឃើញរថយន្តត្រូវម្ចាស់ផ្សេងបើកបរទៅវិញ ។
ចែករំលែកព័តមាននេះ