ជនណាដែលប្រព្រឹត្តខុសចំពោះមាតាបិតាព្រោះមិនបានចិញ្ចឹមបីបាច់ថែរក្សា មិននឹកនា មិនយកចិត្តទុកដាក់រាប់រក មិនអាណិតអាសូរដល់ចិត្តរបស់លោក មិនទំនុកបម្រុង មិនបម្រើលោក ជននោះរមែងមានបាបច្រើន អបាយភូមិបើកផ្លូវទៅក្នុងសង្សារវដ្ត ហើយពៀរវេរាក៏កើតមានដល់បុគ្គលនោះវិញជាប្រាកដ ។
អ្នកប្រាជ្ញទាំងឡាយមានព្រះពុទ្ធជាដើមតែងតិះដៀលបុគ្គលអកតញ្ញូថា បើទោះជាជនប្រភេទនេះរស់នៅជាសុខក្នុងពេលបច្ចុប្បន្ន ក៏ទៅក្នុងលោកខាងមុខគង់នឹងទាញបដិសន្ធិទៅកាន់អបាយភូមិកើតជាប្រេតនរកមិនខាន ព្រោះតែការប្រព្រឹត្តខុសលើអ្នកមានគុណបែបនេះ ។
ចំណែកបុគ្គលណាប្រតិបត្តិល្អក្នុងមាតាបិតាចិញ្ចឹមបីបាច់រក្សាលោកដោយចិត្តស្មោះក្នុងបំណងតបគុណលោកវិញពិតៗ បុគ្គលនោះរមែងបានបុណ្យកុសលជាអនេក ហើយបណ្ឌិតទាំងឡាយរមែងសរសើរ និងជូនស័ព្ទសាធុការពរដល់សប្បុរសនោះយ៉ាងខ្ទរខ្ទារ ។
លុះអស់អាយុសង្ខាររមែងទៅកាន់សុគតិភព ហើយរីករាយក្នុងភពនោះៗអស់កាលដ៏យូរអង្វែង ព្រោះតែអានិសង្សនៃការប្រតិបត្តិត្រឹមត្រូវតាមពុទ្ធឱវាទ ។
ចែករំលែកព័តមាននេះ