ខេត្តបាត់ដំបង៖ រថយន្តធុនធំដឹកបន្លែមួយគ្រឿងបានបើកកៀរថយន្តមួយគ្រឿងទៀតដែលធ្វើដំណើរក្នុងទិសដៅបញ្ច្រាសគ្នា ហើយរថយន្តដឹកបន្លែបង្កក៏ជ្រុលទៅបុកគូទរថយន្តធុនធំមួយគ្រឿងទៀតដែលនៅពីមុខយ៉ាងពេញទំហឹង បណ្ដាលឲ្យព្រូរថយន្តបង្កហេតុម្នាក់ស្លាប់កៀបជាប់ក្នុងកាប៊ីន ចំណែកអ្នកបើកបររថយន្តបានរត់គេចខ្លួនបាត់ស្រមោល បន្សល់ទុកតែសពព្រូម្នាក់ និងរថយន្តបង្កនៅកន្លែងកើតហេតុ ។
ហេតុការណ៍ខាងលើនេះបានកើតឡើងកាលពីវេលាម៉ោង១និង២០នាទីរំលងអាធ្រាត្រឈានចូលថ្ងៃទី១៧ ខែឧសភា នៅលើផ្លូវជាតិលេខ៥ ត្រង់ចំណុចភូមិថ្នល់បត់ ឃុំឫស្សីក្រាំង ស្រុកមោងឫស្សី។
តាមរបាយការណ៏របស់សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍ខាងលើនេះបង្កឡើងដោយរថយន្តម៉ាកហ៊ីយិនដាយ(ប្រភេទយីឌុបមានដឹកបន្លែ) ពាក់ស្លាកលេខ ភ្នំពេញ ២E-៥៨២០ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ ចំណែកបុរសម្នាក់ជាព្រូ មិនស្គាល់អត្តសញ្ញាណ បានស្លាប់កៀបជាប់ក្នុងកាប៊ីនរថយន្ត។
តាមរបាយការណ៏ដដែលបានបញ្ជាក់ថា មុនពេលកើតហេតុ រថយន្តបង្កបានធ្វើដំណើរពីទិសខាងកើតឆ្ពោះទៅខាងលិច លុះពេលមកដល់ចំណុចខាងលើបានកៀររថយន្ត១គ្រឿងកំពុងបើកបរក្នុងទិសដៅផ្ទុយគ្នាម៉ាកហ៊ីយិនដាយ ពណ៌ស គ្មានផ្លាកលេខ បើកបរដោយឈ្មោះណុប ពេញ ភេទប្រុស អាយុ៤៦ឆ្នាំ រស់នៅសង្កាត់ទឹកល្អក់២ ខណ្ឌទួលគោក រាជធានីភ្នំពេញ បន្ទាប់មករថយន្តក៏ជ្រុលទៅបុកគូថរថយន្តធុនធំមួយគ្រឿងទៀតកំពុងបើកបរនៅខាងមុខយ៉ាងពេញទំហឹង បណ្តាលឱ្យព្រូរថយន្តបង្កម្នាក់ស្លាប់កៀបជាប់ក្នុងកាប៊ីន ចំណែករថយន្តដែលត្រូវគេបុកគូថនោះបានបន្ថែមល្បឿនបើកទៅមុខបាត់។
បើតាមសមត្ថកិច្ចបានប្រាប់ថា នៅវេលាកើតហេតុនោះ មិនមានសាក្សីណាម្នាក់បានឃើញហេតុការណ៍នេះទេ គឺមានតែអ្នកបើកបរម្នាក់ប៉ុណ្ណោះឈ្មោះណុប ពេញ ដែលរថយន្តរបស់គាត់ត្រូវរថយន្តបង្កបើកកៀរបណ្ដាលឲ្យខូចខាតផ្នែកខាងក្រោយ។
តាមប្រភពពីមន្ត្រីជំនាញដែលចុះទៅពិនិត្យកន្លែងកើតហេតុបាននិយាយថា អ្នកបើករថយន្តបង្កនោះទំនងជាងងុយដេកមួយភាំង ទើបបើករថយន្តរ៉េចង្កូតទៅកៀររថយន្តខាងលើ រហូតជ្រុលទៅបុកគូថរថយន្តមួយគ្រឿងផ្សេងទៀតពេញទំហឹង បណ្ដាលឲ្យកៀបស្លាប់ព្រូបែបនេះ។
តាមប្រភពពីមន្ត្រីដដែលបានបញ្ជាក់ថា ក្រោយពេលកើតហេតុ សមត្ថកិច្ចបាននាំយករថយន្តទាំង២គ្រឿងទៅរក្សាទុកនៅអធិការនគរបាលស្រុកមោងឬស្សីជាបណ្ដោះអាសន្នដើម្បីចាត់ការតាមនីតិវិធី រីឯសពជនរងគ្រោះ ត្រូវបានសមត្ថកិច្ចកំពុងធ្វើការស្រាវជ្រាវរកក្រុមគ្រួសារ ដើម្បីឱ្យមកទទូលយកទៅធ្វើបុណ្យតាមប្រពៃណី៕
ចែករំលែកព័តមាននេះ