កែសម្រួលដោយ៖ (សុឃាក់)
រាជធានីភ្នំពេញ ៖ គណបក្សហ្វ៊ុន ស៊ិនប៉ិចបានអះអាងថា ខ្លួនគ្មានជំហរក្នុងការចរចានយោបាយណាមួយ ដើម្បីរួបរួមជាមួយគណបក្សខ្មែរួបរួមជាតិនោះទេ ប៉ុន្តែបើកទ្វារស្វាគមន៍ចំពោះសមាជិកសមាជិកាណាដែលចង់ចូលរួមជាមួយខ្លួន ។ នេះបើតាមអ្នកនាំពាក្យគណបក្សនេះ ។
លោកណុប សុធារិទ្ធិ អ្នកនាំពាក្យគណបក្សហ្វ៊ន ស៊ិនប៉ិច បានឲ្យកោះសន្តិភាពដឹងតាម ទូរស័ព្ទ នៅថ្ងៃទី២១ ខែឧសភានេះយ៉ាងដូច្នេះបញ្ជាក់ថា «រហូតមកដល់ពេលនេះគណបក្សហ្វ៊ុន ស៊ិនប៉ិចមិនទាន់មានការប្រកាសជាផ្លូវការណាមួយនៃចងសម្ព័ន្ធភាព ឬការចរចាជាមួយគណបក្សខ្មែរួបរួមជាតិនៅឡើយទេ» ។ លោកបានអះអាងថា មកដល់ពេលនេះមិនទាន់មានសញ្ញាឬការជួបគ្នារវាងថ្នាក់ដឹកនាំគណបក្សទាំងពីរ ដើម្បីឲ្យមានការចរចាគ្នានោះទេ ទោះបីថ្នាក់ដឹកនាំគណបក្សខ្មែររួបរួមជាតិចង់មានការចងសម្ព័ន្ធយ៉ាងណាក្តី ហើយគណបក្សហ្វ៊ុន ស៊ិនប៉ិច ស្វាគមន៍ចំពោះសមាជិកសមាជិកាបក្សនយោបាយចូលរួម ។
លោកបញ្ជាក់ថា «គណបក្សហ្វ៊ុន ស៊ិនប៉ិច បើកទ្វារស្វាគមន៍ចំពោះសមាជិកសមាជិកាណាដែលមានបំណងបំរើនយោបាយជាមួយគណបក្សហ្វ៊ុនស៊ិនប៉ិច ។ ប៉ុន្តែគណបក្សគ្មានគោលជំហរណាមួយចរចាជាមួយគណបក្សខ្មែររួមជាតិនោះទេ» ។ ចំណែកលោក រុនមាត្រា អ្នកនាំពាក្យគណបក្សខ្មែររួមរួបជាតិវិញបានលើកឡើងថា កន្លងមកថ្នាក់ដឹកនាំគណបក្សរួបរួមជាតិបានព្យាយាមធ្វើទំនាក់ទំនងជាមួយថ្នាក់ដឹកនាំគណបក្សហ្វ៊ុន ស៊ិនប៉ិចដែរ ប៉ុន្តែមិនបានជួបនោះទេ ។
ប៉ុន្តែក្រោយមកថ្នាក់ដឹកនាំគណបក្សខ្មែររួបរួមជាតិបានសម្រេចទុកការពិភាក្សារឿងចងសម្ព័ន្ធគ្នាមួយរយៈសិន ដើម្បីទុកពេលរៀបចំការចូល រួមបោះឆ្នោតក្រុមប្រឹក្សាសិន ។ លោកបញ្ជាក់ថា៖«ថ្នាក់ដឹកនាំយើងកន្លងមកនេះបានទំនាក់ទំនង ដើម្បីជួបដែរ ប៉ុន្តែមិនបានជួប ។ អីញ្ចឹងតាមការប្រជុំកន្លងមកនេះយើងបានទុកការពិភាក្សានៃការរួបរួមគ្នាមួយផ្នែកសិន ដោយគិតពីការបោះឆ្នោតក្រុមប្រឹក្សាសិន» ។ យ៉ាងណាក្តីគណបក្សខ្មែររួបរួមជាតិបង្ហាញចេតនាចង់រួបរួមគ្នាជាមួយគណបក្សហ្វ៊ុន ស៊ិនប៉ិច រហូតដើម្បីរួបរួមអ្នករាជានិយមឡើងវិញ ។ អ្នកនាំពាក្យដដែលបញ្ជាក់ថា«ចេតនារបស់យើងនៅតែចង់រួបរួមពីព្រោះគ្មានអ្វីល្អជាងការសាមគ្គីមហាគ្រួសារជួបជុំគ្នានោះទេរវាងអ្នករាជានិយម» ។
ជាមួយគ្នានោះដែរអ្នកនាំពាក្យដដែលក៏បានលើកឡើងថា ការបែកបាក់គ្នារវាងរបស់គណបក្សខ្មែររួមរួមជាតិចេញពីគណបក្សហ្វ៊ុន ស៊ុនប៉ិច គឺជាមេរៀនម្តង ពីដង ជាបីដងមកហើយ ហើយដល់ពេលត្រូវបញ្ចប់ហើយ ។ លោកក៏បានស្នើឲ្យថ្នាក់ដឹកនាំទាំងពីរគណបក្ស(គណបក្សហ្វ៊ុន ស៊ិនប៉ិច និងគណបក្សខ្មែររួបរួមជាតិ) គួរយល់ពីសមាជិកនៅតាមមូលដ្ឋានដែលចង់មើលការរួបរួមរបស់ថ្នាក់ដឹកនាំទាំងអស់ ដើម្បីចូលរួមប្រកួតប្រជែងក្នុងការបោះឆ្នោតឃុំ សង្កាត់នៅឆ្នាំ២០២២ខាងមុខនេះ ។
សូមជម្រាបថា គណបក្សខ្មែររួបរួមជាតិបានបែកចេញពីគណបក្សហ្វ៊ុន ស៊ិនប៉ិច ដោយសារមានជំលោះផ្ទៃក្នុងគណបក្សអស់រយៈពេលជាង១អាណត្តិមកហើយ៕
ចែករំលែកព័តមាននេះ