រាជធានីភ្នំពេញ ៖ រថយន្តម៉ាកឡិចស៊ីស RX300 មួយគ្រឿង ខណៈពេលដែលបុរសម្នាក់កំពុងតែបើកបរតាមផ្លូវសុខៗ ស្រាប់តែមានមនុស្សប្រុសស្រីចំនួន៣នាក់ផ្សេងទៀតបានស្ទាក់ឃាត់ឲ្យឈប់ រួចដណ្ដើមគ្នាយករថយន្តនោះ ដោយពួកគាត់ម្នាក់ៗសុទ្ធតែអះអាងថាជាម្ចាស់រថយន្តនោះរៀងៗខ្លួនថែមទៀតផង។
ខណៈនោះបង្កឲ្យមានការឈ្លោះប្រកែកគ្នាយ៉ាងតឹងសរសៃក និងស្ទើរតែផ្ទុះហិង្សាដាក់គ្នាទៅហើយ ព្រមទាំងធ្វើឲ្យមានការភ្ញាក់ផ្អើលយ៉ាងខ្លាំនៅតាមដងផ្លូវ ចំណែកកម្លាំងនគរបាលខណ្ឌពោធិ៍សែនជ័យបានចេញអន្តរាគមន៍ទប់ស្កាត់ កុំឱ្យមានអំពើហិង្សាណាមួយកើតឡើង ព្រមទាំងនាំអ្នកទាំង៤ទៅធ្វើការសាកសួរភ្លាមៗ ទើបដឹងថាអ្នកទាំង៤នោះសុទ្ធតែជាអ្នកចាញ់បោកក្រុមហ៊ុន ណំ ហម និង សេង ហួត ដែលជាក្រុមហ៊ុនមានថៅកែតែមួយ រកស៊ីជួល លក់និងទិញរថយន្តបង់រំលស់។
ហេតុការណ៍ខាងលើនោះបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោង៨ព្រឹកថ្ងៃទី២២ ខែឧសភា ឆ្នាំ២០១៩ នៅតាមមហាវិថីសហព័ន្ធរុស្ស៊ី ត្រង់ចំណុចមុខអាកាសយានដ្ឋានអន្តរជាតិភ្នំពេញ ស្ថិតនៅក្នុងភូមិក្បាលដំរី១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។
រថយន្តមួយគ្រឿងខាងលើម៉ាកឡិចស៊ីស RX300 ពណ៌ខ្មៅ ពាក់ស្លាកលេខ ភ្នំពេញ ២P-៦២១០ បើកបរដោយបុរសម្នាក់ឈ្មោះ ហៀង វីរៈ អាយុ៣៧ឆ្នាំ មានទីលំនៅភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។
តាមប្រភពពីនគរបាលបានឲ្យដឹងថា មនុស្សមួយក្រុមដែលចេញមុខមកដណ្ដើមរថយន្តគ្នានោះខាងលើគឺសុទ្ធតែជាជនរងគ្រោះចាញ់បោកក្រុមហ៊ុន ណំ ហម និងសេង ហួត ដែលជាក្រុមហ៊ុនដែលមានថៅកែតែមួយ រកស៊ីជួល លក់និងទិញរថយន្តបង់រំលស់ ហើយក្រុមហ៊ុនមួយនេះរកស៊ីធ្វើនំអត់ម្សៅ ដែលល្បីខាងឆបោកលុយរាប់សិបម៉ឺនដុល្លារពីអតិថិជន ក្នុងនោះមានអ្នកចាញ់បោករាប់រយនាក់រួចមកហើយ ចំពោះអ្នកដែលបានទិញរថយន្តពីក្រុមហ៊ុនមួយនេះខាតបង់ប្រាក់ឥតប្រយោជន៍មិនដែលបានរថយន្តប្រើឡើយ។
មិនតែប៉ុណ្ណោះ ប្រធានក្រុមហ៊ុនមួយនេះជាមន្ត្រីយោធាហើយត្រូវចាប់ខ្លួនកាលពីពេលថ្មីៗកន្លងមកនេះ និងកំពុងជាប់ពន្ធនាគារថែមទៀតផង។ ដោយឡែករថយន្ត១គ្រឿងខាងលើនេះត្រូវបានក្រុមហ៊ុននោះយកទៅលក់ឲ្យអ្នកទាំង៤នាក់ពីមួយទៅមួយ ទើបទីបំផុតមានរឿងបែបនេះកើតឡើងតែម្ដង។
តាមប្រភពពីស្ត្រីចំណាស់ម្នាក់បាននិយាយថា គាត់គឺជាម្ចាស់រថយន្តនេះដែលត្រូវបានក្រុមហ៊ុន ជួល លក់ និងទិញរថយន្តបង់រំលស់ «ណំ ហម » នៅសង្កាត់គោកឃ្លាង ខណ្ឌសែនសុខ ជួលពីអ្នកស្រីកាលពីពេលកន្លងមកនេះ ប៉ុន្តែក្រោយពេលជួលរួច ស្រាប់តែបាត់រថយន្តរកមិនឃើញឡើយ ដោយក្រុមហ៊ុនមួយនេះបានយករថយន្តរបស់អ្នកស្រីទៅលក់បង់រំលស់ឲ្យអ្នកផ្សេងពីម្នាក់ទៅម្នាក់ទៀតបាត់ ។
តាមប្រភពដដែលបានបន្តថា ពេលនោះគាត់បានព្យាយាមទាក់ទងសួរនាំទៅខាងក្រុមហ៊ុនដែរ ប៉ុន្តែទាក់ទងមិនបានសោះ រហូតក្រោយមកឮដំណឹងថា ជនឆបោកឈ្មោះសេង សុភគ៌ ដែលជាអគ្គនាយកក្រុមហ៊ុននេះត្រូវសមត្ថកិច្ចចាប់ខ្លួនរឿងឆបោកប្រាក់ពីអតិថិជនរាប់សិបម៉ឺនដុល្លារ ។ តែទោះជាបែបនេះក្ដី គាត់នៅតែតាមរករថយន្តដដែល លុះដល់វេលាព្រឹកថ្ងៃកើតហេតុ ស្រាប់តែឃើញរថយន្តមួយគ្រឿងនេះត្រូវបុរសម្នាក់បើកបរទើបឃាត់សួរនាំ ហើយក៏លេចមុខមនុស្ស២នាក់ទៀតទៅអះអាងថាជារថយន្តរបស់ខ្លួនដែរ។
ដោយឡែកបុរស២នាក់ទៀតបានអះអាងដូចៗគ្នាថាពួកគាត់គឺជាម្ចាស់រថយន្តឡិចស៊ីស RX330 មួយគ្រឿងនោះដែរ ដោយពួកគាត់បានទិញបង់រំលស់ពីក្រុមហ៊ុន ណំ ហម និងសេង ហួត ដែលមានលោកអគ្គនាយកឈ្មោះ សេង សុភគ៌ មានទីតាំងនៅ ផ្ទះជួល៦២៧ តាមផ្លូវលំ ភូមិជ្រៃកោង សង្កាត់ចោមចៅ២ ខណ្ឌពោធិសែនជ័យ នោះផងដែរ។
តាមប្រភពដដែលបានបន្តថា ក្នុងនោះពួកគាត់ម្នាក់ៗបង់រំលស់មុន១ម៉ឺនដុល្លាទៅហើយ ប៉ុន្តែបានឃើញរថយន្តតែមួយភ្លែតប៉ុណ្ណោះ ត្រូវបានក្រុមហ៊ុនមួយនេះប្រាប់ថាយករថយន្តទៅត្រួតពិនិត្យប្រព័ន្ធGPS រួចក៏យកទៅបាត់រហូតតែម្ដង ទើបតែពេលនេះប្រទះឃើញរថយន្តត្រូវម្ចាស់ផ្សេងបើកទៅវិញ។
ក្រោយពេលកើតហេតុ នគរបាលបានហៅអ្នកទាំង៤នាក់ទៅកាន់ប៉ុស្តិ៍កាកាប១ ដើម្បីដោះស្រាយគ្នា ហើយក្រោយពីការផ្ទៀងផ្ទាត់ឯកសារឃើញឈ្មោះ ហៀង វីរៈ អាយុ៣៧ មានទីលំនៅ ភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ មានឯកសារពាក្យបណ្តឹងដែលបានដាក់នៅក្រសួងមហាផ្ទៃពាក់ព័ន្ធនឹងការសុំសិទ្ធិធ្វើជាម្ចាស់រថយន្ត ព្រមទាំងមានដីកាសម្រេចពីតុលាការ សុំប្រើប្រាស់រថយន្តមួយគ្រឿងខាងលើនេះ ទើបនគរបាលសម្រេចប្រគល់រថយន្តមួយគ្រឿងម៉ាកឡិចស៊ីស RX300 នេះទៅឲ្យឈ្មោះហៀង វីរៈ ប្រើប្រាស់ជាបន្តទៀតដើម្បីបញ្ចប់រឿង ចំណែកបុរស២នាក់ និងស្ត្រីម្នាក់ដែលអះអាងថាជាម្ចាស់ដែរ មិនសុខចិត្តយ៉ាងណានោះសូមតវ៉ាតាមផ្លូវច្បាប់នៅពេលក្រោយទៀតចុះ៕ (កែសម្រួលដោយ ៖ ធីតា)
ចែករំលែកព័តមាននេះ