ខេត្តកំពង់ស្ពឺ ៖ ទីតាំងចម្រាញ់ប្រេងខ្មៅអត់ច្បាប់មួយកន្លែងត្រូវបានភ្លើងឆាបឆេះបង្កជាអគ្គិភ័យយ៉ាងសន្ធោសន្ធៅតែមិនបង្កអោយមានការឆាបឆេះដល់ផ្ទះប្រជាពលរដ្ឋនោះទេដោយសារតែនៅឆ្ងាយពីភូមិ ។ ករណីឆាបឆេះនេះដែរ សមត្ថកិច្ចបានចេញ រថយន្ត៣គ្រឿងទៅអន្តរាគមន៍ដោយបាញ់ទឹកពន្លត់អស់ជាច្រើនរថយន្ត ។
ហេតុការណ៍នេះកើតឡើងកាលពីវេលាម៉ោង៤និង៣០នាទីរសៀល ថ្ងៃទី២១ ខែឧសភា ឆ្នាំ២០១៩ ស្ថិតនៅចំណុចភូមិដំណាក់ត្រាចឃុំដំបូករូង ស្រុកភ្នំស្រួច ខេត្តកំពង់ស្ពឺ ។
ប្រភពពីសមត្ថកិច្ចបានអោយដឹងថា ក្រោយទទួលបានព័ត៌មានអំពីការឆេះនេះកម្លាំងសមត្ថកិច្ចជំនាញក្រោមការបញ្ជារបស់លោកស្នងការនគរបាលខេត្តការិយាល័យពន្លត់អគ្គិភ័យបានចេញអន្ដរាគមន៍ចំនួន៣គ្រឿងអន្តរាគមន៍យ៉ាងយកចិត្តទុកដាក់ ដើម្បីជួយសង្គ្រោះអោយទាន់ពេលវេលា ។
បើតាមលោកស្នងការបានបញ្ជាក់ថា ទីតាំងសិប្បកម្មស្លប្រេងម៉ាស៊ូតនេះ កាលពីពេលកន្លងទៅសមត្ថកិច្ចបានចុះបិទអាជីវកម្មរួចម្តងមកហើយ ដោយសារដំណើរការគ្មានការអនុញ្ញាត ។ មិនដឹងថា ក្រោយមកគេសុំច្បាប់បានវិញ ឬយ៉ាងណាក៏បើកដំណើរការវិញ ហើយកើតមានករណីនេះតែម្តង ។ តែបើតាមប្រជាពលរដ្ឋប្រាប់ទីតាំងនេះមិនបាបសុំច្បាប់នោះទេ គឺលួចបើកដំណើរការដោយស្ងាត់ៗរហូតកើតមានករណីអគ្គិភ័យនេះតែម្តង ។
បើតាមការសាកសួររបស់សមត្ថកិច្ចទៅលើអ្នកបំរើការ គឺពួកគេបានប្រាប់ថា បណ្តាលមកពីឆ្លងចរន្តភ្លើង ទើបបង្កអោយឆាបឆេះតែម្តង ។ មុនដំបូង គឺគេឃើញមានការទុស្សេខ្សែភ្លើងនៅក្បែរឡចម្រាញ់ ក្រោយមកក៏ឆាបឆេះបង្កអោយក្លាយជាអគ្គិភ័យយ៉ាងខ្លាំង ។ រហូតមកដល់ម៉ោង១៨និង១០នាទី ភ្លើងនៅមិនទាន់រលត់នៅឡើយទេ ដោយសមត្ថកិច្ចកំពុងបន្តការបាញ់ទឹកបន្ថែម ។ ទោះជាយ៉ាងណាចាត់ទុកថា សំណាងហើយដែលទីតាំងមួយនេះនៅឆ្ងាយពីភូមិដ្ឋានអ្នកស្រុក បើនៅជិតវិញមិនដឹងជា បង្កវិនាសកម្មបែបណានោះទេ ៕ (កែសម្រួលដោយ៖ សុឃាក់)
ចែករំលែកព័តមាននេះ