ខេត្តកំពង់ចាម ៖ ករណីឃាតកម្មសម្លាប់អ្នកគ្រូបង្រៀនភាសាកូរ៉េទាំងអាក្រាតកាយ សមត្ថកិច្ចបានត្រឹមសន្និដ្ឋានថា អាចផ្តើមចេញពីរឿងស្នេហាត្រីកោណ តែមិនទាន់ដឹងថា ជនដៃដល់ជាអ្នកណានៅឡើយ ព្រោះបានរត់គេចខ្លួនបាត់ ហើយយុវជនដែលនៅក្នុងហេតុការណ៍នោះរបួសធ្ងន់មិនទាន់អាចនិយាយបានពីហេតុការណ៍នោះនៅឡើយទេ ។ តែដំណឹងយុវជនរងគ្រោះ មិនទាន់ស្លាប់ ក៏អាចធ្វើឱ្យឃាតករនៅមិនសុខនោះឡើយ នឹងត្រូវបានលាតត្រដាងនាពេលខាងមុខនេះ ប្រសិនបើអ្នករងគ្រោះអាចនិយាយបាន ។
គួររំលឹកទៀតថា អ្នកគ្រូបង្រៀនភាសាកូរ៉េ ត្រូវបានឃាតករមិនស្គាល់មុខវាយសម្លាប់ ក្នុងស្ថានភាពអាក្រាតកាយ និងសិស្សប្រុសម្នាក់ បានរងរបួសធ្ងន់នៅត្រង់ក្បាលសន្លប់ នៅក្នុងបរិវេណសាលាបឋមសិក្សាហ៊ុនណេង ស្ថិតនៅក្នុងឃុំព្រែកកក់ ស្រុកស្ទឹងត្រង់ ។ ហេតុការណ៍នេះត្រូវបានសមត្ថកិច្ចសន្និដ្ឋានថា បានកើតឡើងក្នុងចន្លោះម៉ោង១០ ទៅ១១យប់ថ្ងៃទី២០ ឧសភា ហើយជនដៃដល់នឹកស្មានថា ស្លាប់ទាំង២នាក់ក៏បានគេចខ្លួនបាត់ ។ ករណីនេះ ត្រូវបានដាក់ការសង្ស័យរឿងស្នេហាត្រីកោណហើយមើលទៅ ។
ស្ត្រីឈ្មោះ យ៉េង កែម អាយុ៤៥ឆ្នាំ នៅភូមិព្រែកកក់ ឃុំព្រែកបាក់ ស្រុកស្ទឹងត្រង់បានប្រាប់ថា នៅល្ងាចថ្ងៃទី២០ ឧសភា កូនប្រុសច្បងរបស់គាត់ឈ្មោះ ម៉ៅ សុខម៉ិញ អាយុ២១ឆ្នាំ បានជិះម៉ូតូម៉ាកហុងដាឌ្រីមធុន C125 ស៊េរី២០១៧ ចេញពីផ្ទះដើម្បីទៅចូលរួមមង្គលការគេ រហូតមកដល់យប់ជ្រៅបន្តិចហើយមិនបានឃើញត្រឡប់មកផ្ទះវិញទេ ពេលចុចទូរស័ព្ទរកចូល តែមិនមានអ្នកណាលើកនិយាយឡើយ ។
ស្ត្រីជាម្តាយរបស់យុវជនរងគ្រោះប្រាប់បន្តថា ស្រាប់តែនៅព្រឹកព្រលឹមថ្ងៃទី២១ ឧសភា ត្រូវបាននគរបាលទូរស័ព្ទមកប្រាប់ថាកូនប្រុសរបស់គាត់ត្រូវបានគេកាប់ឲ្យរបួសធ្ងន់ចំក្បាលសន្លប់កំពុងស្ថិតនៅក្នុងមន្ទីរពេទ្យស្រុកស្ទឹងត្រង់ ។ គ្រាន់តែឮបែបនេះគាត់ក៏ប្រញាប់មកមើលឃើញកូនប្រុសមានរបួសត្រង់ក្បាលសង្ស័យត្រូវបានគេប្រើកូនពូថៅកាប់ ប៉ងសម្លាប់តែមិនស្លាប់ ។
ដោយសារតែរបួសធ្ងន់ពេកក៏ត្រូវបានដឹកបន្ត ដោយរថយន្តសាមុយមកសង្គ្រោះនៅមន្ទីរពេទ្យខេត្ត ។ ទោះបីស្នាមរបួសត្រូវបានដេរផ្ជិតវិញ តែនៅក្អួតម្តងៗ កំពុងតែតាមដានមើលសភាពរបួសបន្តទៀត នេះ
បើតាមគ្រូពេទ្យប្រាប់ ។ ស្ត្រីជាម្តាយយុវជនរងគ្រោះគាត់មិនដឹងថាតើផ្តើមចេញពីរឿងអ្វីបានជារហូតដល់កូនប្រុសរងគ្រោះធ្ងន់ធ្ងរបែបនេះទេ ។
គាត់ថារាល់ថ្ងៃកូនប្រុសរបស់គាត់មានរបរជាជាងទងហើយនៅវេលាល្ងាចទំនេរពីការងារ ជិះម៉ូតូមករៀនភាសាកូរ៉េរាល់ថ្ងៃ ដើម្បីត្រៀមដាក់ពាក្យចេញទៅធ្វើពលករនៅប្រទេសកូរ៉េ ។ រហូតមកដល់ពេលនេះកូនប្រុសរបស់គាត់នៅតែមិនទាន់និយាយឲ្យបានដឹងច្បាស់ថា រឿងហេតុកើតឡើងដោយរបៀបណាទេ ។ នៅរសៀលថ្ងៃដដែលកូនប្រុសរបស់គាត់ ត្រូវបានបញ្ចូនបន្តទៅសង្គ្រោះទៅប្រទេសវៀតណាម ។
សមត្ថកិច្ចមួយរូបបានប្រាប់ឲ្យដឹងថា ករណីខាងលើនេះ តាមការពិនិត្យនៅកន្លែងកើតហេតុឃើញមានបន្សល់ទុកដំបងឈើ១កំណាត់ប្រវែង៤តឹក ម៉ូតូម៉ាកហុងដាឌ្រីនធុន C 125 របស់អ្នករងគ្រោះ ។ អ្នកគ្រូបង្រៀនភាសាកូរ៉េដែលស្លាប់ទាំងអាក្រាតកាយឈ្មោះ ហ៊ី ធាវិន អាយុ២៤ឆ្នាំ រស់នៅភូមិអណ្តូងច្រុះ ឃុំក្រឡា ស្រុកកំពង់សៀម ។
ករណីឃាតកម្មខាងលើនេះ សមត្ថកិច្ចបានត្រឹមសន្និដ្ឋានថាអាចផ្តើមចេញពីរឿងស្នេហាត្រីកោណ តែមិនទាន់ដឹងថាជនដៃដល់ជាអ្នកណានៅឡើយ ព្រោះបានរត់គេចខ្លួនបាត់ ហើយយុវជនដែលនៅក្នុងហេតុការណ៍នោះរបួសធ្ងន់មិនទាន់អាចនិយាយបានពីហេតុការណ៍នោះនៅឡើយទេ ។ តែដំណឹងយុវជនរងគ្រោះមិនទាន់ស្លាប់ ក៏អាចធ្វើឱ្យឃាតករនៅមិនសុខនោះឡើយ នឹងត្រូវបានលាតត្រដាងនាពេលខាងមុខនេះប្រសិនបើអ្នករងគ្រោះអាចនិយាយបាន ។ (សម្រួលដោយ៖ ស្រីណា)
ចែករំលែកព័តមាននេះ