ប្រធានមន្ទីរចូលនិវត្តន៍…កូនប្រុសជាអនុប្រធានឡើងជំនួសវិញ
- មណ្ឌលគិរី
ខេត្តមណ្ឌលគិរី ៖ មហាជនបានសម្តែងការភ្ញាក់ផ្អើលកាលពីព្រឹកថ្ងៃទី២១ ខែឧសភា កន្លងទៅ ក្រោយពេលលោក វង សូត រដ្ឋមន្ត្រី ក្រសួងសង្គមកិច្ច…
ខេត្តមណ្ឌលគិរី ៖ មហាជនបានសម្តែងការភ្ញាក់ផ្អើលកាលពីព្រឹកថ្ងៃទី២១ ខែឧសភា កន្លងទៅ ក្រោយពេលលោក វង សូត រដ្ឋមន្ត្រី ក្រសួងសង្គមកិច្ច អតីតយុទ្ធជន និងយុវនីតិសម្បទា ប្រកាសឲ្យលោក ខឹម សុផុន មានមុខងារជាអនុប្រធានមន្ទីរ ចូលកាន់មុខតំណែងជាប្រធានមន្ទីរសង្គមកិច្ច អតីតយុទ្ធជន និងយុវនិតិសម្បទាខេត្តមណ្ឌលគិរី បន្ទាប់ពីលោក ខឹម ចាន់ផល ប្រធានមន្ទីរចាស់ត្រូវចូលនិវត្តន៍ ។ លោក គឹម ចាន់ថុល ប្រធានមន្ទីរចូលនិវត្តន៍គឺជាឪពុករបស់លោក ខឹម សុផុន ដែលត្រូវទទួលតំណែងស្នងឪពុក ។
នៅព្រឹកថ្ងៃប្រកាសចូលកាន់តំណែងជាប្រធានមន្ទីរសង្គមកិច្ចថ្មី ក៏មានការអបអរសាទរជាខ្លាំងពីក្រុមគ្រួសាររបស់លោក ខឹម សុផុន និង លោក ខឹម ចាន់ផល ខុសប្លែកតែនៅតាមតុកាហ្វេមានការឆ្លងឆ្លើយគ្នាពីមាត់មួយទៅមាត់មួយថា ចុះបុណ្យគេអីក៏សំណាងម្ល៉េះ ឪពុកចូលនិវត្តន៍ កូនឡើងជំនួសតំណែងឪ…ឬមកពីខេត្តមណ្ឌលគិរីនេះខ្វះធនធានមនុស្សសម្រាប់បម្រើការងារ?តែក៏មានមាត់ចាបមាត់ព្រាបខ្លះលើកឡើងថា មិនឲ្យកូនអង្គុយកៅអីឪ តើឲ្យនរណាវិញ បើកាលឪនៅជាប្រធានមន្ទីរ កូនអនុប្រធានទៅហើយនោះ ។
លោក ខឹម សុផុន ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត បានឡើងប្តេជ្ញាចិត្តអនុវត្តយ៉ាងខ្ជាប់ខ្ជួននូវលិខិតបទដ្ឋាននានារបស់រាជរដ្ឋាភិបាល ខិតខំអស់ពីកម្លាំងកាយចិត្ត ស្មារតីបំពេញការងារឱ្យទទួលបានជោគជ័យ តាមគោលនយោបាយរបស់ក្រសួងសង្គមកិច្ច អតីតយុទ្ធជន និងយុវនិតីសម្បទា អនុវត្តនូវអនុសាសន៍ណែនាំរបស់ថ្នាក់ដឹកនាំខេត្ត និងក្រសួង ។ បន្តលើកកម្ពស់ស្មារតីសាមគ្គីភាពផ្ទៃ
ក្នុង និងមានទំនាក់ទំនងសហប្រតិបត្តិការល្អជាមួយស្ថាប័នក្នុងអង្គភាព ក៏ដូចជាស្ថាប័នដទៃ និងត្រូវខិតខំរៀនសូត្រដកស្រង់បទពិសោធន៍ ចំណេះដឹងថ្មីបន្ថែមទៀត ដើម្បីឆ្លើយតបតាមតម្រូវការដែលប្រទេសជាតិកំពុងមានការរីកចម្រើន ។
លោករដ្ឋមន្ត្រី វង សូត ថ្លែងថា បច្ចុប្បន្ននេះ រាជរដ្ឋាភិបាលកម្ពុជាបានដាក់ចេញគោល នយោបាយជាច្រើន ជាពិសេសគោលនយោបាយគាំពារសង្គម ដើម្បីជួយដល់ស្ត្រីមានផ្ទៃពោះ ដែលជាជនក្រីក្រ ហើយថវិកានេះផ្តល់ជូនតាមរយៈមន្ទីរសុខាភិបាលរាជធានី/ខេត្ត ដើម្បីផ្តល់ជូនដោយផ្ទាល់ដល់ស្ត្រីមានផ្ទៃពោះ និងឆ្លងទន្លេនៅតាមមន្ទីរពេទ្យរដ្ឋ ។ លោករដ្ឋមន្ត្រី ក៏បានណែនាំដល់លោកប្រធានមន្ទីរថ្មី ត្រូវបន្តសហការគ្នាជាមួយស្ថាប័ននានា ជាពិសេសត្រូវរក្សាសាមគ្គីភាពផ្ទៃក្នុង មានទំនាក់ទំនងល្អជាមួយស្ថាប័នដទៃ ដើម្បីបំពេញការងារទៅតាមភារកិច្ចរបស់រាជរដ្ឋាភិបាល ក៏ដូចជាថ្នាក់ដឹកនាំខេត្តប្រគល់ជូន ៕
ចែករំលែកព័តមាននេះ