ខេត្តកណ្តាល ៖ បុរសម្នាក់បានស្លាប់ភ្លាមៗ និងមនុស្សជិត ៣០នាក់ ផ្សេងទៀតបានរងរបួសធ្ងន់នៅក្នុងករណីគ្រោះថ្នាក់ចរាចរណ៍រវាងរថយន្តដឹកចំណីសត្វរបស់ក្រុមហ៊ុនស៊ីភី ពន្លះគ្នាយ៉ាងពេញទំហឹងជាមួយរថយន្តដឹកកម្មករ ដែលហេតុការណ៍នេះ បានកើតឡើងកាលពីវេលាម៉ោង ៧ និង ៤០នាទី យប់ថ្ងៃទី២២ វិច្ឆិកា ២០១៣ នៅតាមបណ្តោយផ្លូវជាតិលេខ៤ ស្ថិតក្នុងភូមិត្រពាំងរាំង ឃុំព្រៃពួច ស្រុកអង្គស្នួល ខេត្តកណ្តាល។
តាមប្រភពព័ត៌មាន បានឲ្យដឹងថា នៅមុនពេលកើតហេតុ រថយន្តម៉ាកហ៊ីយ៉ាន់ដាយ ១តោនកន្លះ ពណ៌ស ១គ្រឿង អត់ស្គាល់ស្លាកលេខ ដឹកកម្មកររោងចក្រចេញពីម្តុំសួនកាណាឌីយ៉ា ធ្វើដំណើរតាមផ្លូវជាតិលេខ៤ ក្នុងទិសដៅពីកើតទៅលិច ឆ្ពោះទៅរោងចក្រ ១កន្លែង នៅជិតរោងចក្រសាព្រីណា ក្នុងភូមិក្តីល្វា ឃុំត្រពាំងគង ស្រុកសំរោងទង ខេត្តកំពង់ស្ពឺ។ លុះមកដល់ចំណុចកើតហេតុខាងលើ ក៏បានបុកយ៉ាងពេញទំហឹងជាមួយរថយន្តកូរ៉េចំណុះ ៥តោន ដឹកចំណីសត្វរបស់ក្រុមហ៊ុនស៊ីភី បណ្តាលឲ្យកម្មករម្នាក់ស្លាប់ភ្លាមៗ នៅនឹងកន្លែង ចំណែកកម្មកជិត ៣០នាក់ ទៀតរងរបួសធ្ងន់ ឯរថយន្តទាំងពីររងការខូចខាតខ្ទេចទាំងសងខាង។ ចំណែកអ្នកបើកបររថយន្តរបស់ក្រុមហ៊ុនស៊ីភី រងរបួសស្រាល រត់គេចខ្លួនបាត់ស្រមោល។
ក្រោយកើតហេតុ សមត្ថកិច្ចបានចុះធ្វើការពិនិត្យនៅកន្លែងកើតហេតុ ចំណែកអ្នករងរបួសត្រូវបានដឹកទៅសង្រ្គោះនៅមន្ទីរពេទ្យ។ ដោយឡែក សពបុរសម្នាក់ដែលស្លាប់ពុំត្រូវបានស្គាល់អត្តសញ្ញាណឡើយ គឺកំពុងស្រាវជ្រាវរកសាច់ញាតិ៕
ចែករំលែកព័តមាននេះ