រាជធានីភ្នំពេញ ៖ មានរយៈពេល៤០ឆ្នាំហើយ ដែលប្រជាពលរដ្ឋខ្មែរនៅតែចងចាំមិនអាចបំភ្លេចបាននោះ គឺរបប៣ឆ្នាំ ៨ខែ និង២០ថ្ងៃ (របបប៉ុលពត) ដែលបង្កវិនាសសកម្មយ៉ាងសាហាវឃោរឃៅព្រៃផ្សៃ ធ្វើឲ្យប្រជាពលរដ្ឋខ្មែរនិរាសព្រាត់ប្រាស់បែកបាក់ក្រុមគ្រួសារឪពុកម្តាយព្រាត់កូន ប្រពន្ធព្រាត់ប្តី បងព្រាត់ប្អូនរហូតមកដល់សព្វថ្ងៃនេះ ។ ទោះជាមានរយៈពេលយូយ៉ាងនេះក្តី តែបើយើងនឹកគិត ហើយគ្រាន់តែបិទភ្នែកស្រម៉ៃបន្តិចនោះ យើងនឹកឃើញភ្លាមហាក់នៅនឹងភ្នែកស្រស់ៗនូវភាពឈឺចាប់ទាំងនោះ គឺនៅតែដិតជាប់ក្នុងបេះដូងខ្មែរតែម្តង ដែលមិនអាចបំភ្លេចបានឡើយ ។
ជាក់ស្តែងនៅព្រឹកថ្ងៃទី២០ ឧសភា ២០១៩នេះ ប្រជាពលរដ្ឋរាជធានីភ្នំពេញ ដោយមានការរៀបចំពីគណបក្សប្រជាជនរាជធានីភ្នំពេញ និងសាលារាជធានីភ្នំពេញ បានធ្វើពិធីរំលឹក វិញ្ញាណក្ខន្ធ ដល់អ្នកដែលបានបាត់បង់ជីវិតនៅក្នុងរបបប្រល័យពូជសាសន៍នៅមជ្ឈមណ្ឌលប្រល័យពូជសាសន៍ជើងឯក ស្ថិតក្នុងសង្កាត់ ជើងឯក ខណ្ឌដង្កោ រាជធានីភ្នំពេញ ។ ពិធីខាងលើនេះធ្វើឡើងដោយមានការចូលរួមពីតំណាងរាស្ត្រមណ្ឌលភ្នំពេញ លោកម៉ប់ សារិន ប្រធានក្រុមប្រឹក្សារាជធានីភ្នំពេញ លោក ប៉ា សុជាតិវង្ស ប្រធានគណបក្សប្រជាជនរាជធានីភ្នំពេញ លោក ឃួង ស្រេង អភិបាលរាជធានីភ្នំពេញ និងមានមហាជនចូលរួមរាប់ពាន់នាក់ ។
ដោយមានការអានវិយោគកថា ព្រមទាំងសំដែងឈុតឆាកសង្ខេបខ្លីៗពីប្រវត្តិខ្លះៗ នៅក្នុងរបបប្រល័យពូជសាសន៍ ដោយក្រុមសិល្បៈនៃសាកលវិទ្យាល័យវិចិត្រសិល្បៈ និងរាប់បាត្រព្រះសង្ឃចំនួន២០៧អង្គផងដែរ ដើម្បីឧទ្ទិសកុសលផលបុណ្យដល់វិញ្ញាណក្ខន្ធជនស្លូតត្រង់ចំនួន៨៩៨៥នាក់ ដែលត្រូវបានពួកប្រល័យពូជសាសន៍ប៉ុលពត យកមកសំលាប់នៅជើងឯកនេះ ។
២០ឧសភា ជាថ្ងៃប្រវត្តិសាស្ត្រដែលប្រជាពលរដ្ឋកម្ពុជា នៅតែចាំទុកមិនអាចបំភ្លេចបាននូវសម័យកាលនរកអវចីដែលបានកើតឡើងហាក់នៅស្រស់ៗនៅឡើយលើទឹកដីនៃមាតុភូមិកម្ពុជា អស់រយៈពេល៣ឆ្នាំ៨ខែ និង២០ថ្ងៃ នៃរបបកម្ពុជាប្រជាធិបតេយ្យប្រល័យពូជសាសន៍៕
ចែករំលែកព័តមាននេះ