រាជធានីភ្នំពេញ ៖ ជនសង្ស័យម្នាក់ជាមុខសញ្ញាដើរលួចតាមផ្ទះបានប្រទះឃើញកង់មួយគ្រឿងរបស់ក្មេងស្រីម្នាក់ ហើយក៏ធ្វើសកម្មភាពលួច តែត្រូវបងប្រុសរបស់ជនរងគ្រោះឃើញទាន់រត់ដេញតាមចាប់បាន រួចប្រគល់អោយសមត្ថកិច្ចប៉ុស្តិ៍បឹងរាំងដើម្បីសួរនាំ ។
ហេតុការណ៍ខាងលើនេះបង្កឱ្យមានការភ្ញាក់ផ្អើលកាលពីវេលាម៉ោង៨និង៣០នាទីយប់ថ្ងៃទី២០ ខែឧសភា ឆ្នាំ២០១៩ តាមបណ្តោយផ្លូវ២០៨កែងផ្លូវព្រះមុនីវង្ស នៅចំណុចភោជនីដ្ឋានតាយតាយចាស់ ស្ថិតនៅក្នុងសង្កាត់បឹងរាំង ខណ្ឌដូនពេញ ។
ជនសង្ស័យម្នាក់ខាងលើឈ្មោះពេជ្រ ភេទប្រុស អាយុ២២ឆ្នាំ ស្នាក់នៅម្តុំផ្សារតាប៉ាង សង្កាត់ផ្សារថ្មី3 ខណ្ឌដូនពេញ ។
តាមប្រភពព័ត៌មានពីបងប្រុសរបស់ជនរងគ្រោះសុំមិនបញ្ចេញឈ្មោះបានអោយដឹងថា មុនពេលកើតហេតុប្អូនស្រីរបស់គាត់បានយកកង់មួយគ្រឿងទៅទុកនៅក្រោមផ្ទះត្រង់ចំណុចកើតហេតុខាងលើរួចឡើងផ្ទះមួយភ្លែត ស្រាប់តែលេចមុខជនសង្ស័យចំនួន២នាក់ ក្នុងនោះជនសង្ស័យម្នាក់មានឈ្មោះដូចខាងលើ និងម្នាក់ទៀតមិនស្គាល់អត្តសញ្ញាណនោះទេ បានធ្វើសកម្មភាពចូលទៅលួចកង់ប្អូនស្រីរបស់គាត់ ប៉ុន្តែមិនបានសម្រេចនោះទេ ដោយសារតែគាត់ប្រទះឃើញទាន់ ទើបធ្វើឱ្យជនសង្ស័យភ័យរត់ចែកជើងគ្នា ។
តាមប្រភពដដែលបានបន្តថា ភ្លាមៗនោះដែរ គាត់បានរត់ដេញតាមជនសង្ស័យដែលមានឈ្មោះដូចខាងលើរហូតដល់ផ្លូវ១៨៤កែងផ្លូវព្រះនរោត្តម ត្រូវបានប្រជាពលរដ្ឋ រួមទាំងគាត់ តាមទាន់រួចក៏វាយជនសង្ស័យម្នាក់មួយដៃម្នាក់មួយជើង រួចប្រគល់ទៅអោយសមត្ថកិច្ចប៉ុស្តិ៍បឹងរាំងដើម្បីយកទៅសួរនាំ ចំនែកឯជនសង្ស័យម្នាក់ទៀតបានរត់គេចខ្លួនបាត់ស្រមោល ។
ក្រោយពេលកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍បឹងរាំងដើម្បីអោយសមត្ថកិច្ចធ្វើតាមច្បាប់៕
ចែករំលែកព័តមាននេះ