ខេត្តប៉ៃលិន ៖ ប្រជាពលរដ្ឋមកពីស្រុកសាលាក្រៅ ចំនួន ២០០នាក់ ក្នុងនោះ ស្រីចំនួន ៤២នាក់ បានចូលរួមក្នុងពិធីបើកវេទិកាសាធារណៈផ្សព្វផ្សាយ និងស្វែងយល់ពីលក្ខណៈសម្បត្តិ ៩យ៉ាង នៃភូមិ-ឃុំមានសុវត្ថិភាព នាព្រឹកថ្ងៃទី២២ វិច្ឆិកា ២០១៣ នៅក្នុងបរិវេណវត្តអូរបេង ស្ថិតក្នុងភូមិអូរបេង ឃុំស្ទឹងកាច់ ស្រុកសាលាក្រៅ។
ពិធីនេះ រៀបចំធ្វើឡើងក្រោមអធិបតីភាព លោក អៀង វុធ អភិបាលរងខេត្ត ដោយមានការអញ្ជើញចូលរួមពី លោក ចាវ ខាន់ នាយករងរដ្ឋបាលសាលាខេត្ត មន្រ្តីសាលាដំបូងខេត្ត លោក កង ថេង មេឃុំស្ទឹងកាច់ លោកឧត្តមសេនីយ៍ត្រី ឡី ចាន់ឆាយ ស្នងការនគរបាលខេត្ត លោកឧត្តមសេនីយ៍ត្រី វ៉ាន់ ណាឡុង មេបញ្ជាការកងរាជអាវុធហត្ថខេត្ត លោកវរសេនីយ៍ឯក អ៊ុន សេរីរ័ត្ន ស្នងការរងទទួលបន្ទុកសេនាធិការ លោក គាំ វុទ្ធីគុណ អធិការនគរបាលស្រុកសាលាក្រៅ ព្រមទាំងមន្រ្តីនគរបាលរដ្ឋបាលប៉ុស្តិ៍ឃុំទាំង៤ អាជ្ញាធរភូមិ-ឃុំ អង្គការក្រៅរដ្ឋាភិបាល ចូលរួមយ៉ាងច្រើនកុះករ។
សូមបញ្ជាក់ថា នេះជាលើកទី២ ហើយដែលនៅក្នុងខេត្តប៉ៃលិន បានបើកវេទិកាសាធារណៈ ដោយកាលពីលើកទី១ ធ្វើឡើងនៅព្រឹកថ្ងៃទី១៤ វិច្ឆិកា ស្ថិតនៅក្នុងបរិវេណវត្តពោធិ៍មារាម ហៅវត្តប៉ាហ៊ី ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន។ តាមការសង្កេត វេទិកាសាធារណៈលើកទី២ នេះ ឃើញបងប្អូនប្រជាពលរដ្ឋ ដែលចូលរួមមានភាពក្លាហានច្រើនក្នុងការបញ្ចេញមតិយោបល់របស់ខ្លួន ដោយពុំមានភ័យខ្លាច ពួកគាត់ហ៊ាននិយាយខ្លាំងៗ ជាលក្ខណៈបញ្ចេញមតិតាមបែបលទ្ធិប្រជាធិបតេយ្យ។
លោក ចាវ ខាន់ នាយករងរដ្ឋបាលសាលាខេត្តប៉ៃលិន បានជម្រាបជូនគណៈអធិបតីឲ្យបានជ្រាបថា ប្រជាពលរដ្ឋដែលបានមកចូលរួមវេទិកាសាធារណៈនាពេលនេះ មកពីឃុំទាំង៤ ក្នុងស្រុកសាលាក្រៅ ទី១- ឃុំស្ទឹងកាច់ ទី២- ឃុំអូរអណ្តូង ទី៣- ឃុំសាលាក្រៅ និងទី៤- ឃុំស្ទឹងត្រង់។ លោកបានបន្តថា នេះជាលើកទី២ ហើយដែលខេត្តប៉ៃលិន បានរៀបចំពិធីនេះ ហើយយើងនឹងបន្តធ្វើទៀតនៅក្នុងខេត្តប៉ៃលិន របស់យើង ដើម្បីឲ្យបងប្អូនប្រជាពលរដ្ឋលើកឡើងពីចំណុចខ្វះខាតមួយចំនួនរបស់អាជ្ញាធរ និងសមត្ថកិច្ច ដែលទាក់ទងទៅនឹងគោលនយោបាយភូមិ-ឃុំមានសុវត្ថិភាព និងដើម្បីរកដំណោះស្រាយណាមួយសមហេតុផលជូនដល់ប្រជាពលរដ្ឋទាំងអស់គ្នាឲ្យអាចទទួលយកបាន។
លោក អៀង វុធ អភិបាលរងខេត្ត បានមានប្រសាសន៍ទៅកាន់អង្គពិធីទាំងមូលថា នៅថ្ងៃនេះ បងប្អូនប្រជាពលរដ្ឋមានសិទ្ធិក្នុងការបញ្ចេញមតិយោបល់សួរសំណួរទាក់ទងនឹងភូមិ-ឃុំសុវត្ថិភាព ដែលមានលក្ខណៈសម្បត្តិទាំង ៩យ៉ាង គឺទី១. គ្មានសកម្មភាពលួច ឆក់ ប្លន់គ្រប់ប្រភេទ ទី២. គ្មានការដាំដុះ ការផលិត ការចរាចរណ៍ ការជួញដូរ ការចែកចាយ និងប្រើប្រាស់គ្រឿងញៀនខុសច្បាប់ ទី៣. គ្មានអំពើអានាចារ ការជួញដូរស្រ្តី និងកុមារ និងអំពើហិង្សាក្នុងគ្រួសារ ទី៤. គ្មានក្មេងទំនើង ទី៥. គ្មានការលេងល្បែងស៊ីសងគ្រប់ប្រភេទ ការប្រើប្រាស់អាវុធខុសច្បាប់ និងបទល្មើសគ្រប់ប្រភេទ ទី៦. គ្មានគ្រោះថ្នាក់ចរាចរណ៍ ទី៧. គ្មានគ្រោះថ្នាក់ដោយសារយុទ្ធភណ្ឌមិនទាន់ផ្ទុះ ទី៨. មានវិធានការទប់ស្កាត់គ្រប់គ្រង និងឆ្លើយតបចំពោះគ្រោះមហន្តរាយប្រកបដោយប្រសិទ្ធិភាព និងទី៩. គ្មានការត្រួតពិនិត្យខុសច្បាប់។
ជុំំវិញបញ្ហាខាងលើ ប្រជាពលរដ្ឋបានលើកឡើងនូវបញ្ហាដែលបានកើតឡើងមួយចំនួន ដូចជា ទំនាស់ដីសហគមន៍ ដីធ្វើផ្លូវថ្នល់ប៉ះពាល់កម្មសិទ្ធិឯកជន ការធ្វើអត្តសញ្ញាណបណ្ណសញ្ជាតិខែ្មរ ការធ្វើបណ្ណក្រីក្រ ដែលបានទៅលើភាគច្រើនអ្នកមាន សមត្ថកិច្ចប៉ុស្តិ៍ចាប់បានជនសង្ស័យប្រើអំពើហិង្សាសួរចម្លើយ គ្រោះថ្នាក់ចរាចរណ៍ ការផ្សាយពាណិជ្ជកម្មគ្រឿងស្រវឹង គ្រឿងញៀន ល្បែងស៊ីសងនៅតាមភូមិ-ឃុំ ល្បែងកាស៊ីណូខ្មែរចូលលេងច្រើន ការដេញថ្លៃសំរាមនៅផ្សារព្រំ ចោរលួចប្លន់ ក្មេងទំនើងនៅក្នុងភូមិ-ឃុំ។
សរុបចុងក្រោយ លោក អៀង វុធ ក៏បានថ្លែងអំណរគុណ និងផ្តាំផ្ញើដល់បងប្អូនប្រជាពលរដ្ឋនៅស្រុកសាលាក្រៅថា នៅថ្ងៃនេះ លោកពិតជាបានទទួលនូវព័ត៌មានប្លែកថ្មីៗ ជាច្រើនបន្ថែមទៀតទាក់ទិននឹងបញ្ហា ដែលបានកើតឡើងនៅក្នុងសង្គមរបស់យើង និងទទួលនូវបទពិសោធន៍ពីគ្នាទៅវិញទៅមក ជាពិសេសបញ្ហា ដែលលាក់ទុកនៅក្នុងចិត្តរបស់បងប្អូនប្រជាពលរដ្ឋជាយូរថ្ងៃខែមកហើយបានលើកឡើងយកមកបង្ហើបបង្ហាញដល់អង្គពិធីនៅពេលនេះ ដើម្បីធ្វើការដោះស្រាយ និងមានការកែលម្អរ ដើម្បីស្ថាបនា និងរកការរីកចម្រើននៅក្នុងខេត្តប៉ៃលិន។
នៅថ្ងៃក្រោយទៀតយើងនឹងរៀបចំកម្មវិធីដដែលនេះ បន្តទៀត ដោយឲ្យបងប្អូនក្លាហានឡើងតាមបែបលទ្ធិប្រជាធិបតេយ្យ មិនប្រកាន់និន្នាការនយោបាយបក្សនោះទេ គឺត្រូវតែហ៊ាននិយាយអ្វីដែលឃើញថាខុស ប្រាប់ថាខុស ព្រោះរាជរដ្ឋាភិបាលកម្ពុជា យើងអាណត្តិទី៥នេះ ចង់កែលម្អរនូវចំណុចខ្វះខាតដែលតែងតែកើតមានឡើងចំពោះមន្ត្រីថ្នាក់តូចធំមួយចំនួន និងស្ថាប័នពាក់ព័ន្ធមួយចំនួន ដែលមានភាពមិនប្រក្រតីឲ្យល្អត្រឹមត្រូវឡើងវិញ៕
ចែករំលែកព័តមាននេះ