ប្រទេសថៃ៖ ភ្នាក់ងារសារព័ត៌មាន Bangkok Post បានឲ្យដឹងថា គណៈកម្មាធិការគោលនយោបាយច្រករបៀងសេដ្ឋកិច្ចខាងកើត (EEC) របស់ប្រទេសថៃកំពុងតែផ្តោតសំខាន់លើបង្កើនវិធានការដើម្បីដោះស្រាយបញ្ហាកង្វះពលករមានជំនាញក្នុងខេត្ត Rayong, Chon Buri, និង Chachoengsao ក្នុងគម្រោង EEC ។ យោងទៅតាមការស្ទង់មតិថ្មីៗរបស់ការិយាល័យ EEC បានឲ្យដឹងថាតម្រូវការពលករក្នុង EEC នឹងស្មើច្រើនជាង ៤៧៥,០០០នាក់ទៅទៀតក្នុងរយៈពេល៥ឆ្នាំទៀត ។
យោងទៅតាមការព្យាករណ៍របស់ការិយាល័យខាងលើបានឲ្យដឹងទៀតថា ៦០%នៃការងារចំនួន ៤៧៥,០០០កន្លែងនឹងត្រូវបានបង្កើតឡើងក្នុងឆ្នាំ ២០២៣ ហើយអាចបំពេញបានដោយពលករជំនាញទាប ប៉ុន្តែ ៤០% ទៀតត្រូវតែបំពេញដោយពលករជំនាញខ្ពស់ដែលយ៉ាងតិចណាស់ក៏មានបរិញ្ញាប័ត្រ និងអនុបណ្ឌិតដែរ ។ ពលករជំនាញខ្ពស់ទាំងនេះភាគច្រើនត្រូវការក្នុងវិស័យទិន្នន័យដូចជាយានយន្តជំនាន់ថ្មី និងវិស័យ AI ជាដើម ។
របាយការណ៍ខាងលើបានព្យាករណ៍ទៀតថា វិស័យទិន្នន័យនឹងត្រូវការហ្វឹកហាត់ពលករថ្មីៗប្រមាណ ១១៦,០០០នាក់ដើម្បីបន្តដំណើរការនិងលូតលាស់ ខណៈដែលផ្នែកយានយន្តជំនាន់ក្រោយ ត្រូវការ ៥៨,០០០នាក់ និងវិស័យ AI ត្រូវការ ៥៣,០០០នាក់ជារៀងរាល់ឆ្នាំ ។
លោក Apichart Thongyou ដែលជាប្រធានមជ្ឈមណ្ឌលអភិវឌ្ឍន៍ធនធានមនុស្សរបស់ EEC (EECHDC) បានឲ្យដឹងថា «វិនិយោគិនកាន់តែច្រើនក្នុង EEC កំពុងតែប្រើប្រាស់បច្ចេកវិទ្យាទំនើបៗដែលត្រូវការកម្រិតចំណេះដឹងដើម្បីដំណើរការបាន» ។
ដើម្បីដោះស្រាយបញ្ហានេះ ការិយាល័យ EEC បានបង្កើត EECHDC កាលពីឆ្នាំមុនដើម្បីបង្កើតយុទ្ធសាស្ត្រហ្វឹកហាត់ពលករមានជំនាញបន្ថែមដើម្បីជួបនឹងតម្រូវការក្នុងខេត្តទាំងបីខាងលើ ។ មកដល់បច្ចុប្បន្ននេះ លោក Apichart បាននិយាយថា អាណាព្យាបាលថៃភាគច្រើននៅតែមើលងាយការអប់រំជំនាញជីវៈ ហើយមានមនុស្សជាច្រើនគិតថាវាជាការងារដែលកខ្វក់ ពិបាក និងគ្រោះថ្នាក់ ៕
ចែករំលែកព័តមាននេះ