រាជធានីភ្នំពេញ ៖ ជនសង្ស័យជាជាងទងនៅម្តុំផ្សារកណ្តាលបែកគំនិតអត់មានលុយលេងល្បែងក៏សម្រេចចិត្តលួចចំលងកូនសោម៉ូតូ រួចធ្វើសកម្មភាពលួចយកទៅបំរុងយកទៅលក់ស្រាប់តែសមត្ថកិច្ចស្រាវជ្រាវតាមទាន់ឃាត់ខ្លួនយកទៅសួរនាំ ហេតុការណ៍នេះបានកើតឡើងកាល ពីវេលាម៉ោង៥និង៣០នាទីល្ងាច ថ្ងៃទី២១ ខែឧសភានេះ តាមបណ្តោយផ្លូវជាតិលេខ៥ នៅចំណុចភោជនីដ្ឋាន72 ស្ថិតនៅក្នុងសង្កាត់ឬស្សីកែវ ខណ្ឌឬស្សីកែវ ។
ជនសង្ស័យមានឈ្មោះប៉ុន នីម ភេទប្រុស អាយុ៣៤ឆ្នាំ មុខរបរជាងទង ស្នាក់នៅផ្ទះលេខ៣៨២ សង្កាត់ច្រាំងចំរះ២ ខណ្ឌឬស្សីកែវ ។ ជនរងគ្រោះមានឈ្មោះសាន់ ប៉ោសេង ភេទប្រុស អាយុ២៦ឆ្នាំ ស្នាក់នៅផ្លូវលេខ៨ ខណ្ឌដង្កោ ។
តាមប្រភពព័ត៌មានពីជនសង្ស័យបានឆ្លើយសារភាពប្រាប់សមត្ថកិច្ចថា មុនពេលកើតហេតុខ្លួនបានលួចចំលងកូនសោម៉ូតូស្តូបពី ពណ៌ខ្មៅ ពាក់ស្លាកលេខភ្នំពេញ1GR-4986 ចំនួន៤ទៅ៥ថ្ងៃមកហើយ ម៉ូតូនេះជារបស់មិត្តភក្តិ ទើបតែថ្ងៃកើតហេតុរូបជនសង្ស័យក៏បានធ្វើសកម្មភាពលួចយកម៉ូតូជនរងគ្រោះបានសម្រេច ហើយយកទៅទុកផ្ញើចោលនៅហាង 72 រួចក៏ទៅបាត់ លុះពេលដែលកើតហេតុខាងលើនេះ ម៉ោង៥ល្ងាចម្ចាស់ម៉ូតូហៅសង្ស័យមកសួរនាំ និងបានតេទៅប្រាប់សមត្ថកិច្ចប៉ុស្តិ៍ឬស្សីកែវ អោយចុះមកអន្តរាគមន៍រឿងនេះ ស្រាប់តែភ្លាមៗនោះដែលជនសង្ស័យក៏បានមកយកម៉ូតូវិញ ត្រូវសមត្ថកិច្ចធ្វើការក្របួចជាប់ភ្លាមៗតែម្តងយកទៅសួរនាំនៅប៉ុស្តិ៍ ។
ជនសង្ស័យបានឆ្លើយសារភាពប្រាប់សមត្ថកិច្ចទៀតថា ខ្លួនពិតជាលួចម៉ូតូមិត្តភក្តិពិត
មែន ដោយសារតែលេងល្បែងដល់ពេលសមត្ថកិច្ចសួរនាំដឹងរឿងថា មិនមែននៅទឹកដីរបស់គាត់ក៏ប្រគល់ទៅអោយសមត្ថកិច្ចប៉ុស្តិ៍ជ័យជំនះ ដើម្បីចាត់ការទៅតាមនីតិវិធី ចំនែកឯជនរងគ្រោះក៏បានទៅដាក់ពាក្យបណ្តឹង ដើម្បីឲ្យសមត្ថកិច្ចកសាងសំណុំរឿងបញ្ចូនទៅកាន់តុលាការចាត់ការទៅតាមច្បាប់ ៕(កែសម្រួលដោយ៖ សុឃាក់)
ចែករំលែកព័តមាននេះ