រាជធានីភ្នំពេញ ៖ ម៉ូតូធុនធំមួយគ្រឿង បើកបរដោយបុរសម្នាក់ល្បឿនលឿនជ្រែវ៉ាជែងគេឯង តែខុសបច្ចេកទេសបែជាជ្រុលទៅបុកគូទរថយន្តមិនចាំម៉ាក បណ្តាលឲ្យដួលប្រកាច់ប្រកិនសន្លប់តែម្នាក់ឯង រថយន្តបន្តបើកទៅបាត់ កាលពីវេលាម៉ោង៩និង២០នាទីយប់ ថ្ងៃទី១៨ ខែឧសភា ឆ្នាំ២០១៩ ស្ថិតនៅតាមបណ្តោយផ្លូវហាណូយ ចំណុចភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខ ។
ជនរងគ្រោះមិនស្គាល់អត្តសញ្ញាណ ខណៈដែលស្ថានភាពរបួសធ្ងន់ធរជិះម៉ូតូមួយគ្រឿង ប្រភេទធុនធំម៉ាក WONJAN ពណ៌ខ្មៅ ពាក់ស្លាកលេខ សៀមរាប 1R-9223 ជាមធ្យោបាយ ។
តាមប្រភពនៅកន្លែងកើតហេតុបានឲ្យដឹងថា មុនកើតហេតុជនរងគ្រោះបើកបរម៉ូតូល្បឿនលឿនសង្ស័យប្រញាប់ទៅប្រណាំងយកពានឯណាក៏មិនដឹង បើកបោះពួយតាមបណ្តោយផ្លូវហាណូយពីត្បូងទៅជើងជ្រែវ៉ាជែងគេឯង គ្មានសល់យានណាមួយ ក៏ប៉ុន្តែការបើកបររបស់គាត់ខុសបច្ចេកទេស ភ្លាត់ស្នៀតជ្រុលទៅបុកគូទរថយន្តមិនចាំម៉ាកទើបបណ្តាលឲ្យដួលប្រកាច់ត្រឡប់ត្រឡិនម្នាក់ឯងសន្លប់ស្តូករថយន្តបន្តដំណើរទៅបាត់។
ក្រោយកើតហេតុជនរងគ្រោះ រថយន្តគ្លីនិកអត់ហ៊ានទទួលមើលព្យាបាលនៅគ្លីនិកឡើយ បានដឹកបញ្ជូនទៅមន្ទីរពេទ្យព្រះកុសុមៈ ។ ចំណែកម៉ូតូត្រូវបានសមត្ថកិច្ចដឹកយកទៅរក្សាទុកនៅផ្នែកជំនាញរង់ចាំប្រគល់ជូនជនរងគ្រោះវិញនៅពេលក្រោយ៕
ចែករំលែកព័តមាននេះ