ខេត្តត្បូងឃ្មុំ ៖ ចំណតរថយន្តក្រុងសួង ស្ថិតនៅសង្កាត់សួង ក្រុងសួង ត្រូវបានគេដឹងថា បានវិនិយោគទុនរហូតដល់ទៅ២០ឆ្នាំ ហើយគិតមករហូតមកដល់ពេលនេះទើបនឹងបានជាង១០ឆ្នាំប៉ុណ្ណោះ ។ សូម្បីតែតារាងសៀវភៅបន្ទុកក៏មិនបានឃើញមានបិទនៅជញ្ជាំង…
ខេត្តត្បូងឃ្មុំ ៖ ចំណតរថយន្តក្រុងសួង ស្ថិតនៅសង្កាត់សួង ក្រុងសួង ត្រូវបានគេដឹងថា បានវិនិយោគទុនរហូតដល់ទៅ២០ឆ្នាំ ហើយគិតមករហូតមកដល់ពេលនេះទើបនឹងបានជាង១០ឆ្នាំប៉ុណ្ណោះ ។ សូម្បីតែតារាងសៀវភៅបន្ទុកក៏មិនបានឃើញមានបិទនៅជញ្ជាំង ក្រោយភ្លៀងធ្លាក់ទឹកនៅដក់ក្នុងបរិវេណចំណតរួមនឹងសំរាមដែលមើលទៅមិនមានបរិស្ថានស្អាតឡើយ ។
អ្នកលក់បាយម្នាក់បានប្រាប់ឲ្យដឹង នៅព្រឹកថ្ងៃទី១៦ ឧសភានេះថា គាត់បានមកជួលតូបពីម្ចាស់ចំណត់រថយន្តក្រុងសួងពីបុរសចំណាស់ម្នាក់ឈ្មោះផេង ដែលមើលការខុសត្រូវដោយក្នុង១ខែ តម្លៃ១៥ម៉ឺនរៀល អនាម័យបង់១ថ្ងៃ៥០០រៀល ហើយបានលក់មកដល់ពេលនេះមានរយៈពេលចំនួន៣ឆ្នាំមកហើយ ការលក់ដូរនៅក្នុងរដូវប្រាំងស្រួលលក់បន្តិច តែមកដល់ដើមរដូវវស្សាភ្លៀងបានធ្លាក់ច្រើនមិនសូវមានមនុស្សមកហូប ។
អ្នកលក់បាយរូបនោះបានប្រាប់បន្តថា ប៉ុន្មានថ្ងៃនេះមេឃភ្លៀងធ្លាក់បង្អុរចុះមកលើក្រុងសួង ហើយទឹកដក់នៅកន្លែងលក់របស់គាត់ ដោយឃើញបែបនោះគាត់ក៏បានកាយសំរាមចេញឲ្យហូរចូលទៅក្នុងលូប្រសិនណាបើមិនកាយចេញទេទឹកនឹងដក់ ហើយក៏បានបង្កផលវិបាកដល់កន្លែងលក់របស់គាត់ដែរ ។ តូបជាច្រើនត្រូវបានគេសង់ឡើងសម្រាប់ជួលឲ្យអាជីវករលក់ដូរដោយក្នុង១តូបៗជួលតម្លៃ១៥ម៉ឺនរៀល ដូចគ្នាត្រង់កន្លែងត្រូវប៉ាន់រាងថ្លៃបន្តិច ត្រង់កន្លែងដែលមានទឹកដក់ច្រើននោះ ដោយសារតែ
មិនមានអ្នកលក់ដូរត្រង់នោះទើបដក់បែបនេះ ។
អ្នកបើកបររថយន្តធុនធំ១គ្រឿងដឹកទំនិញច្រើនមុខ មុនចេញពីចំណត់រថយន្តក្រុងសួងប្រាប់ថា ទំនិញដែលដាក់នៅលើរថយន្តក្នុង១លើក ត្រូវបង់ឲ្យម្ចាស់ចំណតរថយន្តចំនួន១៤.០០០រៀល ដើម្បីដឹកចេញទៅកាន់ស្រុកឆ្លូងខេត្តក្រចេះ ក្រោយពីផាត់ការចំណាយផ្សេងៗក្នុង១ជើង អាចនៅសល់ប្រាក់ចំណេញពី៥០ទៅ៦០ម៉ឺនរៀល តែមិនបានរាល់ថ្ងៃនោះទេ ។
លោកសុ ផេង អ្នកមើលការខុសត្រូវនៅចំណតរថយន្តក្រុងសួងបានប្រាប់តាមទូរស័ព្ទឲ្យដឹងថា ចំណតរថយន្តក្រុងសួងត្រូវបានក្រសួងហិរញ្ញវត្ថុអនុញ្ញាតឲ្យវិនិយោគទុនចំនួន២០ឆ្នាំ ហើយរហូតមកដល់ពេលនេះបានជាង១០ឆ្នាំហើយ ។ ក្នុងបរិវេណចំណតមិនឲ្យការសង់តូបលក់ដូរនោះទេ តែរូបលោកបានលើកហេតុផល ប្រសិនណាបើមិនសង់ខ្លះទេនោះអ្នកបើកបរថយន្តឈ្មួល និងរថយន្តដឹកទំនិញមកចូលចតពិបាកនឹងរករបស់ហូប ។ សម្រាប់តារាងកំណត់ឲ្យយកតម្លៃតាមសៀវភៅបន្ទុកនៅកន្លែងរបស់លោកមិនមានបិទក៏ដូចជា កន្លែងផ្សេងៗទៀតដែរ ។ ហើយត្រង់កន្លែងដែលមានទឹកដក់ក្នុងចំណតរថយន្តនោះនឹងមានគោលការណ៍ចាក់ឲ្យខ្ពស់ និងរៀបចំឲ្យស្អាតជាងនេះ ៕
ចែករំលែកព័តមាននេះ