រាជធានីភ្នំពេញ ៖ សម្តេចតេជោ ហ៊ុន សែន នាយរដ្ឋមន្ត្រីបានបង្ហាញរូបថតមួយសន្លឹកដែលផ្សងនឹងគ្រោះថ្នាក់ ដើម្បីរកសន្តិភាពជួនប្រទេសដែលអ្នកកាសែតបរទេសផ្តល់ជូន ។ យោងតាមបណ្តាញសង្គមរបស់សម្តេចតេជោ នៅថ្ងៃទី២១ ឧសភានេះ អមដោយរូបថតមួយសន្លឹកសម្តេចសរសេរយ៉ាងដូច្នេះថា ៖«រូបថតមួយសន្លឹកនេះ បើពិនិត្យឡើងវិញវាហាក់ដូចជា ការផ្សងព្រេងដ៏មានគ្រោះថ្នាក់ តែសម្រាប់ខ្ញុំ និងសហការីគិតថា វាជាមោទនភាពដែលយើងបានយកជីវិតទៅដូរយកសន្តិភាពសម្រាប់ប្រជាជនកម្ពុជា» ។
លោកបន្តថា ៖«មានមនុស្សមិនច្រើនទេ ដែលដឹងរឿងនេះ សូម្បីតែខ្ញុំក៏ទើបរកឃើញរូបថតមួយសន្លឹកដែលអតីតអ្នកកាសែតជនជាតិបែលហ្សិក បានប្រគល់អោយខ្ញុំ កាលពីថ្ងៃអាទិត្យនេះដែរ ។ ថ្ងៃ១៩ កញ្ញា ឆ្នាំ១៩៨៩ ខ្ញុំ និងប្រតិភូបានធ្វើដំណើរជាសម្ងាត់ទៅកាន់ប្រទេសថៃ ដោយឆ្លងកាត់ស្ពានតាមផ្លូវរថភ្លើងនៅប៉ោយប៉ែត ដែលពេលនោះសងខាងផ្លូវទាំងខាងកម្ពុជា ទាំងខាងថៃសុទ្ធតែជាចំការម៉ីន ។ ជាងនេះទៅទៀតនៅសងខាងផ្លូវប្រមាណ១គីឡូម៉ែត្រ គឺមានកងទ័ពត្រីភាគីចាំវាយប្រហារគ្រប់ពេលមកលើកងទ័ពរដ្ឋកម្ពុជា ដែលនៅឈរជើងតាមផ្លូវជាតិលេខ៥» ។ សម្តេចក៏បានសរសេរទៀតថា ប៉ោយប៉ែតពេលនោះមានផ្ទះបែកបាក់តែមួយខ្នង នៅក្បាលស្ពានខាងកម្ពុជា ក្រៅពីនោះ គឺសុទ្ធតែព្រៃត្រែង ។
សម្តេចក៏រៀបពីសកម្មភាពរូបថតនោះថា «យើងឆ្លងព្រំដែននៅម៉ោងប្រមាណ២រសៀល ដោយមិនទាន់ទទួលទានអាហារថ្ងៃត្រង់នៅឡើយ ។ អ្នករួមដំណើរជាមួយខ្ញុំឆ្លងកាត់ស្ពាន នេះមានសម្តេច ទៀ បាញ់ ឯកឧត្តម ចម ប្រសិទ្ធ ឯកឧត្តមចាន់ អ៊ាន ឯកឧត្តម ខាំពូន កែវមុនី និងឧត្តមសេនីយ ឡុង សុភាព ដែលពេលនោះកាន់មុខតំណែងជាមេបញ្ជការយោធភូមិភាគទី៤ ដឹកនាំកម្លាំងការពារដំណើររបស់ខ្ញុំ (ឡុង សុភាព បានមរណភាពទៅហើយ) ។ ក្រៅពីខាងកម្ពុជាមានឧត្តមសេនីយកងទ័ពថៃម្នាក់ឈ្មោះប៊ុន ឡត រួមដំណើរដើម្បីសម្រួលដំណើរយើង ឆ្លងកាត់ព្រំដែន និងទំនាក់ទំនងជាមួយខាងភាគីថៃ» ។ សម្តេចបន្ថែមថា តើជាបេសកម្មអ្វីទើបសម្ងាត់បែបនេះ ? ខ្ញុំបានដាក់ចេញនូវនយោបាយមួយ គឺ (អាក្រិតូបនីយកម្មកម្លាំងប្រដាប់អាវុធ និងរដ្ឋបាលថៃ) សំដៅទប់ស្កាត់ និងកាត់បន្ថយការជួយរបស់ថៃចំពោះខ្មែរក្រហម និងត្រីភាគីដូចនេះ ហើយទើបមានការជួបគ្នាជាសម្ងាត់រវាងខ្ញុំជាមួយឯកឧត្តមឆាវវ៉ាលិត យង់ឆៃយុទ្ធ ដែលជាមេទ័ពជើងគោកដ៏មានឥទ្ធិពលរបស់ថៃនៅថ្ងៃ២៧ តុលា ១៩៨៨ នៅទីក្រុងវៀងច័ន្ធ ប្រទេសឡាវ ។ ឆ្លងកាត់ជំនួបនេះទើបមានទស្យនៈកិច្ចរបស់ខ្ញុំ ដោយបើកចំហនាទីក្រុងបាងកក ខែមករា ១៩៨៩ ។
សម្តេចគូសញ្ជាក់ឲ្យដឹងទៀតថា៖«ខ្ញុំធ្វើដំណើរទៅបាងកកជាសម្ងាត់នៅថ្ងៃទី១៩ កញ្ញា ១៩៨៩ ពេលនោះទាក់ទងរវាងសង្គ្រាម និងសន្តិភាពនៅកម្ពុជាដែលអាចចាត់ទុកថា ជាផ្នែក មួយនៃការស្វែងរកសន្តិភាពសម្រាប់កម្ពុជា ។ ខ្ញុំ និងប្រតិភូឆ្លងដែននៅម៉ោងប្រហែល២រសៀលទៅបាយនៅអារញ្ញប្រាថេត ជាមួយអគ្គបញ្ជាការរងកងទ័ពថៃ រួចហើយបន្តដំណើរតាមឧទ្ធម្ភាគ ចក្រទៅទីក្រុងបាងកកចចារជាសម្ងាត់ជាមួយនាយករដ្ឋមន្ត្រីថៃ ឆាតឆៃ ឈុនហាវ៉ាន់ និងមេទ័ពជើងគោកថៃ ឆាវវ៉ាលិត យង់ឆៃយុទ្ធ នាល្ងាចថ្ងៃទី១៩ តុលា ១៩៨៩ ។ ទំនាក់ទំនងរវាងខ្ញុំជាមួយមេដឹកនាំថៃកាន់តែប្រសើរដែលនាំដល់ជោគជ័យនៃនយោបាយឈ្នះ-ឈ្នះ របស់ខ្ញុំនាពេលក្រោយមកទៀត»៕
ចែករំលែកព័តមាននេះ