រាជធានីភ្នំពេញ ៖ តាមការគ្រោងទុក ព្រលានយន្តហោះអន្តរជាតិខេត្តព្រះសីហនុ អាចនឹងដាក់ឲ្យដំណើរផ្លូវរត់ ដែលអាចមានសមត្ថភាពទទួលចុះចតយន្តហោះខ្នាតធំ ឬយន្តហោះឆ្លងទ្វីប បាននៅក្នុងអំឡុងឆ្នាំ២០២០ខាងមុខនេះ ខណៈផ្លូវរត់នេះបាននឹងកំពុងដំណើរការពង្រីកថែមទៀត ។ នេះបើតាមការឲ្យដឹងរបស់រដ្ឋលេខាធិការប្រចាំការ នៃលេខាធិការដ្ឋានអាកាសស៊ីវិលលោក ជា អូន បានឲ្យដឹងតាមរយៈទូរស័ព្ទនៅថ្ងៃទី១៦ ខែឧសភា ឆ្នាំ២០១៩ ម្សិលមិញនេះ ។
លោក ជា អូន បានឲ្យដឹងទៀតថា យើងគ្រាន់តែ មានគម្រោងដាក់ឲ្យដំណើរទៅតាមផែនការ ដែលបានកំណត់តែប៉ុណ្ណោះ ហើយមកដល់បច្ចុប្បន្ននេះការពង្រីកផ្លូវរត់នេះ បានប្រហែលប្រមាណ៦០ទៅ៧០ភាគរយហើយ។ នៅពេលយើងពង្រីកចប់ ព្រលានយន្តហោះនេះ អាចទទួលការចុះចតយន្តហោះប្រភេទធុនធំ និងឆ្លងទ្វីបបាន។
រដ្ឋលេខាធិការប្រចាំការ នៃលេខាធិការដ្ឋានអាកាសស៊ីវិល បានមានប្រសាសន៍បន្តទៀតថា «ព្រលានយន្តហោះខេត្តព្រះសីហនុ នឹងចាប់ផ្តើមទទួលចុះចតប្រភេទយន្តហោះ ដែលហោះក្នុងរយៈពេលចន្លោះពី១២ទៅ១៦ម៉ោង មកពីប្រទេសបារាំង និងសហរដ្ឋអាមេរិកបាន។ នៅឆ្នាំ២០២៥ កម្ពុជានឹងមានព្រលានយន្តហោះទី២ខ្នាត 4F នេះដែរ គឺចំណតអាកាសយានដ្ឋានអន្តរជាតិភ្នំពេញថ្មី ស្ថិតនៅក្នុងភូមិសាស្ត្រខេត្តកណ្តាល និងខេត្តតាកែវ »។
សូមបញ្ជាក់ថា ព្រលានយន្តហោះអន្តរជាតិខេត្តព្រះសីហនុ បានពង្រីកផ្លូវរត់បន្ថែមទៀត ដោយពង្រីកផ្លូវរត់ពី២៨០០ម៉ែត្រទៅ៣២០០ម៉ែត្រ និងអាចអនុញ្ញាត្តឲ្យយន្តហោះម៉ាក Airbus777 និងយន្តហោះ Boing330 ដែលផ្ទុកអ្នកដំណើរចន្លោះពី៣០០ ទៅ៣៥០នាក់អាចចុះចតបាន។ សព្វថ្ងៃព្រលានយន្តហោះអន្តរជាតិខេត្តព្រះសីហនុ ដែលមានប្រវែងផ្លូវរត់២,៥00ម៉ែត្រ មិនទាន់ឆ្លើយតបតាមតម្រូវឱ្យការហោះហើរ និងចុះចតរបស់យន្តហោះធុនធំបានទេ ដូច្នេះសព្វថ្ងៃព្រលាននេះទទួលបានត្រឹមតែយន្តហោះប្រភេទ Air bus 321 និងបូអ៊ីង757 ក៏ប៉ុន្តែតម្រូវការឱ្យយន្តហោះធ្វើដំណើរផ្លូវឆ្ងាយប្រភេទយន្តហោះធំៗ មិនទាន់អាចចុះចតបាននៅឡើយ។ ដូច្នេះ បើតាមគម្រោងការពង្រីកព្រលានប្រវែង៣00ម៉ែត្របន្ថែម នឹងត្រូវបញ្ចប់ជាស្ថាពរនៅចុងឆ្នាំដដែល ដែលអាចធ្វើឱ្យយន្តហោះធុនធំចុះចតបាន។ ដំណាក់កាលទី២ នឹងពង្រីកផ្លូវហោះហើរប្រវែង500ម៉ែត្របន្ថែម ដែលនឹងធ្វើឱ្យផ្លូវរត់ហោះ (Runway) មានប្រវែងរហូតដល់៣,៣00ម៉ែត្រ និងអាចឱ្យយន្តហោះប្រភេទធំៗចុះចតបានដូចការគ្រោងទុក។
សព្វថ្ងៃ អាកាសយានដ្ឋានអន្តរជាតិខេត្តព្រះសីហនុ មានភ្ញៀវឆ្លងកាត់ចេញចូលមកតាមរដូវកាល ដោយនៅក្នុងរដូវ Low season មានជើងហោះហើរពី៥ ទៅ១០ជើងក្នុងមួយថ្ងៃ តែក្នុងរដូវ High season វិញនឹងមានរហូតទៅដល់១៥ជើងក្នុងមួយថ្ងៃ។
លោកហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានថ្លែងទទួលស្គាល់ថា ព្រលានយន្តហោះអន្តរជាតិកងកេង ខេត្តព្រះសីហនុ ពិតជាមានសកម្មភាពមមាញឹកខ្លាំងធៀបនឹងប៉ុន្មានឆ្នាំមុន ដោយសារគោលនយោបាយបើកចំហជើងមេឃរបស់សម្តេចតេជោ បានធ្វើឲ្យវិស័យអាកាសចរណ៍មានការរីកចម្រើនយ៉ាងខ្លាំងនៅកម្ពុជា ដោយបច្ចុប្បន្នទីផ្សារអ្នកដំណើរតាមផ្លូវអាកាសបានកើនឡើងខ្ពស់ជាងផ្លូវគោក និងផ្លូវទឹក។
ខណ៖ថ្នាក់ដឹកនាំក្រសួងទេសចរណ៍លោក រដ្ឋមន្ត្រីថោង ខុន ធ្លាប់មានប្រសាសន៍ឲ្យដឹងថាភ្ញៀវទេសចរបរទេសដែលធ្វើដំណើរមកដល់ខេត្តព្រះសីហនុតាមរយៈកប៉ាល់ទេសចរណ៍ធំៗ ក៏មានបំណងទៅកំសាន្តនៅអង្គរវត្ត ខេត្តសៀមរាបផងដែរ តែពុំមានជើងហោះហើរទៀងទាត់រវាងខេត្តព្រះសីហនុ និងខេត្តសៀមរាប ជាពិសេសបើចង់ធ្វើដំណើរតាមយន្តហោះដើម្បីធ្វើដំណើរវិលត្រឡប់ឲ្យទាន់ពេលវេលាគឺពុំមាននោះទេ ៕
ចែករំលែកព័តមាននេះ