រាជធានីភ្នំពេញ ៖ មន្ត្រីនគរបាលខណ្ឌមានជ័យ២នាក់បានរងរបួសធ្ងន់និងស្រាល ខណៈកំពុងដាក់គោលដៅធ្វើការត្រួតពិនិត្យអាវុធជាតិផ្ទុះ និងពង្រឹងច្បាប់ចរាចរណ៍ ទប់ស្កាត់ បទល្មើស ស្រាប់តែមានបុរសម្នាក់ទើបចេញពីផឹកស៊ីស្រវឹងបានបើកបរម៉ូតូមួយគ្រឿងក្នុងល្បឿនលឿនជ្រុលទៅបុកបារ៉ាស់ត្រួតពិនិត្យពេញទំហឹង ហើយបន្តទៅបុកមន្ត្រីនគរបាល២នាក់កំពុងឈរលើកដំបងពិលសម្រួលចរាចរណ៍ បណ្ដាលឲ្យខ្ទាតដួលបោកនឹងថ្នល់ រងរបួសធ្ងន់ស្រាល ហើយភ្លាមៗនោះបុរសជាអ្នកបើកបរម៉ូតូត្រូវបានសមត្ថកិច្ចឃាត់ខ្លួនផងដែរ។
ហេតុការណ៍ខាងលើនេះបានកើតឡើងកាលពីវេលាម៉ោង១១យប់ ថ្ងៃទី១៧ ខែឧសភា ឆ្នាំ២០១៩ នៅចំណុចទល់មុខក្រុមហ៊ុនវេងហួត ផ្លូវ២៧១ ភូមិ៧ស្ថិតក្នុងសង្កាត់ចាក់អង្រែលើ ខណ្ឌមានជ័យ ។
មន្ត្រីនគរបាលខណ្ឌមានជ័យ២នាក់ដែលរងរបួស ក្នុងនោះរួមមានលោកអនុសេនីយ៍ឯក ជឿន សាវុធ អាយុ៣៤ឆ្នាំ ជាមន្ត្រីនគរបាលកងអន្តរាគមន៍ នៃអធិការដ្ឋានខណ្ឌមានជ័យរងរបួសជើងធ្ងន់ និងលោកអនុសេនីយ៍ឯក សូរ សេរីវុធ នាយរងផ្នែកអន្តោប្រវេសន៍ នៃអធិការដ្ឋានខណ្ឌមានជ័យ រងរបួសដៃ ។ ចំណែកអ្នកបើកបរម៉ូតូឈ្មោះ លឹម សុខា ភេទប្រុស អាយុ៣១ឆ្នាំ មុខរបរបុគ្គលិកដេប៉ូលក់គ្រឿងសំណង់ ស្នាក់នៅនៅម្ដុំអូរបែកក្អម ខណ្ឌសែនសុខ ។
តាមប្រភពពីមន្ត្រីអនុវត្តច្បាប់ចរាចរណ៍ខណ្ឌមានជ័យ បានអោយដឹងថា នៅមុនពេលកើតហេតុ កម្លាំងចំរុះនៃអធិការដ្ឋានគរបាលខណ្ឌមានជ័យចំនួន២៥នាក់ ដឹកនាំដោយលោកអធិការរងចំនួន៣នាក់ ក្នុងនោះរួមមានលោកវរសេនីយ៍ទោ នូ ទូច អធិការរងខណ្ឌ និងលោកវរសេនីយ៍ត្រី គង់ សុវង្ស អធិការរងខណ្ឌនិងវរសេនីយ៍ត្រី ជឹម សុភ័ក្រ អធិការរង ក្រោមការបញ្ជាផ្ទាល់របស់លោកវរសេនីយ៍ទោ ម៉េង វិមានតារា អធិការនគរបាលខណ្ឌមានជ័យ បានធ្វើការដាក់គោលដៅត្រួតពិនិត្យអាវុធជាតិផ្ទុះ និងជាតិស្រវឹង ទប់ស្កាត់បទល្មើស នៅតាមបណ្ដោយផ្លូវ២៧១ ត្រង់ចំណុចកើតហេតុខាងលើ ។
តាមប្រភពដដែលបានបន្តថា ខណៈដែលសមត្ថកិច្ចកំពុងធ្វើការត្រួតពិនិត្យ អាវុធជាតិផ្ទុះ និងវាស់ជាតិស្រវឹង ព្រមទាំងធ្វើការអប់រំណែនាំដល់បងប្អូនប្រជាពលរដ្ឋ ដែលធ្វើដំណើរតាមផ្លូវឆ្លងកាត់គោលដៅត្រួតពិនិត្យ អោយចូលរួមគោរពច្បាប់ចរាចរណ៍ទាំងអស់គ្នា នៅពេលធ្វើដំណើរតាមម៉ូតូត្រូវពាក់មួកសុវត្ថិភាព និងដាក់កញ្ចក់ឲ្យបានត្រឹមត្រូវ ចំណែកអ្នកបើករថយន្ត ត្រូវពាក់ខ្សែក្រវាត់អោយបានត្រឹមត្រូវផងដែរ ។
តាមប្រភពដដែលបានបន្តទៀតថា លុះដល់វេលាកើតហេតុ ស្រាប់តែមានបុរសម្នាក់មិនដឹងចេញពីផឹកស៊ីនៅកន្លែងណាទេ បានបើកបរម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ ១GD-៨៨៥៤ ទាំងស្ថានភាពស្រវឹង ធ្វើដំណើរតាមបណ្តោយផ្លូវ២៧១ ក្នុងទិសដៅពីលិចមកកើត ក្នុងល្បឿនលឿនស្លេវចូលដល់គោលដៅត្រួតពិនិត្យអាវុធជាតិផ្ទុះ នៅតែមិនបន្ថយល្បឿន ស្រាប់តែជ្រុលទៅបុកបារ៉ាស់ដែកដែលដាក់អក្សរបន្ថយល្បឿន និងដាក់ដំបងពិលភ្លឹបភ្លែតៗ រួចជ្រុលទៅបុកមន្ត្រីនគរបាល២នាក់កំពុងឈរកាន់ដំបងពិលសម្រួលចរាចរណ៍ បណ្ដាលឲ្យខ្ទាតដួលបោកនឹងថ្នល់រងរបួសទាំង២នាក់តែម្តង ហើយភ្លាមៗនោះបុរសអ្នកបើកបរម៉ូតូត្រូវបានសមត្ថកិច្ចឃាត់ខ្លួនភ្លាមៗផងដែរ ។ ចំណែកមន្ត្រីនគរបាលដែលរងរបួសជើងធ្ងន់ ត្រូវបានដឹកបញ្ជូនតាមរថយន្តស៊ីរ៉ែនរបស់អធិការដ្ឋាននគរបាលខណ្ឌមានជ័យទៅ ព្យាបាលរបួសនៅមន្ទីរពេទ្យ ។
ក្រោយពេលកើតហេតុ ពេលដែលសមត្ថកិច្ចឃាត់អ្នកបើកបរម៉ូតូដែលស្រវឹងនោះ បានហើយនៅតែរឹងទទឹង មិនព្រមអោយសមត្ថកិច្ចពិនិត្យជាតិអាកុលនៅនឹងកន្លែងដាច់ខាត់ ទាល់តែសមត្ថកិច្ចនាំខ្លួនបញ្ជូនមកអធិការដ្ឋាននគរបាលខណ្ឌមានជ័យ ដើម្បីធ្វើការសាកសួរ និងអោយទាក់ទងទៅសាច់ញាតិមកដល់ ទើបយល់ព្រមឲ្យសមត្ថកិច្ចវាស់ជាតិអាកុលជាក់ស្ដែង ជាលទ្ធផលត្រួតពិនិត្យរកឃើញមានជាតិអាកុលក្រោម០,៧៥មីល្លីក្រាម ក្នុង១លីត្រខ្យល់ ។
ក្រោយពេលកើតហេតុ ដោយសារតែបុរសជាអ្នកបើកបរម៉ូតូមានរបួសលោត់ដៃរលាត់ជើង ត្រូវបានសាច់ញាតិសុំសមត្ថកិច្ចយកទៅផ្ទះលាងរបួសសិន ដោយរង់ចាំព្រឹកថ្ងៃទី១៨ ឧសភា ចាំយកឯកសារពាក់ព័ន្ធមកបញ្ជាក់ដើម្បីដោះស្រាយតាមនីតិវិធី ៕
ចែករំលែកព័តមាននេះ