ខេត្តកំពង់ចាម ៖ សត្វប្រចៀវដែលគេច្រើនតែឃើញរស់នៅតាមរូងភ្នំមួយចំនួន នៅតំបន់ភ្នំដែលមានរូងតូចធំ ជាតំបន់រស់នៅសុខសាន្តនោះ ពេលនេះគេបានចិញ្ចឹមនៅតាមតំបន់វាលរាបក៏មានច្រើនដែរ ។ លាមករបស់វា ត្រូវបានគេយកមកធ្វើជី សម្រាប់ដាក់លើដំណាំផ្សេងៗលូតលាស់បានល្អ…
ខេត្តកំពង់ចាម ៖ សត្វប្រចៀវដែលគេច្រើនតែឃើញរស់នៅតាមរូងភ្នំមួយចំនួន នៅតំបន់ភ្នំដែលមានរូងតូចធំ ជាតំបន់រស់នៅសុខសាន្តនោះ ពេលនេះគេបានចិញ្ចឹមនៅតាមតំបន់វាលរាបក៏មានច្រើនដែរ ។ លាមករបស់វា ត្រូវបានគេយកមកធ្វើជី សម្រាប់ដាក់លើដំណាំផ្សេងៗលូតលាស់បានល្អ និងមានទិន្នផលខ្ពស់ជាជាងប្រមូលយកនៅតាមតំបន់ភ្នំ ។
ដោយឡែក នៅក្នុងឃុំខ្ចៅ ស្រុកកងមាស ក៏បានបង្កើតកសិដ្ឋានតាមគ្រួសារ យ៉ាងហោចណាស់៣ទៅ៤កន្លែង ដោយបានធ្វើសំបុកពីធាងត្នោត សម្រាប់ឲ្យហ្វូងប្រចៀវរស់នៅ ហើយចំណូលដែលបានមកក៏គួរសម ដើម្បីដោះស្រាយជីវភាពគ្រួសារផងដែរ កំពុងក្លាយជាមុខរបរមួយ ។ លោកតា ខឹម ព្រឿង អាយុ៨៣ឆ្នាំ នៅភូមិស្វាយពាន់ទី១ ឃុំខ្ចៅ មានប្រសាសន៍ឲ្យដឹងថា ដោយនៅមុខផ្ទះរបស់គាត់មានដើមដូងចំនួន២ដើម ដែលមើលទៅទំនងនោះគាត់បានចាប់ផ្តើមរកធាងត្នោតមកដាក់ចងតំរៀបដើម្បីបង្កើតជាសំបុក ឲ្យហ្វូងប្រចៀវរស់នៅសម្រាប់យកលាមករបស់វា មកធ្វើជីដាក់ដំណាំនៅក្នុងភូមិដោយបានផលល្អ ហើយក៏លើសពីសេចក្តីត្រូវការប្រើប្រាស់ ក៏មានអ្នកភូមិជិតឆ្ងាយមកទិញ ដែលគាត់លក់បាន១ធុងស្បេត្រូលបានតម្លៃ១៥.០០០រៀល ។
លោកតា ព្រឿង មានប្រសាសន៍បន្តថា ក្រោយមកដូងចំនូន២ដើមនោះ បានពុកផុយ គាត់ក៏បានច្នៃធ្វើកន្លែងថ្មីទៀត ដោយចាក់សសរបេតុងចំនួន៤ដើម បានចងដើមឫស្សីខ្វាត់ខ្វែងនិងចងតំរៀបធាងត្នោតធ្វើសំបុកដ៏ធំរឹងមាំដែលរហូតមកដល់សព្វថ្ងៃជាង២០ឆ្នាំមកហើយ ។ លោកតានិយាយទាំងញញឹមថា កាលណាបើហ្វូងប្រចៀវមកនៅច្រើននោះលាមករបស់វាជុះមកក៏បានច្រើនដែរធ្លាក់មកពាសពេញលើដី ក្រាលដោយកៅស៊ូត្រូវបោសសម្អាតរាល់ថ្ងៃកើបដាក់ក្នុងបាវទុកលក់ ប៉ុន្តែបើរដូវភ្លៀងម្តងៗ ធ្វើឱ្យលាមកប្រចៀវ ត្រូវទឹករលាយអស់ មិនអាចប្រមូលយកបានទេ គឺចោលហើយ ។ គាត់ថា បានមើលថែទាំនូវសុវត្ថិភាពរបស់វា ឱ្យវារស់នៅដោយសុខសាន្ត ។ គាត់ថា មានពេលខ្លះទៀតមានពស់បានវារឡើងតាមបង្គោលសសរឫស្សី ឡើងនៅស៊ីប្រចៀវក៏មានដែរ ធ្វើឲ្យហ្វូងប្រចៀវផ្អើលភ័យស្លន់ស្លោ ហើរចេញទៅឆ្ងាយបាត់ ។ គាត់ថា ជួនកាលបាត់ជិតកន្លះខែបានហើរមកទុំនៅនឹងសំបុកវិញ ។ ក្រៅពីពស់ក៏មានសត្វមៀមនិងខ្លែងស្រាក់នៅពេលយប់ៗបានហើរមកក្រវែល ដើម្បីឆាបឆក់យកប្រចៀវដែលទុំនៅតាមធាងត្នោតក៏មានដែរ ។ ពេលឃើញម្តងៗគាត់ស្រែកដេញបង្អើល ទើបវាហើរចេញ ។ គាត់ថា ទោះបីសិ្ថតនៅក្នុងវ័យចំណាស់បែបនេះក្តីក៏គាត់នៅតែប្រឹងតស៊ូ ថែរក្សាសំបុកប្រចៀវឲ្យនៅបានយូរទៅថ្ងៃខាងមុខ ។
បើនិយាយពីតម្លៃវិញ លាមកប្រចៀវលក់បានក្នុង១ធុងស្បេត្រូល១៥.០០០រៀលដដែល មិនហ៊ានឡើងថ្លៃទេខ្លាចអ្នកទិញគេសាញ ។ គាត់ថា កន្លែងរបស់គាត់តូចជាងគេទេ ទោះយ៉ាងនេះក្តីក្នុង១ខែៗក៏អាចរកចំណូលបានប្រហែល២០ម៉ឺនរៀល ទៅ៣០ម៉ឺនរៀលជាងដែរ សម្រាប់ដោះស្រាយជីវភាព ។ ស្ត្រីចំណាស់ឈ្មោះ វ៉ា គឹមនាង អាយុ៥៩ឆ្នាំ នៅភូមិវ៉ារិនទី១ ឃុំខ្ចៅ ស្រុកកងមាស មានប្រសាសន៍ឲ្យដឹងបន្ថែមនៅព្រឹកថ្ងៃទី២០ ឧសភា ២០១៩ថា មានពេលមួយនោះគាត់បានដាំត្រឡាចនិងឆៃថាវនៅក្នុងភូមិ ដោយបានប្រើប្រាស់ជីធម្មជាតិលាមកប្រចៀវ ។
ក្រោយពីបានផលចេញមកល្អៗហើយថ្លោសថែមទៀតទើបប្រឹងថែទាំសំបុកប្រចៀវដែលដំបូងមានតិចតួចទេ ឃើញលាមកវាជាជីធម្មជាតិទើបចេះតែពង្រីកបានធំធាត់ បង្កើតសំបុកកាន់តែច្រើន និងមានមនុស្សមកទិញជីលាមកច្រើនដើម្បីយកទៅដាក់ដំណាំ ។ គាត់ថាលាមកប្រចៀវមិនដែលសល់ទេ លក់ដាច់ហូរហែ ។ ម្យ៉ាងទៀត អត់ចាំបាច់ចំណាយទិញចំណីណាមួយឱ្យវាទេ សំខាន់នោះគឺមើលថែវាកុំឱ្យវាភ័យខ្លាចសត្វដ៏ទៃមកអុកឡុក ។ ស្ត្រីចំណាស់ឈ្មោះ គឹម នាង បន្តថា លុះមកដល់ឆ្នាំ២០១៧ ដោយសារបានផលល្អគាត់បានចាប់ផ្តើមពង្រីង ពង្រីកសំបុកបន្ថែម ធ្វើរោងសម្រាប់ឲ្យហ្វូងប្រចៀវទុំនៅលើធាងត្នោត មានរហូតដល់ទៅរាប់ម៉ឺនក្បាលឯណោះ ។ លាមកវាកើបរាល់ថ្ងៃលក់បាន១ធុងស្បេត្រូលតម្លៃ១៧.០០០រៀល ហើយ១បាវទម្ងន់ពី២០ទៅ២៥គីឡូក្រាម លក់បាន១០ម៉ឺនរៀល ។
រាល់ថ្ងៃមានម៉ូយនៅខេត្តឆ្ងាយៗ ស្កាត់មកទិញជីលាមកប្រចៀវនៅផ្ទះរបស់គាត់ហូរហែ ដើម្បីយកទៅដាក់ដំណាំឲ្យលូតលាស់ល្អដូចជាដំណាំម្រេចដូងជាដើម ។ របរនេះគាត់អះអាងថា មិនបោះបង់ចោលទេ មានតែប្រឹងថែនិងពង្រីកដោយសំបុករបស់វា២ឆ្នាំត្រូវដូរចេញម្តង ព្រោះវាពុកផុយ ។ ចំណែកធាងត្នោតវិញត្រូវជួលគេទៅកាប់ នៅកន្លែងណាដែលមានសំបូរត្នោត ។ កន្លងមកគាត់ថាធ្លាប់មានការភ្ញាក់ផ្អើលផ្ទុះនូវជំងឺផ្តាសាយបក្សី ដោយខ្លាចឆ្លងមេរោគពីហ្វូងសត្វប្រចៀវមកមនុស្សនោះ ត្រូវបានមន្ត្រីរបស់អង្គការអូស្ត្រាលី និងវិទ្យាស្ថានប៉ាស្ទ័របានចុះមកបូមឈាមប្តីគាត់និងគាត់ យកទៅពិនិត្យក្រែងមានមេរោគ ។ គាត់ថាសំណាងល្អដែរមិនបានឆ្លងមេរោគអ្វីពីប្រចៀវឡើយ ។
គាត់និយាយថា ក្នុងគ្រួសារបស់គាត់មិនត្រឹមតែចិញ្ចឹមប្រចៀវជាមុខរបរប៉ុណ្ណោះទេ ថែមទាំងដើរប្រមូលទិញលាមកប្រចៀវតាមភូមិនានា ដែលគេចិញ្ចឹមតូចតាចយកមកស្តុកទុកឲ្យបានច្រើន ដើម្បីលក់ឲ្យឈ្មួញគ្រាន់នឹងចំណេញក្បាលកាក់ ។ គាត់ថា កាលពីមុនទីផ្សារម្រេចលក់បានថ្លៃ ស្រួលលក់ណាស់អាចម៍ប្រចៀវនេះ តែដល់ម្រេចចុះថោកសព្វថ្ងៃរាងពិបាកលក់បន្តិច ព្រោះម្រេចត្រូវការលាមកប្រចៀវច្រើន ដែលមានពេលខ្លះរកលាមកប្រចៀវតាមចំនួនដែលគេកុម្ម៉ង់សឹងមិនបានគ្រប់ ៕
ចែករំលែកព័តមាននេះ