ប្រទេសវៀតណាម៖ ភ្នាក់ងារសារព័ត៌មាន Viet Nam News បានរាយការណ៍មកកាលពីថ្ងៃសៅរ៍ ថាការនាំចេញវាយនភ័ណ្ឌ និងសម្លៀកបំពាក់វៀតណាមទៅកាន់ទីផ្សារដែលជាសមាជិកកិច្ចព្រមព្រៀងភាពដៃគូពាណិជ្ជកម្មឆ្លងសមុទ្រប៉ាស៊ីហ្វិក (CPTPP) មិនមានខ្ពស់សាកសមនឹងឈ្មោះជាប្រទេសនាំចេញសម្លៀកបំពាក់ធំជាងគេលេខពីររបស់ប្រទេសទេ។
លោក Le Tian Truong ដែលជាប្រធានគ្រប់គ្រងរបស់ក្រុមហ៊ុន Viet Nam National Textile and Garment Group (Vinatex) បានមានប្រសាសន៍ដូចខាងលើនៅសិក្ខាសាលាមួយក្នុងប្រទេសកាណាដាកាលពីថ្ងៃព្រហស្បត្តិ៍។
លោក Troung បានឲ្យដឹងថា តម្រូវការវាយនភ័ណ្ឌនិងសម្លៀកបំពាក់សរុបក្នុងសមាជិកប្រទេសក្នុងកិច្ចព្រមព្រៀងខាងលើស្មើប្រមាណ៨៣ប៊ីលានដុល្លារក្នុងមួយឆ្នាំ។ កាលពីឆ្នាំ ២០១៨ វៀតណាមនាំចេញវាយនភ័ណ្ឌនិងសម្លៀកបំពាក់ទៅកាន់ទីផ្សារ CPTPP បានតែ៥.៣ប៊ីលានដុល្លារប៉ុណ្ណោះ។ តម្រូវការវាយនភ័ណ្ឌនិងសម្លៀកបំពាក់របស់ប្រតេសកាណាដាស្មើប្រមាណពី១៣ទៅ១៤ប៊ីលានដុល្លារក្នុងមួយឆ្នាំផងដែរ ប៉ុន្តែវៀតណាមផ្គត់ផ្គង់បានតែ ៥%ប៉ុណ្ណោះ ។
លោក Truong បានបន្ថែមថា ក្រុមហ៊ុននាំចេញវៀតណាមនៅតែអាចបង្កើនការនាំចេញរបស់ពួកគេទៅកាន់កាណាដាជាពិសេសព្រោះប្រទេសទាំងពីរបានផ្តល់សច្ចាប័នដល់កិច្ចព្រមព្រៀង CPTPP ហើយ ។
លោកបានបន្ថែមថា អាជីវកម្មទាំងអស់មានឱកាសក្នុងការទទួលបានគោលនយោបាយពន្ធល្អជាងនេះទៀតប្រសិនបើពួកគេសម្រេចវិធានប្រភពដើមផលិតផលបាន។ ដូច្នេះ Vinatexបានរៀបចំសកម្មភាពលើកស្ទួយការធ្វើពាណិជ្ជកម្មក្នុងឆ្នាំ ២០១៨ និង២០១៩ ដើម្បីជួបនឹងក្រុមហ៊ុននាំចូលក្នុងប្រទេសកាណាដា។
លោក David Ostroff ដែលជាប្រធានក្រុមហ៊ុន David O International បានយល់ស្របថាមានសក្តានុពលច្រើនសម្រាប់ការសហការរវាងប្រទេសទាំងពីរព្រោះតែប្រទេសវៀតណាមមានភាពប្រកួតប្រជែងផ្នែកតម្លៃ និងវប្បធម៌អាជីវកម្មដែលមានសណ្តាប់ធ្នាប់ និងប្រសិទ្ធិភាពផងដែរ ៕
ចែករំលែកព័តមាននេះ