សហរដ្ឋអាមេរិក-អុីរ៉ង់ ៖ ប្រធានាធិបតីអាមេរិកលោកដូណាល់ត្រាំ បានព្រមានកាលពីថ្ងៃទី២០ ឧសភាចំពោះ អុីរ៉ង់ថា រាល់ការវាយប្រហារប្រឆាំងបណ្ដាផលប្រយោជន៍អាមេរិកនៅមជ្ឈឹមបូព៌ា នឹងផ្ដល់នូវចម្លើយតបមួយដែលនឹកស្មានមិនដល់ ដោយលោកគូសបញ្ជាក់ថា ក្រុងតេហេរ៉ង់បានបង្ហាញការប្រទូស្តរ៉ាយខ្លាំងបំផុតចំពោះក្រុងវ៉ាស៊ិនតោន។
នៅមុខបណ្ដាអ្នកកាសែតពេលលោកចាកចេញពីសេតវិមាន ទៅចូលរួមក្នុងព្រឹត្តិការណ៍មួយនៅរដ្ឋផេនស៊ីលវេនៀ លោកត្រាំនិយាយថាលោកត្រៀមពិភាក្សាជាមួយបណ្ដាតំណាងអុីរ៉ង់ បើពួកគេត្រៀមខ្លួនចរចា។ លោកបញ្ជាក់ថាពុំមានការចរចាណាមួយបានធ្វើក្នុងពេលបច្ចុប្បន្នឡើយ។ លោកបន្តថា អុីរ៉ង់នឹងមានការយល់ច្រឡំធ្ងន់ធ្ងរបំផុត បើហា៊នធ្វើការវាយប្រហារណាមួយ ប៉ុន្តែយើងពុំឃើញមានសញ្ញាណាមួយក្នុងន័យបែបនោះនៅឡើយ។
កាលពីថ្ងៃទី១៩ឧសភាលោកត្រាំបានគំរាមកម្ទេចអុីរ៉ង់ ៣ថ្ងៃក្រោយពីលោកប្រកាសថាសហរដ្ឋអាមេរិកពុំដើរឆ្ពោះទៅរកការធ្វើសង្គ្រាមមួយប្រឆាំងអុីរ៉ង់ឡើយ។ ចំណែកប្រធានាធិបតីអីុរ៉ង់លោកហាសាន់រ៉ូហានីនិយាយថា លោកចង់ឲ្យមានការចរចានិងការងារខាងការទូត ប៉ុន្តែពុំមែនក្នុងកាលៈទេសៈបច្ចុប្បន្នទេ។ លោកថា សភាពការណ៍មិនប្រសើរសម្រាប់ការចរចាឡើយ ហើយការជ្រើសរើសរបស់យើងមានតែការតស៊ូ៕ (កែសម្រួលដោយ ៖ បុប្ផា)
ចែករំលែកព័តមាននេះ