រាជធានីភ្នំពេញ ៖ មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជាបានស្នើឲ្យមន្ត្រីគ្រប់ស្ថាប័នរដ្ឋទាំងអស់ត្រៀបរៀបចំវាយបកចំពោះក្រុមអមិត្ត ដែលបំណងមិនល្អមកលើរាជរដ្ឋាភិបាលកម្ពុជា ។ លោកសុខ ឥសាន បានឲ្យដឹងនៅថ្ងៃទី២២ ខែឧសភាថា ជាការតស៊ូន យោបាយមួយសម្រាប់មន្ត្រីទាំងអស់ ចំពោះក្រុមអមិត្តដែលមានបំណងប្រឆាំង និងចោទមកលើរាជរដ្ឋាភិបាលស្របច្បាប់ ។
លោកបានគូសបញ្ជាក់ថា«ក្នុងសភាពការណ៍បច្ចុប្បន្ននេះការតស៊ូនយោបាយរវាងយើង និងកម្លាំងអមិត្តមានលក្ខណៈស្រួចស្រាវយ៉ាងខ្លាំង ដោយសារពួកអមិត្តខិតខំជាន់ពន្លិចការពិត និងភាពស្របច្បាប់របស់រាជរដ្ឋាភិបាលកម្ពុជាសព្វថ្ងៃ និងខិតខំស្រង់ខ្មោចលង់ទឹកនៃអតីតបក្សប្រឆាំងឲ្យបានរស់ឡើងវិញ» ។ ជាមួយគ្នានោះដែរក៏បានលើកឡើងថា ការវាយតម្លៃរបស់ពួកគេ និងមជ្ឈដ្ឋានអមិត្តផ្សេងទៀត គឺផ្អែកលើភាពលំអៀងខាងនយោបាយ និងមនោគមន៍វិជ្ជា ម្យ៉ាងទៀតអាចក្តាប់សភាពការណ៍ពិតនៅកម្ពុជាមិនបានគ្រប់ជ្រុងជ្រោយ ។
លោកបន្ថែមថា ដើម្បីដណ្តើមជោគជ័យលើសមរភូមិនយោបាយ ទាមទារគ្រប់ស្ថាប័នរដ្ឋ និងមន្ត្រីគណបក្ស និងរាជរដ្ឋាភិបាលកម្ពុជាឯកភាពជាធ្លុងមួយ លើខ្លឹមសារបកស្រាយវាយបកនិងឆ្លើយតបចំពោះការវាយប្រហាររបស់មជ្ឈដ្ឋានអមិត្តមកលើគណបក្សប្រជាជនកម្ពុជា និងរាជរដ្ឋាភិបាលកម្ពុជាឲ្យមានសម្លេងតែមួយគោលជំហរតែមួយនៅគ្រប់បញ្ហាដែលចោទឡើង ។
លោកសង្កត់ធ្ងន់ថា ដើម្បីសម្រេចជោគជ័យជូនបក្ស និងរាជរដ្ឋាភិបាលកម្ពុជាស្របច្បាប់របស់យើងគួរនៅគ្រប់ពេលប្រជុំតូចធំ បើអាចសូមឲ្យអ្នកនាំពាក្យស្ថាប័នពាក់ព័ន្ធបានចូលរួមផងដោយអនុគ្រោះ ។
សូមជម្រាបថា ការលើកឡើងរបស់អ្នកនាំពាក្យតំណាងរាស្ត្រសហរដ្ឋអាមេរិកបានទាមទាឲ្យរាជរដ្ឋាភិបាលកម្ពុជាបញ្ឈប់ការធ្វើបាបអតីតមន្ត្រីគណបក្សប្រឆាំង ។ ជាងនេះស្នើឲ្យមានដោះលែងលោកកឹម សុខា អតីតប្រធានគណបក្សសង្គ្រោះជាតិដែលកំពុងជាប់ឃុំនៅក្នុងផ្ទះមិនអាចសេរីភាពចេញខាងក្រៅបាន៕ (កែសម្រួលដោយ៖ សុឃាក់)
ចែករំលែកព័តមាននេះ