រាជធានីភ្នំពេញ ៖ រថយន្តស៊េរីទំនើបមួយគ្រឿងម៉ាក BMW ក្រពិតមុខរងការខូចខាតយ៉ាងដំណំ ដោយសារតែបុរសម្នាក់បានបើកម៉ូតូមួយគ្រឿងម៉ាកនិកទៅបុកចំពីមុខពេញទំហឹង ហើយបុរសជាអ្នកបើកបរម៉ូតូបានរត់គេចខ្លួនបាត់ស្រមោល ។
ក្រោយគ្រោះថ្នាក់ចរាចរណ៍ខាងលើកើតឡើង សមត្ថកិច្ចបានមកដល់កន្លែងកើតហេតុ និងរាយការណ៍ពីភិនភាគម៉ូតូបង្កខាងលើ ស្របពេលនោះមាននារីម្នាក់បានមកដាក់ពាក្យបណ្តឹងថាបានបាត់ម៉ូតូមួយគ្រឿងផងដែរ ទើបដឹងថា បុរសជាអ្នកបើកបរម៉ូតូខាងលើ គឺជាជនសង្ស័យដែលបានធ្វើសកម្មភាពលួចកាច់កម៉ូតូរបស់នារីរងគ្រោះនៅម្តុំផ្សារទួលទំពូង ហើយបើកម៉ូតូគេចខ្លួន រួចក៏បុកចំពីមុខរថយន្តស៊េរីទំនើបមួយគ្រឿងខាងលើតែម្តង។
ហេតុការណ៍ខាងលើបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង១២និង១៥ នាទីថ្ងៃត្រង់ថ្ងៃទី២៣ ខែឧសភា ឆ្នាំ២០១៩ នៅចំណុចមុខផ្ទះលេខ១៦៨ ផ្លូវលេខ១០៥ (តាមបណ្តោតមាត់ប្រឡាយ បឹងត្របែក) ក្នុងសង្កាត់បឹងត្របែក ខណ្ឌចំការមន។
តាមប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុ មានរថយន្តស៊េរីទំនើបមួយគ្រឿងម៉ាក BMW ពណ៌ខ្មៅ ពាក់ស្លាកលេខ ភ្នំពេញ ២AQ-០០៨៨ ដែលបើកបរដោយបុរសម្នាក់កំពុងបើកដឹកកូនមេរបស់ខ្លួន ធ្វើដំណើរតាមបណ្តោយផ្លូវលេខ១០៥ ស្របមាត់ប្រឡាយបឹងត្របែក ក្នុងទិសដៅពីត្បូងទៅជើង។
តាមប្រភពដដែលបានបន្តថា លុះពេលរថយន្តម៉ាក BMW បើកមកដល់ចំណុចកើតហេតុខាងលើ ក៏ស្រាប់តែមានម៉ូតូមួយគ្រឿងម៉ាកនិក ព៌ណស ពាក់ស្លាកលេខ ភ្នំពេញ ១GI-៥៩២១ បើកបរដោយបុរសមិនស្គាល់អត្តសញ្ញាណម្នាក់ បើកបោះពួយក្នុងល្បឿនយ៉ាងលឿនក្នុងទិសដៅពីជើងទៅត្បូង បញ្ច្រាសទិសគ្នា ក៏ទៅបុករថយន្ត BMW ចំខាងមុខផ្នែកឆ្វេងយ៉ាងពេញទំហឹង បណ្តាលអោយរថយន្តក្រពិតផ្នែកខាងមុខរងការខូចខាតយ៉ាងដំណំ ហើយអ្នកបើកបរបានរត់គេចខ្លួនបាត់ស្រមោលតែម្តង។
តាមប្រភពដដែលបានប្រាប់បន្តទៀតថា ក្រោយពីកើតមានករណីគ្រោះថ្នាក់ចរាចរណ៍រវាងម៉ូតូបុកជាមួយនឹងរថយន្តស៊េរីទំនើបមួយគ្រឿងខាងលើ ហើយភាគីខាងម៉ូតូរត់គេចខ្លួនទៀតនោះ កម្លាំងសមត្ថកិច្ចមូលដ្ឋានក៏បានចុះទៅដល់កន្លែងកើតហេតុ និងធ្វើសេចក្តីរាយការណ៍ប្រាប់ថ្នាក់លើតាមវិទ្យុទាក់ទង និងរៀបរាប់ប្រាប់ពីភិនភាគម៉ូតូបង្កផងដែរ។
ស្របពេលដែរ ក៏មាននារីជាបុគ្គលិកលក់ខោអាវរងគ្រោះម្នាក់កំពុងតែមកដាក់ពាក្យបណ្តឹងនៅនគរបាលប៉ុស្តិ៍ទួលទំពូងទី១ ដោយម៉ូតូមួយគ្រឿងម៉ាកនិក របស់នារីរងគ្រោះ ត្រូវបានជនសង្ស័យលួចកាច់កនៅពីខាងមុខហាងលក់ខោអាវជជុះមួយកន្លែង ដែលមានទីតាំងនៅផ្លូវ៤៥៤ ក្បែរផ្សារទួលទំពូង យកទៅបាត់មុននេះ ។
លុះពេលនារីរងគ្រោះទៅមើលនៅកន្លែងកើតហេតុទើបដឹងថាជាម៉ូតូរបស់នាងដែលបានបាត់ពិតប្រាកដមែន ហើយម៉ូតូនោះក៏រងការខូចខាតយ៉ាងខ្លាំងផងដែរ។
ក្រោយពេលកើតហេតុ កម្លាំងមានសមត្ថកិច្ចក៏បានយកម៉ូតូម៉ាកមួយគ្រឿងម៉ាកនិកដែលត្រូវបានជនសង្ស័យធ្វើសកម្មភាពលួចកាច់កខាងលើនោះយកទៅកាន់នគរបាលប៉ុស្តិ៍ទួលទំពូងទី១ ជាកន្លែងកើតហេតុ ដើម្បីធ្វើកំណត់ហេតុ និងប្រគល់ទៅអោយនារីរងគ្រោះជាម្ចាស់វិញចំណែកភាគីខាងម្ចាស់រថយន្តស៊េរីទំនើបម៉ាក BMW ក៏បានមកដាក់ពាក្យបណ្តឹងដើម្បីដាក់បន្ទុកទៅលើជនសង្ស័យដែលធ្វើអោយរថយន្តរបស់គាត់រងការខូចខាតផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ