ព្រៃវែង ៖ បន្លែសរីរាង្គបាននឹងកំពុងដើរតួនាទីយ៉ាងសំខាន់ក្នុងការទ្រទ្រង់សុខភាពរបស់អ្នកទទួលទាន យ៉ាងណាមិញកសិកររស់នៅលើកោះមួយក្នុងទឹកដីខេត្តព្រៃវែង ដែលជាទីកន្លែងផ្គត់ផ្គង់បន្លែសរីរាង្គ (organic) រាប់តោនក្នុងមួយថ្ងៃ រំពឹងថាតំបន់កោះបៃតងរបស់ខ្លួន នឹងត្រូវបានអភិវឌ្ឍឲ្យក្លាយទៅជាផលិតផលទេសចរណ៍ថ្មីមួយដើម្បីទាក់ទាញទេសចរជាតិ-អន្តរជាតិទៅលេងកំសាន្ត និងជួយសម្រួលដល់សេដ្ឋកិច្ចគ្រួសាររបស់សហគមន៍បានមួយកម្រិតទៀតផង ។
កសិករដែលជាម្ចាស់ចំការបន្លែសរីរាង្គលើកោះពាមរាំង ដែលជាកោះមួយដែលស្ថិតនៅក្នុងទន្លេមេគង្គ ក្នុងភូមិសាស្ត្រឃុំកោះចេក ស្រុកពាមជរ ខេត្តព្រៃវែង និង ពីមុនមិនសូវមានអ្នកស្គាល់កោះប៉ុន្មានទេ ប៉ុន្តែមួយរយៈពេលចុងក្រោយនេះ ដោយមានការជួយជ្រោមជ្រែងពីអាជ្ញាធរខេត្ត និងមន្ទីរកសិកម្មខេត្តបានធ្វើអោយកោះនេះក្លាយទៅជាសួនបន្លែដ៏ស្រស់បំព្រង និងជាតំបន់នាំចេញបន្លែបន្លែសរីរាង្គដ៏សំខាន់មួយរបស់ខេត្តផងដែរ។ ជួបជាមួយអ្នកយកពត៌មានកោះសន្តិភាព កសិករនៅកោះពាមរាំងបាននិយាយថា មុខផ្ទះរបស់គាត់ពីមុនទុកចោលគ្មានដាំអ្វីទេ តែឥឡូវបានវាំងស្បៃមុងជុំវិញ ធ្វើថ្នាលបណ្តុះកូនស្ពៃ កូនសាឡាត់ បណ្តើរៗហើយដោយសារមានអ្នកជំនាញបច្ចេកទេសកសិកម្មមកបង្រៀន ហើយបន្លែដែលដាំបានមានអ្នកមកប្រមូលទិញដល់ផ្ទះតែម្តង ក្នុងតម្លៃគួរសម មិនពិបាកខ្លាចគ្មានទីផ្សារដូចមុនទៀតទេ។
កសិករដដែលនេះបានបន្តថា កាលពីមុននៅលើកោះនេះ កុំថាឡើយដាំបន្លែលក់ គ្រាន់តែដាំហូបខ្លួនឯងក៏សឹងមិនគ្រប់ផង ដោយសារបញ្ហាបច្ចេកទេស ប៉ុន្តែពេលនេះគឺខុសពីមុនឆ្ងាយណាស់ នៅតាមផ្ទះនិងតាមវាលនិមួយៗសុទ្ធតែបន្លែខៀវស្រង៉ាត់ ដោយសារបានឆ្លងកាត់វគ្គបណ្តុះបណ្តាលបច្ចេកទេស ពីមន្ត្រីជំនាញកសិកម្មខេត្ត ពេលនេះពួកគាត់មានចំណេះដឹងច្រើនក្នុងការដាំដុះបន្លែ ពេលមេឃក្តៅខ្លាំងរងបន្លែត្រូវគ្រប់ស្បៃ មានពោងទឹក និងប្រពន្ធ័ស្រោចស្របបែបទំនើប ធ្វើអោយបន្លែមានទឹកគ្រប់គ្រាន់ គួបផ្សំនិងការប្រើប្រាស់ជីធម្មជាតិបានត្រឹមត្រូវថែមទៀត ធ្វើអោយបន្លែលូតលាស់បានល្អ មិនចាស់បន្លែប្រើប្រាស់ជីគីមី ដែលនាំចូលពីប្រទេសជិតខាងនោះទេ។
ប្រជាកសិករទាំងនេះបានបញ្ជាក់ថា កោះពាមរាំងនេះ ក្រៅពីមន្ទីរកសិកម្មខេត្តចុះមកបង្រៀនបច្ចេកទេសកសិកម្ម និងផ្តល់ពោងទឹក ក៏មានអង្គការក្រៅរដ្ឋាភិបាលមួយចំនួនបានចុះមកជួយជាសម្ភារៈ និងបច្ចេកទេសផងដែរ ជាហេតុធ្វើអោយពួកគាត់មានលទ្ធភាពអាចពង្រីកផ្ទៃដីដាំដុះ និងផលិតបន្លែនាំចេញទៅលក់លើទីផ្សារបានក្នុង១ថ្ងៃពី១តោនទៅ២តោនឯណោះ ហើយឆ្នាំក្រោយៗទៀតពួកគាត់រំពឹងថានិងអាចផលិតបានលើសនេះទ្វេដងទៀតផង។
លោក អ៊ុក សំណាង ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រៃវែង មានប្រសាសន៍ថា នៅកោះពាមរាំងនេះ មន្ទីរកសិកម្មខេត្តបានស្នើសុំថវិកាជាតិជាច្រើន ទិញពោងទឹកចែកជូនដល់កសិករ ហើយនៅទូទាំងប្រទេសនេះគឺជាលើកទី១ហើយ ដែលមានការស្នើសុំបែបនេះដើម្បីផ្តល់ទឹកស្រោចស្របដំណាំ បន្លែរបស់កសិករ។ លោកប្រធានមន្ទីរបានបន្តទៀតថា កោះពាមរាំង មានពលរដ្ឋជាង៣០០គ្រួសារ មានផ្ទៃដីដាំដុះរាប់ពាន់ហិកតា ។
លោក អ៊ុក សំណាង មានប្រសាសន៍បន្តថា «នៅពេលខាងមុខ បើកសិករទាំងអស់នេះប្រឹងពង្រឹងខ្លួនឯង លើសពីការដាំបន្លែនាំចេញ ធ្វើឲ្យទីនេះក្លាយទៅជាតំបន់អេកូទេសចរណ៍ ដែលអាចអោយភ្ញៀវទេសចរណ៌ជាតិ អន្តរជាតិ អាចចូលមកទស្សនាកំសាន្តទេសភាពដ៏ស្រស់ត្រកាល នៃបន្លែសរីរាង្គពណ៌បៃតងខ្ចី ព្រមជាមួយការទទួលទានអាហារត្រីសាច់ផ្ទាប់ជាមួយបន្លែស្រស់ៗនៅតាមឆ្នេរមាត់ទន្លេដ៏ស្រស់ស្អាត នោះកោះមួយនេះនិងអាចក្លាយទៅជា កោះឋានសួគ៌ របស់អ្នកទេសចរណ៌ និងក៏ជាប្រភពផ្តល់ប្រាក់ចំណូលដ៏ច្រើន សំរាប់អ្នកស្រុកនៅលើកោះនេះដែរ» ។
យ៉ាងណាមិញប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រៃវែង បានបញ្ជាក់ថាដើម្បីប្រែក្លាយតំបន់កោះខាងលើឲ្យក្លាយជាទិសដៅទេសចរណ៍បៃតង គឺការងារនេះ ទាមទារឲ្យមានការជួយជ្រុំជ្រែងខ្លាំងពីសំណាក់អាជ្ញាធរ និងមន្ទីរជំនាញពាក់ពន្ធ័ផងដែរ ជាពិសេសគឺមន្ទីរទេសចរណ៌ខេត្តតែម្តង៕ (កែសម្រួលដោយ ៖ សុឃាក់)
ចែករំលែកព័តមាននេះ