មហាសមុទ្រឥណ្ឌា ៖ កាកសំណល់ប្លាស្ទិកប្រមាណជា២៣៨តោនត្រូវបានរកឃើញលើប្រជុំកោះCOCOS ដែលនោះគ្រាន់តែជាផ្នែកមួយនៃកាកសំណល់ដែលរសាត់មកទើរលើប្រជុំកោះនោះតែប៉ុណ្ណោះ។
ប្រជុំកោះCOCOSមានកោះតូចៗចំនួន២៧ ស្ថិតក្នុងមហាសមុទ្រឥណ្ឌា ចម្ងាយប្រមាណជា២១០០គីឡូម៉ែត្រ ភាគខាងលិចប្រទេសអូស្ត្រាលី។ ក្នុងអត្ថបទមួយចេញផ្សាយកាលពីថ្ងៃទី១៦ឧសភាក្នុងទស្សនាវដ្ដី NATURE SCIENTIFIC REPORTS ជីវវិទូលោកស្រីJENNIFER LAVERSនិយាយថា យើងពិតជាស្រងាកចិត្តណាស់។ នោះគ្រាន់តែជាផ្នែកមួយនៃកាកសំណល់ ដែលរសាត់មកទើរនៅទីនោះប៉ុណ្ណោះ។ អ្វីដែលគួរឲ្យភ្ញាក់ផ្អើលពេលគេកាយខ្សាច់លើកោះ គេឃើញមានកាកសំណល់ប្លាស្ទិកយ៉ាងច្រើនទៀត។
យោងតាមក្រុមអ្នកស្រាវជ្រាវថាបរិមាណពិតប្រាកដនៃកាកសំណល់ប្លាស្ទិកលើបណ្ដាឆ្នេរខ្សាច់ដែលមានការសិក្សា ក្នុងស្រទាប់ខ្សាច់មានកប់កាកសំណល់ប្លាស្ទិក ក្នុងបរិមាណដល់ទៅ២៦ដង លើសកាកសំណល់ដែលគេឃើញលើនៅខាងលើ។ សម្រាប់អ្នកសិក្សាទាំងនេះយល់ថា ការសិក្សាជាសាកលលើកាកសំណល់ យើងពិតជាមើលស្រាលខ្លាំងណាស់ចំពោះបរិមាណនៃកាកសំណល់ប្លាស្ទិកដែលមាន។
សម្រាប់លោកស្រីJENNIFER LAVERSយល់ថា ការរកឃើញកាកសំណល់ប្លាស្ទិកដ៏ច្រើននៅលើប្រជុំកោះCOCOSជាប្រភពនៃការបារម្ភខ្លាំងមួយ។ ប្រជុំកោះនោះស្ថិតនៅសែនឆ្ងាយ តែកាកសំណល់ប្លាស្ទិករសាត់ទៅដល់ហើយទៅគរនៅទីនោះច្រើនម្លឹង។ បែបនេះវាប្រាកដណាស់ដែលគ្រប់ទីកន្លែងទីណាក៏មានកាកសំណល់ប្លាស្ទិកដែរ៕
ចែករំលែកព័តមាននេះ