(កែសម្រួលដោយ៖ ស្រីណា)
ខេត្តបាត់ដំបង ៖ មានការអះអាងថា មន្ត្រីយោធាម្នាក់បានទាញកាំភ្លើងអាកាបាញ់សម្លាប់ខ្លួនឯង នៅក្នុងបន្ទាយរបស់ខ្លួន ដែលមានទីតាំងស្ថិតនៅភូមិកំប្រ៉ង់ ឃុំតាក្រី ស្រុកកំរៀង កាលពីវេលាម៉ោង១និង៣នាទីរសៀលថ្ងៃទី២០ ឧសភា តែមេបញ្ជាការកងពលនេះ មិនអនុញ្ញាតឲ្យសមត្ថកិច្ចជំនាញចូលត្រួតពិនិត្យ និងសួរនាំឡើយ ។
យោងតាមសេចក្ដីរាយការណ៍បានឲ្យដឹងថា ជនរងគ្រោះឈ្មោះឡុច បញ្ញា ជាមន្ត្រីយោធានៅអង្គភាពកងពលតូចលេខ៥៣ ដែលមានទីតាំងនៅក្នុងភូមិ-ឃុំខាងលើ ។ ប្រភពដដែលឲ្យដឹងទៀតថា មន្ត្រីរូបនេះបានដើរចូលទៅក្នុងឃ្លាំងទុកអាវុធ រួចទាញយកកាំភ្លើងអាកា៤៧បាញ់សម្លាប់ខ្លួនឯងចំនួន៤គ្រាប់ បណ្ដាលឲ្យដូលស្លាប់ភ្លាមៗតែម្ដង។
គេមិនអាចដឹងពីមូលហេតុជាក់លាក់ ដែលនាំឲ្យមន្ត្រីយោធារូបនេះ ធ្វើអត្តឃាតបែបនេះទេ ព្រោះមេបញ្ជាការកងពលនេះមិនអនុញ្ញាត ឲ្យសមត្ថកិច្ចជំនាញចូលពិនិត្យសាកសព ឬ សាកសួរព័ត៌មានឡើយ តែមន្ត្រីនៅក្នុងអង្គភាពនេះអះអាងថា ជនរងគ្រោះកើតរោគសរសៃប្រសាទ ហើយការបាញ់សម្លាប់ខ្លួននេះ ក៏មានសាក្សីម្នាក់បានឃើញផ្ទាល់ដែរ។
មន្ត្រីយោធាម្នាក់ឈ្មោះធិប ខុម ដែលអះអាងថា ខ្លួនបានស្ថិតក្នុងហេតុការណ៍នោះផ្ទាល់ បាននិយាយថា ដំបូងខ្លួនបានដើរទៅចាក់សោរទ្វារឃ្លាំងទុកអាវុធ ដើម្បីបោសសំអាត។ ប៉ុន្តែពេលខ្លួនកំពុងបោស ហើយកើបសម្រាមយកទៅចោលនៅខាងក្រៅ ស្រាប់តែឈ្មោះឡុច បញ្ញា រត់ចូលទៅក្នុងឃ្លាំងទាញកាំភ្លើងអាកាបាញ់សម្លាប់ខ្លួនឯងតែម្ដង។ សាក្សីរូបនេះត្រូវបានគេស្រង់សំដីទៀតថា ពេលនោះខ្លួនឮសំលេងផ្ទះចំនួន៤គ្រាប់ លុះខ្លួនចូលទៅមើលឃើញជនរងគ្រោះដេកស្លាប់ក្នុងថ្លុកឈាមទៅហើយ ទើបខ្លួនរាយការណ៏ប្រាប់មេបញ្ជាការភ្លាមៗដែរ ។
ជុំវិញការស្លាប់របស់មន្ត្រីយោធាខាងលើនេះ បើតាមសមត្ថកិច្ចបានឲ្យដឹងថា មេបញ្ជាការកងពលតូចលេខ៥៣ នេះបានហាមប្រាមកូនចៅ មិនអនុញ្ញាតឲ្យសមត្ថកិច្ចចូលសួរនាំឬពិនិត្យសាកសពជនរងគ្រោះឡើយ ដោយមេបញ្ជាការកងពលនេះអះអាងថា «ការស្លាប់នេះគឺអង្គភាពជាអ្នកទទូលខុសត្រូវ»។
កោះសន្តិភាព មិនអាចទំនាក់ទំនង សុំការបំភ្លឺបន្ថែមពីមន្ត្រីយោធាក្នុងអង្គភាពនេះ ឬ ពីលោកជា ភូងភារម្យ មេបញ្ជាការកងពលតូចលេខ៥៣ នេះបាននៅឡើយទេនៅព្រឹកថ្ងៃទី២១ ខែឧសភា នេះ។ ប៉ុន្តែលោកឧត្តមសេនីយត្រី ជេត វណ្ណនី ស្នងការរងខេត្តបានប្រាប់ថា ពិតជាមានករណីនេះមែន តែសមត្ថកិច្ចមិនត្រូវបានគេអនុញ្ញាតឲ្យចូលក្នុងបន្ទាយដើម្បីត្រូតពិនិត្យ ឬសួរនាំនោះទេ។
លោកជេត វណ្ណនី បានបញ្ជាក់ថា រហូតដល់ពេលនេះ យើងមិនមានរបាយការណ៍ស្ដីអំពីមន្ត្រីយោធាស្លាប់ក្នុងបន្ទាយកងពលលេខ៥៣ឡើយ ព្រោះខាងយោធាមិនឲ្យសួរនាំឬពិនិត្យសាកសព ដោយមេបញ្ជាការយោធានេះអះអាងថា អង្គភាពជាអ្នករ៉ាប់រងទទូលខុសជុំវិញការស្លាប់នេះ។ ដូច្នេះ ខាងសមត្ថកិច្ចជំនាញ មិនមានរបាយការណ៍ ហើយក៏មិនបានចាត់ការបែបណាលើករណីនេះដែរ៕
ចែករំលែកព័តមាននេះ