រាជធានីភ្នំពេញ៖តារាចម្រៀងលោកចាន់ សម័យ មានសំណាងបន្ថែមទៀតបានទទួលផ្ទះថ្មីជាអំណោយរបស់សម្ដេចតេជោហ៊ុន សែន និងសម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ។ ពិធីប្រគល់ផ្ទះបានធ្វើឡើងនៅល្ងាចថ្ងៃទី២១ ខែឧសភា ឆ្នាំ២០១៩ ក្រោមវត្តមានឧកញ៉ាឡេង ណាវ៉ាត្រា និងលោកហេង ឡុង ស្ថាបនិកសមាគមមិត្តស្ម័គ្រចិត្តសិល្បៈជួយសង្គម ។ ផ្ទះដែលសម្ដេចតេជោហ៊ុន សែន និង សម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ទិញឲ្យតារាចម្រៀងចាន់ សម័យនោះ គឺជាវីឡាតឿ ស្ថិតក្នុងបុរីឡេងណាវ៉ាត្រាគម្រោងទី៦ ជិតផ្សារទួលពង្រ ។
ឧកញ៉ាឡេង ណាវ៉ាត្រា បានថ្លែងថា លោករំភើបចិត្តខ្លាំងជំនួសតារាចម្រៀងលោកចាន់ សម័យ ដែលមានសំណាងត្រូវបានសម្ដេចទាំងពីរអាណិតអាសូរទិញផ្ទះឲ្យបែបនេះ ។
លោកចាន់ សម័យ មានអារម្មណ៍រំភើបរីករាយខ្លាំងណាស់ ដោយកន្លងមកលោកមិនធ្លាប់ ស្រមៃថានឹងមានផ្ទះផ្ទាល់ខ្លួនដើម្បីឲ្យប្រពន្ធកូនស្នាក់នៅឡើយ ។ ដូច្នេះហើយលោកថ្លែងអំណរគុណចំពោះសម្តេចតេជោហ៊ុន សែន និងសម្តេចកិត្តិព្រឹទ្ធបណ្ឌិត ដែលផ្តល់ផ្ទះដល់រូបលោកនិងក្រុមគ្រួសារ ធ្វើឲ្យចាប់ពីពេលនេះទៅលោកមានផ្ទះផ្ទាល់ខ្លួនរស់នៅនឹងគេ ឈប់នៅផ្ទះជួលហើយ ។
លោកចាន់ សម័យ មានជំងឺរបេងឆ្អឹងតាំងពីអាយុ១៤ឆ្នាំ តែទើបតែចាប់ផ្ដើមធ្វើទុក្ខខ្លាំងប្រហែល៥ឆ្នាំចុងក្រោយនេះ ។ លោកចាន់ សម័យ បាត់មុខពីពិភពសិល្បៈច្រើនឆ្នាំ ដោយរស់នៅផ្ទះជួយក្នុងខណ្ឌជ្រោយចង្វា ក្នុងជីវវភាពលំបាក ។ ដំណឹងនេះបានសុសសាយ ហើយលោកក៏ទទួលបានការជួយឧបត្ថម្ភពីសប្បុរសជនជាបន្តបន្ទាប់ ។
លោកចាន់ សម័យ មិនធ្លាប់នឹកស្រមៃថា នឹងវិលចូលពិភពសិល្បៈវិញទេ បន្ទាប់ពីស្ងប់ស្ងាត់ជាច្រើនឆ្នាំ ប៉ុន្តែក្រោយពីបានកម្លាំងចិត្តពីសប្បុរសជន ធ្វើឲ្យលោកកែប្រែគំនិតហើយវិលរកសិល្បៈវិញ ៕ (កែសម្រួលដោយ ៖ បុប្ផា)
ចែករំលែកព័តមាននេះ