ផលប៉ះពាល់នៃភាពតានតឹងជាមួយអាមេរិក អាចត្រួតត្រាបាន

ថ្ងៃទី ១៧ ខែ ឧសភា ឆ្នាំ ២០១៩
ម៉ោង ១៧:០៤
ខាន់ សុខឃន

ប្រទេសចិន ៖ ទីភ្នាក់ងារផែនការកម្មជាតិចិន ថ្លែងកាលពីថ្ងៃទី១៧ ឧសភាថា ភាពតានតឹងខាងពាណិជ្ជកម្ម ជាមួយសហរដ្ឋអាមេរិក មានផលប៉ះពាល់ជាអវិជ្ជមានមួយ សេដ្ឋកិច្ចចិន ប៉ុន្តែវាអាចត្រួតត្រាបាននិងថា បណ្ដាវិធានការតបតវិញ នឹងបង្កើតប្រសិនបើចាំបាច់ដើម្បីថែរក្សា ប្រតិបត្តិការសេដ្ឋកិច្ចក្នុងកម្រិតសមស្របមួយ។

គណៈកម្មាធិការជាតិទទួលបន្ទុកខាងការអភិវឌ្ឃន៍និងកែទម្រង់ចិន បានបង្ហាញការវាយតម្លៃរបស់ខ្លួន ក្នុងសន្និសីទសារព័ត៌មានមួយនាទីក្រុងប៉េកាំង។ ចិនជួបប្រទះកាលពីខែមេសានូវការយឺតយ៉ាវខ្លាំងមួយ នៃការលក់រាយរបស់ខ្លួន ព្រមទាំងផលិតកម្មឧស្សាហកម្ម ដែលក្រុងប៉េកាំងចាំបាច់ចាត់វិធានការថ្មីៗ នៃការជួយទ្រទ្រង់ដល់សេដ្ឋកិច្ច។

ក្រុងវ៉ាស៊ិនតោនបានបង្កើនសង្គ្រាមពាណិជ្ជកម្មជាមួយក្រុងប៉េកាំង ដោយកាលពីថ្ងៃទី១០ឧសភា បានអនុវត្តការដំឡើងពន្ធគយមានទឹកប្រាក់២០០ពាន់លានដុល្លារនៃការនាំចូលបណ្ដាផលិតផលចិន ហើយលោកដូណាល់ត្រាំបានចេញបញ្ជា ឲ្យចាប់ផ្ដើមនីតិវិធីចាំបាច់នានា សម្រាប់ការដំឡើងពន្ធគយលើផលិតផលចិនឯទៀតៗដែលនៅសល់។ ក្រុងប៉េកាំងបានតបតវិញ ដោយប្រកាសនាថ្ងៃទី១៣ឧសភាពីចេតនារបស់ខ្លួន យកពន្ធគយមានទឹកប្រាក់៦០ពាន់លានដុល្លារ លើបណ្ដាផលិតផលនាំចូលមកពីសហរដ្ឋអាមេរិក។

ភាពតានតឹងមានកាន់តែខ្លាំងនាសប្ដាហ៍នេះ ពេលលោកដូណាល់ត្រាំចុះហត្ថលេខាលើក្រិត្យមួយ ដែលហាមឃាត់បណ្ដាសហគ្រាសអាមេរិក ប្រើប្រាស់សម្ភារទូរគមនាគមន៍ ផលិតដោយបណ្ដាសហគ្រាស ដែលចាត់ទុកថា មានគ្រោះថ្នាក់សម្រាប់សន្តិសុខជាតិ។ បែបនេះជាការហាមឃាត់បណ្ដាសហគ្រាសអាមេរិកមិនឲ្យរកសីុជាមួយក្រុមហ៊ុនចិនHUAWEI។

ម្យ៉ាងទៀតសារព័ត៌មានផ្លូវការចិនរាយការណ៍កាលពីថ្ងៃទី១៧ឧសភាថា ភាពតានតឹងខាងពាណិជ្ជកម្មនឹងធ្វើឲ្យចិនកាន់តែខ្លាំងថែមទៀត ហើយនឹងពុំអាចឲ្យប្រទេសនេះលុតជង្គង់ចុះញ៉មឡើយ។ កាសែតប្រជាជនចិនសរសេរថា សង្គ្រាមពាណិជ្ជកម្មមិនអាចធ្វើឲ្យចិនដាំក្បាលចុះបានទេ។ វាគ្រាន់តែនឹងធ្វើឲ្យយើងពង្រឹងខ្លួនថែមដើម្បីឲ្យកាន់តែខ្លាំង៕