ប្រទេសលីប៊ី ៖ ការប្រយុទ្ធគ្នាមានការកើនឡើងកាលពីថ្ងៃទី២១ឧសភា នៅភាគខាងត្បូងក្រុងទ្រីប៉ូលីរដ្ឋធានីលីប៊ី ខណៈបេសកជនអ.ស.បសម្រាប់លីប៊ី លោកGHASSAN SALAMEបានព្រមាននៅមុខក្រុមប្រឹក្សាសន្តិសុខ ពីការចាប់ផ្ដើមឈានទៅរកសង្គ្រាមបង្ហូរឈាមរយៈពេលយូរអង្វែងក្នុងប្រទេសដែលហែកហួរនោះ ក្រោយការផ្ដួលរំលំរបបលោកមូអាម៉ាកាដាហ្វីដោយសារបដិវត្តន៍ពណ៌អារ៉ាប់និងអន្តរាគមន៍របស់ពួកលោកខាងលិចមក។
ជាង៦សប្ដាហ៍បន្ទាប់ពីការចាប់ផ្ដើមវាយលុកលើក្រុងទ្រីប៉ូលី របស់សេនាប្រមុខKHALIFA HAFTAR បុរសខ្លាំងភាគខាងកើតប្រទេស ជាប្រមុខនៃកងទ័ពជាតិលីប៊ីប្រកាសដោយខ្លូនឯង កងកម្លាំងរដ្ឋាភិបាលរួបរួមជាតិទទួលស្គាល់ដោយសហគមន៍អន្តរជាតិ បានវាយទប់ទល់និងវាយបកវិញ។ លោកGHASSAN SALAMEនិយាយថា ការប្រយុទ្ធគ្នានេះនឹងអាចនាំទៅរកការបែកបាក់គ្នាជាអចិន្រៃ្តយ៍ក្នុងប្រទេសនេះ។ លីប៊ីកំពុងឈានធ្លាក់ចូលក្នុងសង្គ្រាមសីុវិលមួយ។ ម្យ៉ាងទៀតលោកស្នើដល់ក្រុមប្រឹក្សាសន្តិសុខអ.ស.ប ឲ្យបញ្ឈប់ការបង្ហូរអាវុធពីប្រទេសនានា ចូលក្នុងប្រទេសនោះពេលការប្រយុទ្ធគ្នា កំពុងតែមានសភាពខ្លាំងក្លានៅភាគខាងត្បូងក្រុងទ្រីប៉ូលី។
ការបាញ់កាំភ្លើងធំធុនធ្ងន់ត្រូវបានស្ដាប់ឮ ដល់កណ្ដាលរដ្ឋធានី ដែលនោះជាការប៉ះទង្គិចគ្នាយ៉ាងខ្លាងក្លាបំផុត ចាប់តាំងពីដើមខែរ៉ាម៉ាដានពីថ្ងៃទី៦ឧសភាមក។ ការប៉ះទង្គិចគ្នាកើតមានជាពិសេស ក្នុងសង្កាត់សាឡាហីុដឌីន ជាយក្រុងទ្រីប៉ូលីភាគខាងត្បូង ដែលនៅទីនោះកងកម្លាំងរបស់រដ្ឋាភិបាលរួបរួមជាតិ ហាក់មានប្រៀបនៅលើទីលានប្រយុទ្ធ។ បណ្ដាអ្នកកាសែតបរទេសអាចចូលទៅកាន់រណសិរ្សកាលពីថ្ងៃទី២១ឧសភា ហើយកត់សម្គាល់ឃើញការវាយរុលទៅមុខ បានពី២ទៅ៣គីឡូម៉ែត្ររបស់កងកម្លាំងរដ្ឋាភិបាលរួបរួមជាតិក្នុងសង្កាត់នោះ។
តាំងពីចាប់ផ្ដើមការវាយលុករបស់កងកម្លាំងសេនាប្រមុខHAFTAR លើក្រុងទ្រីប៉ូលីពីថ្ងៃទី៤មេសាមក មនុស្សជាង៥១០នាក់ហើយបានត្រូវស្លាប់និងយ៉ាងតិច២៤៦៧នាក់រងរបួស។ នេះបើតាមតុល្យការចេញផ្សាយកាលពីថ្ងៃទី២០ឧសភាដោយអង្គការសុខភាពពិភពលោក។ រួចបើយោងតាមអ.ស.បថា មនុស្សជាង៧៥.០០០នាក់ត្រូវបង្ខំចិត្តរត់ភៀសខ្លួនហើយជាង១០០.០០០នាក់ជាប់ក្នុងរង្វង់ការប្រយុទ្ធគ្នានៅតាមច្រកចូលក្រុងទ្រីប៉ូលី។
ទោះបីមានការហ៊ុមព័ទ្ធអាវុធសម្រាប់ប្រទេសនោះក្ដី តែតាំងពីចាប់ផ្ដើមការប្រយុទ្ធគ្នាមកគេឃើញអាវុធនានា បានហូរចូលសម្រាប់ភាគីច្បាំងគ្នាទាំង២។ កងកម្លាំងរបស់សេនាប្រមុខ HAFTAR ជួយគាំទ្រជាពិសេសដោយអេមីរ៉ាត់អារ៉ាប់រួមនិងអេហ្ស៊ីប ហើយកងកម្លាំងរដ្ឋាភិបាលរួបរួមជាតិគាំទ្រដោយតួកគីនិងកាតា៕ (កែសម្រួលដោយ ៖ បុប្ផា)
ចែករំលែកព័តមាននេះ