រដ្ឋធានីវាស៊ីនតោន ៖ យោងតាមភ្នាក់ងារសារព័ត៌មាន AFP កាលពីថ្ងៃសៅរ៍កន្លងមកបានឲ្យដឹងថា លោកប្រធានាធិបតីដូណាល់ត្រាំបានប្រកាសនៅថ្ងៃសុក្រពីកិច្ចព្រមព្រៀងមួយស្តីពីការដកពន្ធអាមេរិកលើការនាំចូលដែកថែប និងអាលុយមីញ៉ូមពីប្រទេសកាណាដា និងម៉ិកស៊ិក។
លោកប្រធានាធិបតីត្រាំបាននិយាយថា «ខ្ញុំរីករាយនឹងប្រកាសថាពួកយើងទើបតែសម្រេចបានកិច្ចព្រមព្រៀងមួយជាមួយកាណាដានិងម៉ិកស៊ិក ហើយនឹងលក់ផលិតផលរបស់ពួកយើងទៅកាន់ប្រទេសទាំងនេះដោយមិនមានការដាក់ពន្ធ»។
លោកមានប្រសាសន៍ដូចនេះមិនយូរប៉ុន្មានបន្ទាប់ពីកាណាដាបានចេញកិច្ចព្រមព្រៀងរវាងកាណាដានិងសហរដ្ឋអាមេរិកដែលព្រមព្រៀងគ្នាពីការលុបបំបាត់ពន្ធអាមេរិកលើដែកថែបនិងអាលុយមីញ៉ូម និងវិធានឆ្លើយតបពីកាណាដា ក្នុងរយៈពេលមិនយូរជាងពីរថ្ងៃ ។ ប្រទេសម៉ិកស៊ិកក៏បានបញ្ជាក់ថាពួកគេក៏បានសម្រេចបានកិច្ចព្រមព្រៀងស្រដៀងគ្នាជាមួយនឹងសហរដ្ឋអាមេរិកផងដែរ។
គួរបញ្ជាក់ថា សហរដ្ឋអាមេរិកបានដាក់ពន្ធ២៥%លើដែកថែប និង ១០%លើអាលុយមីញ៉ូមកាលពីឆ្នាំមុន ហើយវាបានក្លាយជាឧបសគ្គដ៏ធំមួយសម្រាប់ការផ្តល់សច្ចាប័នកិច្ចព្រមព្រៀងពាណិជ្ជកម្មអាមេរិកខាងជើងថ្មីរវាងប្រទេសទាំងបី ។ ជាដំបូង កាណាដា និងម៉ិកស៊ិកមិនមានឈ្មោះក្នុងបញ្ជីប្រទេសជាប់ពន្ធទេ ប៉ុន្តែបន្ទាប់ពីត្រូវបានដាក់បញ្ចូលហើយ ប្រទេសជិតខាងទាំងពីរបានចេញវិធានការឆ្លើយតបជាច្រើនលើផលិតផលអាមេរិក ។
បើទោះជាបន្ទាប់ពីកិច្ចព្រមព្រៀងពាណិជ្ជកម្មរវាងសហរដ្ឋអាមេរិកម៉ិកស៊ិក និងកាណាដា (USMCA) ត្រូវបានសម្រេចពិតមែនក្តី ពន្ធទាំងនេះនៅតែមានដដែល។ យ៉ាងណាក្តី មន្ត្រីរដ្ឋាភិបាលកាណាដា និងម៉ិកស៊ិកបាននិយាយថាពួកគេនឹងមិនផ្តល់សច្ចាប័នដល់កិច្ចព្រមព្រៀងនេះឡើយលុះត្រាតែសហរដ្ឋអាមេរិកលុបបំបាត់ពន្ធទាំងនេះចេញ ៕
ចែករំលែកព័តមាននេះ