(កែសម្រួលដោយ ៖ ធីតា)
រាជធានីភ្នំពេញ ៖ រថយន្តក្រឡុកស៊ីម៉ង់ត៍មួយគ្រឿងបត់ឆ្លងផ្លូវបានបុកជាមួយម៉ូតូមួយគ្រឿងដែលជិះដោយកម្មការិនី២នាក់ បណ្តាលឱ្យកិនកម្មការីនីម្នាក់បែកក្បាលស្លាប់យ៉ាងអាណោចអាធ័មនៅនឹងកន្លែងកើតហេតុ និងម្នាក់ទៀតរងរបួសស្រាល។
គ្រោះថ្នាក់ចរាចរណ៍ខាងលើនេះបានបង្កឱ្យមានការភ្ញាក់ផ្អើលកើតឡើងកាលពីវេលាម៉ោងប្រមាណ១០ព្រឹកថ្ងៃទី២១ ខែឧសភា ឆ្នាំ ២០១៩ នៅតាមបណ្តោយផ្លូវភ្នំពេញហាណូយ ក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។
ភាគីខាងរថយន្តមួយគ្រឿងខាងលើម៉ាក FUSO ពណ៌ស ពាក់ស្លាកលេខ ភ្នំពេញ ៥A-២៣៤៩ ជារថយន្តក្រឡុកស៊ីម៉ងត៍របស់ក្រុមហ៊ុនបេតុងលាយស្រេច ដ្រេហ្គនស៊ីធី បើកបរដោយឈ្មោះហិន ឆេងហ៊ន់ ភេទប្រុស អាយុ២៩ឆ្នាំ មានទីលំនៅក្នុងសង្កាត់កន្ទោក ខណ្ឌពោធិ៍សែនជ័យ ត្រូវបានឃាត់ខ្លួន ។
ចំណែកភាគីខាងលើម៉ូតូមួយគ្រឿងជិះគ្នា២នាក់ ម៉ាកស្គូពី ពណ៌ស ពាក់ស្លាកលេខ កំពង់ឆ្នាំ ង ១H-៦៥៧៦ បើកបរដោយឈ្មោះ ស៊ុំ សុវ៉េត ភេទស្រី អាយុ១៩ឆ្នាំ ជាកម្មការីនី ស្នាក់នៅភូមិព្រៃព្រីង សង្កាត់ចោមចៅ៣ ខណ្ឌពោធិ៍សែនជ័យ និងមានស្រុកកំណើតភូមិ ទួលរការ ឃុំមេលំ ស្រុកបរិបូណ៌ ខេត្តកំពង់ឆ្នាំង បានស្លាប់នៅនឹងកន្លែងកើតហេតុ និងអ្នករួមដំណើរម្នាក់ឈ្មោះរឿង វិល័យ ភេទស្រី អាយុ២០ឆ្នាំ ជាកម្មការីនី បានរងរបួសស្រាល។ ជនរងគ្រោះទាំងនាក់ត្រូវជាបងប្អូនជីដូនមួយនឹងគ្នា ។
តាមប្រភពពីសាក្សីដែលឃើញហេតុការណ៍បានអោយដឹងថា នៅមុនពេលកើតហេតុ គេឃើញនារីរងគ្រោះទាំង២នាក់ជិះម៉ូតូមួយគ្រឿងម៉ាកស្គូពី ធ្វើដំណើរតាមផ្លូវភ្នំពេញហាណូយ ក្នុងទិសដៅពីជើងទៅត្បូង លុះពេលមកដល់ចំណុចកើតហេតុខាងលើ ស្រាប់តែមានរថយន្តក្រឡុកស៊ីម៉ង់ត៍មួយគ្រឿងដែលធ្វើដំណើរក្នុងទិសដៅពីត្បូងទៅជើង ហើយបត់ឆ្វេងឆ្លងផ្លូវមកបុកនិងកិន បណ្តាលអោយនារីជាអ្នកបើកបរម៉ូតូស្លាប់ភ្លាមៗនៅនឹងកន្លែងកើតហេតុ និងនារីម្នាក់ទៀតជាអ្នករួមដំណើរបានរងរបួសស្រាល ។
តាមប្រភពព័ត៌មានដដែលបានបន្តថា ភ្លាមៗនោះអ្នកបើកបររថយន្តក្រឡុកស៊ីម៉ង់ត៍ព្យាយាមបើកគេច ទៅមុខបានប្រមាណ៤០ម៉ែត្រ ក៏ត្រូវនគរបាលឃាត់ខ្លួនតែម្តង ។
តាមប្រភពពីនារីម្នាក់ដែលរងរបួសស្រាលបានអោយដឹងថា នៅព្រឹកថ្ងៃកើតហេតុ គាត់និងប្អូនជីដូនមួយ(នារីរងគ្រោះដែលស្លាប់) បានធ្វើដំណើរមកពីស្រុក ក្នុងគោលបំណងទៅធ្វើការ ក៏ជួបគ្រោះថ្នាក់ត្រូវរថយន្តបើកមកបុក និងកិនប្អូនជីដូនមួយ បណ្តាលអោយស្លាប់តែម្តង ។
ក្រោយពេលកើតហេតុ សពនារីរងគ្រោះម្នាក់ត្រូវបានក្រុមគ្រួសារដឹកយកទៅធ្វើបុណ្យតាមប្រពៃណីនៅឯស្រុកកំណើត ។ ចំណែកអ្នកបើកបររថយន្តនិងរថយន្ត ព្រមទាំងម៉ូតូត្រូវបាននគរបាលបញ្ជូនទៅកាន់ការិយាល័យ ដើម្បីកសាងសំណុំរឿងចាត់ការតាមច្បាប់៕
ចែករំលែកព័តមាននេះ