ខេត្តកំពង់ឆ្នាំង ៖ ក្រោយពីទទួលព័ត៌មានថា មានស្ត្រីម្នាក់ត្រូវបានបុរសជាប្ដីដឹកចេញពីមន្ទីរពេទ្យមិត្តភាព-ខ្មែរសូវៀត រាជធានីភ្នំពេញទាំងយប់ ថ្ងៃទី១៥ ឧសភា នោះ ព្រោះតែគ្មានថវិកាបន្តព្យាបាល ហើយបានយកមកកាន់លំនៅឋាននៅឯខេត្តកំពង់ឆ្នាំងវិញ ប៉ុន្តែគ្មានប្រាក់សូម្បីមួយរៀល សម្រាប់ជិះតាកស៊ីក៏បានទូរសព្ទ័មកក្រុមគ្រួសារ ដើម្បីអោយរកថវិការចំនួន៦ម៉ឺនរៀល សម្រាប់ទុកសម្រាប់ថ្លៃតាក់ស៊ី ។
ដំណឹងនេះ ក៏បានផ្សព្វផ្សាយតាមបណ្ដាញសង្គម ធ្វើអោយមានក្តីអាណិតអាសូរពីសំណាក់សប្បុរជន ប្រមូលថវិកាបានប្រមាណ៣០ម៉ឺនរៀល ដើម្បីត្រៀមទុកជួយដល់ស្ត្រីមានជំងឺខាងលើនេះផងដែរ ។ នៅម៉ោងប្រមាណជាង ៩ យប់ថ្ងៃទី១៥ខែឧសភា ឆ្នាំ២០១៩ស្ត្រីអ្នកជម្ងឺ បានមកដល់លំនៅឋាន នៅភូមិចំការតាម៉ៅ ឃុំស្រែថ្មី ស្រុករលាប្អៀរ ក្រោមការជួយជ្រោមជ្រែងរបស់ប្រជាពលរដ្ឋអ្នកជិតខាង ។
តាមការរៀបរាប់របស់បុរសជាប្តី ឈ្មោះ វ៉ាន់ កៀក អាយុ២៦ឆ្នាំ បានអោយដឹងថា ប្រពន្ធគាត់ឈ្មោះ ឈ្មោះ រឿន រស្មី អាយុ២៩ឆ្នាំ ពួកគាត់បានគ្នាជាប្តីប្រពន្ធ៤ឆ្នាំហើយប៉ុន្តែគ្មានកូនទេ ។ ប្រពន្ធគាត់ជាក្មេងកំព្រានៅខេត្តបាត់ដំបង ។ ដោយសារតែមានជំងឺប្រចាំកាយ កាលពីមួយសប្តាហ៍មុន គាត់មានប្រាក់៨០ម៉ឺនរៀល ហើយបាននាំប្រពន្ធ គាត់ទៅព្យាបាលជំងឺនៅមន្ទីរពេទ្យមិត្តភាពខ្មែរសូវៀត (ពេទ្យរុស្ស៊ី) រាជធានីភ្នំពេញ ។
ប៉ុន្តែរយៈពេលមួយសប្តាហ៍នេះ ប្រពន្ធរបស់គាត់មិនមានការថមថយជំងឺសោះ ហើយប្រាក់ក្នុងខ្លួនក៏អស់ ម្យ៉ាងវិញទៀត គាត់ឃើញសកម្មភាពគ្រូពេទ្យ មិនបានយកចិត្តទុកដាក់ មើលប្រពន្ធគាត់ផងនោះ គាត់ក៏សុំអនុញ្ញាតយកប្រពន្ធគាត់ត្រឡប់មកផ្ទះវិញ ទាំងគ្មានថវិកាមួយរៀលសោះ ។ ពេលចេញដំណើរតាមផ្លូវនៅលើតាក់ស៊ីគាត់បានទូរសព្ទ័ ប្រាប់មកក្រុមគ្រួសារឲ្យជួយរក៦ម៉ឺនរៀលដើម្បីសម្រាប់ចេញថ្លៃ តាក់ស៊ី ។ បុរសជាប្តីបានបញ្ជាក់ថា៖ តាមការបញ្ជាក់របស់គ្រួពេទ្យ ប្រពន្ធគាត់មានជំងឺឈាមសស៊ីឈាមក្រហម ,ជំងឺទឹកដក់ក្នុងដៃស្បូន , ធ្លុះសួត, និងដុះសាច់ក្នុងតម្រងនោម ។
គេមិនដឹងថា តើការបកស្រាយរបស់បុរសជាប្តី ដែលចោទលើក្រុមគ្រួពេទ្យថា មិនបានយកចិត្តទុក ព្រោះតែគ្មានលុយ តើជារឿងពិត ឬមិនពិតនោះទេ ។ ប៉ុន្តែដោយសារតែការចេះជួយគ្នា ក្នុងគ្រាហ៍មានអាសន្ន នៅព្រឹកថ្ងៃទី១៦ ឧសភា មានសប្បុរជនជាច្រើនបន្ថែមបានយកអំណោយទៅជួយដល់ស្រី្តខាងលើ ជាបន្តបន្ទាប់ ។ ក្នុងនោះមាន ក្រុមការងារព្រះធម្មាអនុវឌ្ឍន៍ ដឹកនាំដោយ ព្រះគ្រូអនុគណស្រុករលាប្អៀរ បាននាំយកនូវប្រឡុងធំ១ អង្ករ២៥គីឡូ,ទឹកត្រី ទឹកស៊ីអ៊ីវ ត្រីខកំប៉ុង ,ទឹកដោះគោ ស្ករស និងថវិការ៣០ម៉ឺនរៀល ។ ចំណែក ក្រុមសម្ព័ន្ធប្រជាជន ស្រឡាញ់សន្តិភាព បាននាំយកនូវគ្រឿងឧបភោគ បរិភោគ និងថវិកា៤០ម៉ឺនរៀល ។
សូមបញ្ជាក់ថា ដោយសារតែក្តីអាណិតអាសូរ សប្បុរជននានាបានយកអំណោយទៅជួយស្ត្រីខាងលើ ជាហូរហែ។ ប៉ុន្តែអ្វីធ្វើអោយសង្វេគនោះ អ្នកជំងឺមានសភាពធ្ងន់ធ្ងរណាស់ទៅហើយ ហើយតាមការស្មាន របស់អ្នកដែលមានជំនាញគ្រួពេទ្យថា គ្រូពេទ្យនៅរាជធានីភ្នំពេញ ប្រហែលអស់លទ្ឋភាព អ្នកជំងឺគ្មានសង្ឃឹមរស់ ទើប គេបញ្ជូនអោយមកផ្ទះវិញ ។
ចែករំលែកព័តមាននេះ