ប្រទេសកូឡុំប៊ី ៖ អតីតមេដឹកនាំអតីតក្រុមឧទ្ទាមនៃកងកម្លាំងបដិវត្តន៍កូឡុំប៊ី FARC លោកJESUS SANTRICH ត្រូវបានចាប់ខ្លួនជាថ្មីកាលពីថ្ងៃទី១៧ឧសភា នៅកូឡុំប៊ីត្រង់ច្រកទ្វារពន្ធនាគារតែម្ដង ក្រោយការគាបសង្កត់របស់អាមេរិក ដែលចង់កាត់ទោសជននោះពីបទរត់ពន្ធគ្រឿងញៀនកូកាអីុន ហើយប្រឆាំងការដោះលែងរូបគេ។
អតីតមេដឹកនាំឧទ្ទាមរូបនោះបន្ទាប់មកគឺនាថ្ងៃទី១៨ឧសភា ត្រូវបានបញ្ជូនមកមន្ទីរពេទ្យក្រុងបូហ្គោតា ដើម្បីព្យាបាលរបួសត្រង់ដៃនៅក្នុងគុក។ គណបក្សរបស់ពួកFARC ដែលបង្កើតឡើងក្រោយកិច្ចព្រមព្រៀងសន្តិភាពឆ្នាំ២០១៦តាមរយៈការចរចាគ្នា បានតវ៉ាតាមTWITTERថា លោកSANTRICH ទើបត្រូវចាប់ខ្លួននៅមាត់ទ្វារពន្ធនាគារLA PICO TAតែម្ដង។
អង្គុយលើកៅអីមានកង់ លោកSANTRICH អាយុ៥២ឆ្នាំហើយភ្នែកមើលពុំសូវឃើញច្បាស់ ត្រូវចាប់ខ្លួនជាថ្មីអមដោយបណ្ដាភ្នាក់ងាររបស់អយ្យការ ភ្លាមៗក្រោយលោកឆ្លងផុតទ្វារគុក ដែលស្ថិតនៅភាគខាងត្បូងក្រុងបូហ្គោតា។ លោកត្រូវគេនាំចេញពីបរិវេណពន្ធនាគារ បន្ទាប់មកបញ្ជូនតាមឧទ្ធម្ភាគចក្រ១គ្រឿងរបស់ប៉ូលិស ពុំដឹងជាយកទៅកាន់ទីណា។ ប៉ុន្តែប្រភពមួយជិតដិតនឹងលោកSANTRICH និយាយថា រូបលោកត្រូវនាំមកកាន់ទីស្នាក់ការរបស់អយ្យការក្នុងទីក្រុងបូហ្គោតា។
ខាងផ្នែកអគ្គរដ្ឋអាជ្ញាក្នុងសេចក្ដីប្រកាសមួយថ្លែងថា បានចេញបទបញ្ជាឲ្យឃុំខ្លួនលោកSANTRICH ក្នុងក្របខណ្ឌនៃការសើុបអង្កេតមួយពីបទរត់ពន្ធគ្រឿងញៀន៕
ចែករំលែកព័តមាននេះ