រាជធានីភ្នំពេញ ៖ ធនាគារពិភពលោកប្រចាំកម្ពុជា (World Bank) កាលពីពេលថ្មីៗនេះបានព្រមានដល់វិស័យអចលនទ្រព្យនៅកម្ពុជាដែលកំពុងមានសន្ទុះខ្លាំង ដោយធនាគារលំដាប់អន្តរជាតិមួយនេះ រម្លឹកដល់កម្ពុជាឲ្យមានប្រុងប្រយ័ត្នចំពោះការផ្ដល់កម្ចីឥណទាន ដល់វិស័យអចលនទ្រព្យ ស្របពេលវិស័យនេះកំពុងសន្ទុះងើបខ្លាំង ដោយសារតែនៅលើពិភពលោកនេះ គ្រប់ប្រទេសទាំងអស់តែងតែមានវដ្ដិ៍នៃវិបត្តិអចលនទ្រព្យ ។ យ៉ាងណាក៏ដោយ វិនិយោគិននិងអ្នកវាយតម្លៃអចលនទ្រព្យ ហាក់មិនបានបង្ហាញពីការព្រួយបារម្ភពីការព្រមាននេះឡើយ ដោយអះអាង ៥ឆ្នាំ ទៀតអចលនទ្រព្យ នៅតែបន្តមានសុខភាពល្អប្រសើរដដែល ។
លោកខន គង្គា អគ្គនាយកក្រុមហ៊ុន ERA Cambodia ដែលជាភ្នាក់ងារលក់គម្រោងថ្មីមួយក្រោមការវិនិយោគរបស់ហុងកុង បានឲ្យដឹងកាលពីថ្ងៃទី ១៦ ខែឧសភា ម្សិលមិញនេះថា លោកមិនមានការព្រួយបារម្ភចំពោះហានិភ័យនៃវិស័យអចលនវត្ថុនៅកម្ពុជានោះទេ ព្រោះលោករហូតមកដល់ពេលនេះ មិនមានសញ្ញាណាមួយបង្ហាញពីនិន្នាការធ្លាក់ចុះនៃវិស័យមួយនេះឡើយ ពោលទាំងអ្នកវិនិយោគក្នុងប្រទេស និងអ្នកវិនិយោគក្រៅប្រទេស នៅតែបន្តដាក់ទុនវិនិយោគក្នុងវិស័យមួយនេះ ជាក់ស្ដែង គម្រោងរបស់វិនិយោគិនហុងកុងមួយដែលបោះទុនរាប់ពាន់លានបានចូលមកកម្ពុជា និងបានប្រកាសលក់គម្រោងរបស់ខ្លួនជាបន្តបន្ទាប់។
លោកបានបន្តថា «សម្រាប់ការព្រមាន ឬការព្រួយបារម្ភរបស់ធនាគារពិភពលោក លើការផ្ដល់កម្ចីឥណទាន ដល់ វិស័យអចលនទ្រព្យ យើងមិនមានការព្រួយបារម្ភឡើយ» ។ លោកបានបន្តថា ក្នុងនោះ គម្រោងដែលក្រុមហ៊ុន ERA បានលក់ជូនអតិថិជន បានផ្ដល់កម្ចីដល់អតិថិជនរហូតដល់ ៥០ភាគរយឯណោះ ហើយយើងបានគិតថា ទំហំឥណទាននេះ អតិថិជនយើងប្រាកដជាមានលទ្ធភាពបង់ត្រលប់មកក្រុមហ៊ុនវិញ ខណៈនៅបណ្ដាប្រទេសជាច្រើនបានផ្ដល់កម្ចីទៅអតិថិជនក្នុងវិស័យអចលនទ្រព្យរហូតដល់១០០ភាគរយឯណោះ ។
លោក Ben Li នាយកគ្រប់គ្រងគម្រោងវិនិយោគ Urban Village (អឺប៊ឺន វីលិជ ) បានឲ្យដឹងផងដែរថា «ខ្ញុំបានមើលឃើញថាស្ថានភាពវិនិយោគនៅកម្ពុជានៅតែមានសក្ដា នុពលសម្រាប់ពួកយើង ដែលត្រូវបោះទុនគម្រោងនេះ នៅកម្ពុជា ជាក់ស្ដែងយើងបានត្រៀមទុនសរុបប្រមាណ២ពាន់លានដុល្លារអាមេរិក ដើម្បីអភិវឌ្ឍន៍គម្រោងអចលនទ្រព្យ នៅកម្ពុជា និងផ្ដល់នូវភាពស៊ីវិល័យ ដល់ប្រជាពលរដ្ឋដែលរស់នៅក្នុងប្រទេសកម្ពុជា»។ លោកបន្តថាដោយជំនឿជាក់ថា លោកមិនបារម្មណ៍ការព្រមានរបស់ World Bank គឺដោយសារតែគម្រោងខុនដូ របស់ខ្លួនជាច្រើនទទួលបានជោគជ័យ ដូច្នេះយើងជឿជាក់លើស្ថានភាពសេដ្ឋកិច្ច កម្ពុជា និងអាចទាក់ទាញវិនិយោគិនមកពីបណ្ដាប្រទេសផ្សេងៗទៀត មកបណ្ដាក់ទុន ក្នុងពេលឱកាសវិនិយោគកាន់តែខ្ពស់នេះ ។
ចំណែក លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុ កម្ពុជា បានមានប្រសាសន៍ថា លោកនៅតែមានសុទិដ្ឋិនិយមចំពោះវិស័យអចលនវត្ថុកម្ពុជា ហើយហ៊ានអះអាងថា ៥ឆ្នាំទៀតក៏នៅល្អប្រសើរដដែល ពីព្រោះស្ថានភាពសេដ្ឋកិច្ចកម្ពុជា នៅរយៈពេលប៉ុន្មានឆ្នាំខាងមុខ ក៏មានការព្យាករណ៍ថាល្អប្រសើរដដែលដែរ ដូច្នេះវិស័យសំណង់និងអចលនទ្រព្យ ដែលជាវិស័យស្នូលនៅក្នុងកំណើនសេដ្ឋកិច្ច នឹងនៅតែមានភាពល្អដូចគ្នា ។
ជាមួយគ្នានេះផងដែរ លោកឧកញ៉ា ចេង ខេង អគ្គនាយកក្រុមហ៊ុនស៊ីភីអិល បានមានប្រសាសន៍ថា «ក្នុងពេលដែលកម្ពុជានៅ មានឱកាសក្នុងការពង្រីក ការវិនិយោគក្នុងវិស័យអចលនទ្រព្យ យើងគួរតែពង្រឹងធនធានមនុស្ស ក្នុងវិស័យនេះអោយបានកាន់តែច្រើនដើម្បីត្រៀមទទួលវិនិយោគិនថ្មីៗពីក្រៅប្រទេស មានបំណងមកវិនិយោគនៅក្នុងប្រទេសកម្ពុជា»។
បើតាមរបាយការណ៍របស់ធនាគារពិភព លោកប្រចាំកម្ពុជា បានអោយដឹងផងដែរថាវិស័យសំណង់និងអចលនទ្រព្យកម្ពុជា នាពេលនេះ កំពុងស្ទុះងើបខ្លាំង ប៉ុន្តែត្រូវមានការប្រុងប្រយ័ត្នចំពោះហានិភ័យនេះ ដោយគួរតែមានវិធានការចំពោះការផ្ដល់កម្ចីនៅក្នុងវិស័យអចលនទ្រព្យ ។ របាយការណ៍របស់ក្រសួងរៀបចំដែនដីនគរូបនីកម្មនិងសំណង់ បានបញ្ជាក់ថា រយៈពេល៤ខែ ទុនវិនិយោគក្នុងវិស័យសំណង់មាន២.៧៤២លានដុល្លារអាមេរិក ៕
ចែករំលែកព័តមាននេះ