រាជធានីភ្នំពេញ ៖ អ្នកប្រដាល់ជើងខ្លាំងកម្ពុជាចំនួន២រូបបានត្រៀមខ្លួនរួចជាស្រេចក្នុង ជំនួបប្រកួតដណ្ដើមប្រាក់លានជាមួយកីឡាករ ថៃនៅលើសង្វៀនស៊ីអិនស៊ីនាថ្ងៃសៅរ៍ទី១៨ ឧសភា ចុងសប្ដាហ៍នេះ ។ ជើងខ្លាំងកម្ពុជា ទាំងពីររូបនោះមានឃីម…
រាជធានីភ្នំពេញ ៖ អ្នកប្រដាល់ជើងខ្លាំងកម្ពុជាចំនួន២រូបបានត្រៀមខ្លួនរួចជាស្រេចក្នុង ជំនួបប្រកួតដណ្ដើមប្រាក់លានជាមួយកីឡាករ ថៃនៅលើសង្វៀនស៊ីអិនស៊ីនាថ្ងៃសៅរ៍ទី១៨ ឧសភា ចុងសប្ដាហ៍នេះ ។ ជើងខ្លាំងកម្ពុជា ទាំងពីររូបនោះមានឃីម បូរ៉ា មកពីក្លិបរស្មី ភូមិគាបខេត្តបន្ទាយមានជ័យ ត្រូវប្រកួតជាមួយកីឡាករថៃឈ្មោះវិតថៈយ៉ាយុត និធិត ណាយក្វាម និងលន បញ្ញា មកពីសមាគមកីឡាប្រដាល់ក្រសួងការពារជាតិ ត្រូវប្រកួតជាមួយកីឡាករថៃឈ្មោះប្រាក់ចានបាន ស.ច វីឈីតប៉ែតទីវ ក្នុងប្រភេទទម្ងន់៦០គីឡូក្រាម។
គួររំលឹកថា ព្រឹត្តិការណ៍ប្រកួតដណ្ដើមប្រាក់លានខារ៉ាបាវ ត្រូវបានគេរៀបចំធ្វើឡើងជារៀង រាល់ថ្ងៃសៅរ៍ ដែលមានកីឡាករបរទេស២រូបកម្ពុជា២រូប ។ ចំពោះរូបមន្តប្រកួតវិញឈ្នះទទួលបានប្រាក់រង្វាន់ក្រៅពីតម្លៃខ្លួនចំនួន១លានរៀល បើស្មើទទួលបានពាក់កណ្ដាលម្នាក់។ សម្រាប់ការប្រកួតនៅថ្ងៃសៅរ៍ គេនៅមិនទាន់ដឹងថា កីឡាករកម្ពុជា ឬកីឡាករថៃនោះទេដែលជាអ្នកមានសំណាងដណ្ដើមបានប្រាក់លានលើកនេះ។
ឃីម បូរ៉ា ត្រូវបានអ្នកតាមដានការប្រកួតភាគច្រើនវាយតម្លៃថា ការប្រកួតលើកនេះវាមិនមែនងាយស្រួលនោះទេ ព្រោះអីកីឡាករ ថៃម្នាក់នេះជាជើងខ្លាំងមួយរូបដែលមានបទ ពិសោធន៍ប្រកួតយូរឆ្នាំមកហើយ។ មិនតែប៉ុណ្ណោះ គេថែមទាំងធ្លាប់មកប្រកួតនៅស្រុកខ្មែរជាញឹកញាប់ទៀតផង ។ ទោះបីយ៉ាងណាសម្រាប់អ្នកគាំទ្រមួយចំនួនទៀតនៅតែមានជំនឿចិត្តលើ ឃីម បូរ៉ា ជានិច្ច ព្រោះលោកជាអ្នកប្រដាល់ ជើងចាស់មួយរូបដែលមានបទពិសោធន៍ប្រកួតមិនចាញ់ កីឡាករថៃម្នាក់នេះប៉ុន្មានទេ។
ចំណែកលន បញ្ញា ប៉ះកីឡាករថៃដែលទើប តែឈានជើងចូលមកប្រកួតនៅសង្វៀនស្រុកខ្មែរជាលើកដំបូង ក៏មិនទាន់ដឹងថា យ៉ាងណានោះដែរ ។ ប៉ុន្តែលន បញ្ញា គេបានសន្យាថា នឹងព្យាយាមប្រកួតឱ្យអស់ពីសមត្ថភាព ដើម្បីក្លាយជាម្ចាស់ប្រាក់លាននៅក្នុងសប្ដាហ៍នេះ ។
ទោះបីយ៉ាងណា លោក ម៉ា ស៊ីថេត អ្នក គ្រប់គ្រងកម្មវិធីប្រកួតប្រចាំសង្វៀនទូរទស្សន៍ស៊ីអិនស៊ី បានអះអាងថា កីឡាករថៃម្នាក់នេះ ជា ជើងខ្លាំងលំដាប់ជួរមុខប្រចាំប្រទេសថៃដែលអ្នក ប្រកួតជាមួយមិនអាចលេងសើចបានឡើយ។
ដោយឡែកគូប្រកួតមិត្តភាពវិញ កីឡាករ ផាន រះ មកពីក្លិបតាព្រហ្មមានជ័យត្រូវបានគេផ្គូផ្គងឱ្យជួបប្រកួតជាមួយកីឡាករ ថា សារុនមកពីក្លិបពុទ្ធសេរីវង្សពោធិសែនជ័យ ។ កីឡាករ ទេស សុខហេង មកពីក្លិបកងពលតូចលេខ៧០ប្រកួតជាមួយកីឡាករសូត្រ សាណូ មកពីក្លិបបក្សីស្លាបដែក និងគូចុងក្រោយកីឡាករ លីន សារ៉ាក់ មកពីក្លិបបុរីរាជសីហ៍ ប្រកួតជាមួយ កីឡាករ ពេជ្រ វិចិត្រ មកពីក្លិបចលនាយុវជន១៥៧ ៕
ចែករំលែកព័តមាននេះ