រាជធានីភ្នំពេញ ៖ សង្គ្រាមពាណិជ្ជកម្មនិងបច្ចេកវិទ្យារវាងមហាអំណាចពីរគឺសហ រដ្ឋអាមេរិក និងចិន កំពុងតែក្តៅគគុកនិងធ្វើឲ្យពិភពលោកជ្រួលច្របល់ ។ ជាមួយគ្នានេះផងដែរ គេកត់សម្គាល់ឃើញថាសង្គ្រាមពាណិជ្ជកម្មរវាងលោកប្រធានាធិបតីអាមេរិក ដូណាល់…
រាជធានីភ្នំពេញ ៖ សង្គ្រាមពាណិជ្ជកម្មនិងបច្ចេកវិទ្យារវាងមហាអំណាចពីរគឺសហ រដ្ឋអាមេរិក និងចិន កំពុងតែក្តៅគគុកនិងធ្វើឲ្យពិភពលោកជ្រួលច្របល់ ។ ជាមួយគ្នានេះផងដែរ គេកត់សម្គាល់ឃើញថាសង្គ្រាមពាណិជ្ជកម្មរវាងលោកប្រធានាធិបតីអាមេរិក ដូណាល់ ត្រាំ និងទីក្រុងប៉េកាំងរបស់លោកប្រធានាធិបតីចិន លោក ស៊ី ជីនពីង ក៏បានរាលដាលអ្នកលក់រាយអាមេរិកដូចជា ក្រុមហ៊ុន Nike និង Adidas ព្រោះបញ្ជីពន្ធគយថ្មីនឹងធ្វើឱ្យប៉ះពាល់ដល់អ្នកប្រើប្រាស់ ហើយពួកគេបានព្រមាននឹងបញ្ជូនរោងចក្រកាត់ដេរ និងស្បែកជើងទៅប្រទេសដទៃនៅក្នុងតំបន់ដូចជាវៀតណាមជាដើម។
អ្នកចែកចាយ និងលក់រាយស្បែកជើងអាមេរិក (FOOTWEAR DISTRIBUTORS & RETAILERS OF AMERICA = FDRA) ដែលជាអង្គភាពពាណិជ្ជកម្មឧស្សាហកម្ម លក់រាយបានឲ្យដឹងថា មានអ្នកលក់រាយស្បែកជើងជាង ១៧០ រួមទាំងក្រុមហ៊ុន Nike, Under Armor, Adidas, Foot Locker, Ugg និង Off Broadway Shore Warehouse បានសរសេរសំបុត្រទៅសេតវិមានស្នើសុំឱ្យលោកប្រធានាធិបតី ដូណាល់ ត្រាំ ពិចារណាបញ្ឈប់ការដំឡើងពន្ធលើស្បែកជើងដែលនាំចូលពីប្រទេសចិន ដោយហៅការផ្លាស់ប្តូរបែបនេះអាចបង្កការខូចខាតដល់ក្រុមហ៊ុននានា។
FDRA បានសរសេរនៅក្នុងលិខិតដោយបញ្ជាក់ថា «ពន្ធបន្ថែមនឹងគំរាមកំហែងដល់ភាពជោគជ័យ នៃសេដ្ឋកិច្ចរបស់ក្រុមហ៊ុនជាច្រើន នៅក្នុងឧស្សាហកម្មរបស់យើង» ។
កាលពីសប្តាហ៍មុនលោក ដូណាល់ ត្រាំ បានចេញបញ្ជីពន្ធថ្មីមួយដែលមានតម្លៃ ៣០០ពាន់លានដុល្លារលើទំនិញចិន ដែលអាចស្មើនិងចំនួន២៥ភាគរយ ដែលរួមមានទំនិញស្បែកជើង។ ក្រុមអ្នកវិភាគនិយាយថា ប្រសិនបើពន្ធគយនេះដាក់ចូលជាធរមាន ក្រុមហ៊ុនឧស្សាហកម្មកាត់ដេរពួកគេ នឹងមិនមានជម្រើសទេក្រៅតែពីស្វែងរកកន្លែង ផលិតកម្មជំនួសដូចជានៅប្រទេសកម្ពុជា វៀតណាម និងមីយ៉ាន់ម៉ា។
យ៉ាងណាមិញ លោកអាល់ប៊ើត តាន់ ហេរញ្ញិកនៃសមាគមរោងចក្រកាត់ដេរនៅកម្ពុជា (GMAC) ដែលតំណាងឱ្យរោងចក្រនាំចេញសំលៀកបំពាក់ និងស្បែកជើងចំនួន៦០០រោងចក្រ បាននិយាយថា «ដោយសារតែសង្គ្រាមពាណិជ្ជកម្ម កាន់តែខ្លាំងឡើងមានចំណាប់អារម្មណ៍មួយចំនួនពីក្រុមហ៊ុននានា ដោយផ្លាស់មកប្រទេសកម្ពុជា បន្ទាប់ពីប្រទេសចិន ។ ដូច្នេះខណៈអាមេរិកដាក់ពន្ធលើទំនិញនាំចូលពីចិនកើនឡើង នោះនឹងមានការកើនឡើង នៃក្រុមហ៊ុនដែលកំពុងធ្វើប្រតិបត្តិការផលិតកម្មផ្លាស់ប្តូរទៅកម្ពុជា និងវៀតណាម» ។
ជាការពិតណាស់ ក្រុមហ៊ុនល្បីរបស់អាមេរិកបានកាត់បន្ថយការបញ្ជាទិញសម្លៀកបំពាក់ពីប្រទេសចិនចាប់តាំងពីខែសីហា ឆ្នាំ ២០១៧ នៅពេលដែលរដ្ឋាភិបាលសហរដ្ឋអាមេរិកបានបើកការស៊ើបអង្កេតលើ ការអនុវត្តពាណិជ្ជកម្មអយុត្តិធម៌របស់ចិន។ លើសពីនេះទៀតតម្លៃផលិតកម្មនៅក្នុងប្រទេសចិនបានកើនឡើងទ្វេដង ដោយសារតែការបង្កើនថ្លៃពលកម្ម។ សម្រាប់តម្លៃនៃការលក់រាយសម្លៀកបំពាក់ ដែលផលិតនៅចិនឥឡូវនេះមានតម្លៃ ៦៩,៥០ ដុល្លារក្នុងមួយឯកតាដោយកើនឡើងទ្វេដង បើប្រៀបធៀបទៅនឹងឆ្នាំមុន។ នេះបើយោងតាមការសិក្សារបស់សាកលវិទ្យាល័យ Delaware លើឧស្សាហកម្មកាត់ដេរសកលដែលបានចេញផ្សាយកាលពីសប្ដាហ៍មុន។ នៅវៀតណាមតម្លៃបានកើនឡើងនៅឆ្នាំនេះពី ២០ ដុល្លារក្នុងមួយយូនីតដល់ ៣៤,៨០ ដុល្លារ ដោយសារតែថ្លៃពលកម្មកើនឡើង ខណៈតម្លៃនៅកម្ពុជានៅតែស្ថិតនៅតម្លៃទាបបំផុត និងមានការប្រកួតប្រជែងខ្ពស់បំផុតនៅក្នុងឧស្សាហកម្មនេះក្រោម ២០ ដុល្លារក្នុងមួយឯកតា។
តាមរយៈលទ្ធផលនេះ គឺជាព័ត៌មានស្វាគមន៍មួយដោយវិស័យកាត់ដេរ និងស្បែកជើងកម្ពុជាដែលជាសសរស្តម្ភដ៏សំខាន់ នៃសេដ្ឋកិច្ចរបស់ប្រទេសកម្ពុជា ដែលកំពុងតែរំជើបរំជួលពីការបន្តព័ត៌មានពីការដកពន្ធពីអឺរ៉ុប និងការដកពន្ធពីការអាមេរិក។ យោងតាម GMAC រោងចក្រថ្មីចំនួន២៥ បានចូលរួមក្នុងសមាគមរោងចក្រនៅក្នុងត្រីមាសទីមួយ នៃឆ្នាំនេះបានធ្លាក់ចុះជិត៥០ភាគរយ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។ ក្រុមអ្នកវិភាគ និងអ្នកជំនាញក្នុងវិស័យឧស្សាហកម្មក៏បានសង្កត់ធ្ងន់ថា ការផ្លាស់ប្តូរទីតាំងផលិតកម្មនឹងកើតមានឡើងដណ្តើរៗ ដោយសារគុណសម្បត្តិសំខាន់ៗនៃបច្ចេកវិទ្យា និងកម្លាំងពលកម្មជំនាញរបស់ប្រទេសចិន។
FDRA បានសរសេរបន្ថែមទៀតថា “មានសំណូមពរថា ឧស្សាហកម្មនានាគួរតែផ្លាស់ប្តូរការវិនិយោគរបស់ខ្លួន ទៅប្រទេសផ្សេងក្រៅពីប្រទេសចិន បន្ទាប់ពីមានការគំរាមកំហែងពន្ធបន្ថែម» ។ FDRA បានបន្តទៀតថា «ខណៈពេលដែលឧស្សាហកម្មរបស់យើង កំពុងផ្លាស់ប្តូរចេញពីប្រទេសចិន ក្នុងរយៈពេលណាមួយពីឥឡូវនេះ វិស័យស្បែកជើងគឺជាផែ្នកមួយដែលពឹងផ្អែកខ្លាំងលើដើមទុន ដោយមានផែនការជាច្រើនឆ្នាំ និងតម្រូវឱ្យមានការសម្រេចចិត្តវិនិ យោគ និងក្រុមហ៊ុនមិនអាចផ្លាស់ប្តូររោងចក្រឱ្យសម្របខ្លួន ទៅនឹងការផ្លាស់ប្តូរទាំងនេះទេ»។
សូមបញ្ជាក់ថាមានក្រុមហ៊ុនប្រែនស្បែកជើងល្បីជាច្រើនបានផលិតនូវផលិតផលស្បែកជើងរបស់ខ្លួននៅតាមបណ្តារោងចក្រជាច្រើននៅកម្ពុជា។ យ៉ាងណាមិញ ពាក់ព័ន្ធនឹងបញ្ហាថាវិស័យកាត់ដេរសម្លៀកបំពាក់និងស្បែកជើងរបស់កម្ពុជានឹងចំនេញ ឬអត់ពីសង្គ្រាមពាណិជ្ជកម្មនេះ គឺរង់ចាំមើលការសម្រេចរបស់លោកត្រាំ ថានឹងលុបចោលការតម្លើងពន្ធលើស្បែកជើងនាំចូលពីប្រទេសចិនទៅទីផ្សារអាមេរិកតាមការស្នើសុំរបស់អ្នកលក់រាយអាមេរិក ឬយ៉ាងណា ៕ (កែសម្រួលដោយ ៖ សុឃាក់)
ចែករំលែកព័តមាននេះ